ހއ.ދިއްދޫ ފެނަކައިގައި ތިބި ކޮންޓްރެކްޓް މުވައްޒަފުންތަކެއްގެ ކޮންޓްރެކްޓް ފެނަކައިން އައު ނުކުރި މައްސަލަ މަޖިލީހަށް ހުށައަޅައިފިއެވެ.

މި މައްސަލަ މަޖިލީހަށް ހުށައެޅި ދިއްދޫ ދާއިރާގެ މެމްބަރު އަބްދުالله ވަހީދެވެ. އަބްދުالله ވަހީދު މަޖިލީހަށް ފޮނުއްވި ސިޓީއެއްގައި ބުނުއްވީ ނިމިގެންދިޔަ އެމްޑީޕީގެ ސަރުކާރުން ދިއްދޫގައި އިމާރާތް ކުރަން ފަށާފައިވާ  އާ އިންޖީނުގެ އާއި އައިސް ޕްލާންޓްގެ މަސައްކަތަށް ފެނަކަ އިން ވަޒީފާ ދީފައިވާ 57 ކޮންޓްރެކްޓް މުވައްޒަފުން އެއްވެސް ނޯޓިސްއެއް ދިނުމަކާ ނުލައި ކުއްލި ގޮތަކަށް އެ މުވައްޒަފުންގެ ވަޒީފާތަކުން ވަކި ކުރި ކަން މުވައްޒަފުންގެ ފަރާތުން އޭނާގެ ސަމާލުކަމަށް އައިސްފައިވާ ކަމަށެވެ.

މިކަމުގެ ސަބަބުން ކޮންޓްރެކްޓް އައު ނުކުރި މުއައްޒަފުންނާއި އެ މުއައްޒަފުންގެ އާއިލާތަކަށް ނުހަނު ބޮޑު ނުތަނަވަސްކަމެއް ލިބި އެކަމުގެ ޝަކުވާ އާއި ނުތަނަވަސްކަން އެބައޮތް ކަމަށް އެބޭފުޅާ މަޖިލީހަށް ފޮނުއްވި ސިޓީގައި ވެއެވެ.

Advertisement

މީގެ އިތުރުންވެސް އެ ސިޓީގައި  މައްސަލައިގައި ކަން ހިނގާފައިވާ ގޮތް ބެލުމަށާއި، ދިއްދޫ އާ އިންޖީނުގެއާއި، އައިސްޕްލާންޓްގެ މަސައްކަތް އަވަހަށް ނިންމަން ބާރު އެޅުމަށާއި، އެ މަސައްކަތް ނިމެންދެން މުވައްޒަފުން ވަޒީފާގައި ބޭތިއްބެވުމަށް ފެނަކައަށް ދެންނެވުމަށްޓަކައި މި މައްސަލަ ރައްޔިތުންގެ މަޖިލީހުގެ ކަމާބެހޭ ކޮމެޓީއަށް ފޮނުވައިދިނުމަށްވެސް ވަނީ އެދިލައްވާފައެވެ.

ފެނަކަ އިން ދިއްދޫ ގައި ތިބި ކޮންޓްރެކްޓް މުވައްޒަފުންތަކެއްގެ ކޮންޓްރެކްޓް ފެނަކައިން އައު ނުކުރި މައްސަލަ ގައި އެ މުއައްޒަފުން ވަނީ އިއްޔެ އިހުތިޖާޖް ވެސް ކޮށްފައެވެ.

މި މައްސަލަ އާއި ގުޅިގެން ފެނަކައިގެ މެނޭޖިން ޑިރެކްޓަރ މުއާޒު މުހައްމަދު ރަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ،  އެ މުވައްޒަފުން ވަކިކުރީ ކޮންޓްރެކްޓު ހަމަވުމުން ކަމަށާއި އެ މުވައްޒަފުންނަކީ ފެނަކަ ކޯޕަރޭޝަންގެ ދިއްދޫ އާ އިންޖީނުގެ އެޅުމަށް ނަގާފައި ތިބި މުވައްޒަފުންތަކެއް ކަމަށެވެ. ދިއްދޫގައި ހިނގަމުންދާ ޕްރޮޖެކްޓް ގެ މަސައްކަތް މިވަގުތު ހުއްޓިފައިވާ ކަމަށާއި، މަސައްކަތް ހުއްޓިފައި އޮއްވާވެސް އެ މުވައްޒަފުންނަށް މުސާރަ ދެވިފައިވާކަމަށް މުއާޒް ވިދާޅުވިއެވެ.

މީގެ އިތުރުންވެސް މުއާޒް ވިދާޅުވީ ޕްރޮޖެކްޓް ނުހިނގާ އިރު، ކޮންޓްރެކްޓް އައުކޮށްގެން މުވައްޒަފުން ބޭތިއްބުމަށް ކުންފުނީގެ ހާލަތު ތަން ނުދޭ ކަމަށާއި އެ މަޝްރޫއުގެ މަސައްކަތަށް 70 މުވައްޒަފުން ނަގާފައިވާއިރު، 23,000,000 އަށްވުރެ ގިނަ ރުފިޔާ އަރާކަމަށެވެ.

ފެނަކައިގެ ދަރަނި އިންތިހާއަށް ބޮޑުވެފައިވާއިރު، އެކުންފުނިން މީގެ ކުރިން ހާމަކޮށްފައިވާގޮތުގައި މުވައްޒަފުންގެ މުސާރައިގެ ގޮތުގައި އެކަނިވެސް 79 މިލިއަން ރުފިޔާ ހޭދަކުރަން ޖެހެއެވެ.

މުއާޒް ފެނަކައިގެ އެމްޑީގެ މަގާމާއި ހަވާލުވެވަޑައިގެން ވަނީ  ކޮންޓްރެކްޓް ހަމަވެފައިވާ މުވައްޒަފުންގެ ކޮންޓްރެކްޓް އާކުރުމުގެ އުސޫލަށް ބަދަލުގެނެސް، މަސައްކަތެއް ނެތް ކޮންޓްރެކްޓު މުވައްޒަފުންގެ މުސާރަ އާކޮށްނުދިނުމަށް ނިންމަވާފަ އެވެ.