ނިމިދިޔަ 2023 ވަނަ ދައުލަތުގެ ރިކަރަންޓުގެ ޚަރަދުގެ ގޮތުގައި 31.7 ބިލިއަން ރުފިޔާ ދަޢުލަތުން ހޭދަކޮށްފައިވާ ކަމަށް ދައުލަތުގެ މާލީ ވުޒާރާއިން ހާމަކޮށްފިއެވެ.

ދިވެހި ދަޢުލަތުގެ މާލީ ވުޒާރާއިން އާއްމުކުރާ ވީކްލީ ފިސްކަލް ރިޕޯޓުގައިވާ ގޮތުން ނިމުނު އަހަރުގެ ޑިސެމްބަރުމަހުގެ 28ވަނަ ދުވަހުގެ ނިޔަލަށް ރިކަރަންޓް ޚަރަދަށް 31.7 ބިލިއަން ރުފިޔާ ދަޢުލަތުން ހޭދަކުރިއިރު އެ މުއްދަތާއި ހަމައަށް މުޅި ދަޢުލަތުގެ ޖުމްލަ ޚަރަދު އުޅެނީ 46.8 ބިލިއަން ރުފިޔާގައެވެ.

މާލީ ވުޒާރާގެ ރިޕޯރޓުގައިވާ ގޮތުން ރިކަރަންޓް ޚަރަދުގެ ގޮތުގައި ހިމެނެނީ މުސާރައާއި އިނާޔަތަށް ޚަރަދުކޮށްފައިވާ 11.9 ބިލިއަން ރުފިޔާއާއި، އިދާރީ ހިންގުމަށް ހިނގާފައިވާ 19.2 ބިލިއަން ރުފިޔާއެވެ.

ދަޢުލަތުގެ މާލީ ވުޒާރާއިން އާއްމުކުރާ ވީކްލީ ފިސްކަލް ރިޕޯޓުގައިވާ ގޮތުން ނިމުނު އަހަރުގެ ޑިސެމްބަރު މަހުގެ 28ވަނަ ދުވަހުގެ ނިޔަލަށް ދައުލަތަށް 31.8 ބިލިއަން ރުފިޔާގެ އާމްދަނީއެއް ލިބިފައިވާއިރު، އެ އަހަރުތެރޭ ދައުލަތަށް ލިބޭނެ ކަމަށް އަންދާޒާ ކޮށްފައިވަނީ 32.4 ބިލިއަން ރުފިޔާއެވެ.

މާލީ ވުޒާރާގެ ރިޕޯޓުގައި އިތުރަށް ހާމަކޮށްފައިވާ ގޮތުން ދައުލަތަށް ލިބިފައިވާ އާމްދަނީގެ ތެރޭގައި ހިމެނެނީ، ޓެކްސް އާމްދަނީގެ ގޮތުގައި ލިބިފައިވާ 22.8 ބިލިއަން ރުފިޔާއާއި، ޓެކްސް ނޫން އާމްދަނީގެ ގޮތުގައި ލިބިފައިވާ 8.1 ބިލިއަން ރުފިޔާއާއި، އެހީގެ ގޮތުގައި ލިބުނު 515.5 މިލިއަން ރުފިޔާއެވެ

ޓެކްސް ޢާމްދަނީގެ ތެރޭގައި ހިމެނެނީ މައިގަނޑު ގޮތެއްގައި އިމްޕޯޓު ޑިއުޓީއާއި، ބިޒްނަސް އެންޑު ޕްރޮޕަރޓީ ޓެކްސް، ބީޕީޓީއާއި، ޖީއެސްޓީގެ ގޮތުގައި ލިބިފައިވާ އާމްދަނީއެވެ.

ވޭތުވެދިޔަ އަހަރު އެންމެ ބޮޑު ޚަރަދެއް  ރިކަރަންޓް ޚަރަދަށް ހިނގި އިރު ދެން ދަޢުލަތުން އެންމެ ބޮޑު ޙަރަދެއް ހިނގާފައިވަނީ ކެޕިޓަލް ޚަރަދަށެވެ. އޭ ޖުމުލަ 15.1 ބިލިއަން ރުފިޔާއެވެ.