މިފަހަކަށްއައިސް ރުޤްޔާގެ ނަމުގައި ސިހުރު ހަދަމުންދާކަމަށާއި، މިފަދަކަންކަން ކޮށްހެދުމަކީ ޙަރާމްކަމެއްކަމަށް ދިވެހިރާއްޖޭގެ ފިޤްޙް އެކެޑެމީ އިން ބުނެފިއެވެ.

ފިޤްޙް އެކަޑެމީ އިން ނެރުނު އިއުލާނެއްގައި ބުނެފައިވަނީ، ސިހުރު ހެދުމަކީ އިސްލާމްދީނުގެ ބޮޑެތި ފާފަތަކުގެ ތެރޭގައި ހިމެނޭކަމެއް ކަމަށެވެ.

އަދި މި ފަހަކަށް އައިސް ދިވެހިރާއްޖޭގެ ބައެއް ހަބަރުފަތުރާ ވަސީލަތްތައް މެދުވެރިކޮށް ސިހުރު ހެދުމަށް ހިތްވަރު ލިބޭ ގޮތަށް ބަޔަކު މަސައްކަތްކުރަމުން އަންނަ ކަން ފާހަގަކޮށް އެ އިއުލާނުގައިވަނީ އެފަދަ މީހުންގެ ގާތަށް ގޮސް ސިހުރުގެ އެހީ ލިބިގަތުމަކީ ހަރާމް ކަމެއް ކަމަށެވެ.

Advertisement

އަދި އެފަދަ މީހުންގެ ގާތަށް ނުދިއުމަށްވެސް ފިގްހު އެކަޑަމީއިން އިލްތިމާސްކުރެ އެވެ.

""ސިހުރު ހެދުމަކީ އިސްލާމްދީނުގެ ސާފު ތެދުމަގުން ރައްޔިތުން އެއްކިބާވެ، ހިދާޔަތުގެ ތެދު މަގުން ނެއްޓި މަގުފުރެދިދާނެ ކަމަކަށްވާތީ އެފަދަ ތަކެތި ރައްޔިތުންނަށް ފެންނާނެހެން ހަބަރުފަތުރާ ވަސީލަތްތަކުން ނުފެތުރުމަށް އިލްތިމާސް ކުރަން" ފިގްހު އެކަޑަމީއިން ކުރި އިއުލާނުގައި ބުނެ އެވެ.

ރާއްޖޭގައިވެސް މިފަހަކަށް އައިސް ރުގުޔާގެ ނަމުގައިވެސް މީހުން ސިހުރު ހަދަމުން އަންނަ މައްސަލަ ތަކާއި، އެނޫންވެސް ނަންނަމުގައި ސިހުރު ހަދައި ބޮޑެތި ޢަދަދުތަކުން ފައިސާ ނަގަމުން އަންނަ މައްސަލަތައް ދޭތެރެއިން ފެންމަތިވެއެވެ. 

އަދި އެފަދަ މީހުންގެ ފަރާތުން ޖިންސީ ފުރައްސާރަކުރާ ކަމުގެ ވާހަކަތައް ވެސް ދެކެވެއެވެ.