ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވައުދުވެެވަޑައިގެންނެވި ފަދައިން ޔޫއޭއީ އަދި ތައިލެންޑުން އާސަންދަ ލިބޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާ ކަަމަށް އާސަންދަ ކުންފުނިން ބުނެފިއެވެ.
އާސަންދައިން ނެރުނު ނޫސް ބަޔާނެއްގައި ބުނީ އާސަންދަ ސްކީމް ގެ ދަށުން މި ވަގުތު ބަލި މީހުން ފޮނުވަމުން ދަނީ ހަމައެކަނި ލަންކާ އާއި އިންޑިއާ އަށް ނަމަވެސް ތައިލެންޑާއި ޔޫއޭއީއަށް ވެސް މި ސްކީމް ގެ ދަށުން ބަލިމީހުން ފޮނުވުމަށް ރައީސް ޑރ.މުއިއްޒު ނިންމަވާފައިވާތީ އެކަމާއި ގުޅިގެން ކުރަން ޖެހޭ މަސައްކަތްތައް ކަމާބެހޭ ފަރާތްތަކާއި ގުޅިގެން ކުރަމުން އަންނަ ކަމަށެވެ.
މީގެ އިތުރުންވެސް އާސަންދަ އިން ނެރުނު ބަޔާނުގައި، އެ ކުންފުނިން އިންޑިއާ އާއި ލަންކާ ނޫން އެހެން ގައުމު ތަކަށް ބަލިމީހުން ފޮނުވުމަށް "ދެކޮޅު" ހަދާ ކަމަށް ފަތުރަމުންދާ ވާހަކަތައް ވަނީ ދޮގުކޮށްފައެވެ.
އެގޮތަށް ލިޔެފައިވަނީ މިދިޔަ އަހަރުގެ ޑިސެންބަރު މަހުގެ 12 ވަނަ ދުވަހު ރައްޔިތުންގެ މަޖިލިސް މެމްބަރަކު އެސްއޯއީ ކޮމިޓީގައި އެއްސެވި ސުވާލަކަށް ޖަވާބުދެއްވަމުން، މި ޚިދުމަތް އިތުރު ގައުމުތަކަށް ފުޅާ ކުރުމުގެ ވިސްނުމެއް ނެތް ކަމަށް އެ ކުންފުނީގެ މެނޭޖިން ޑިރެކްޓަރ ވިދާޅުވި މަފްހޫމް އޮޅޭ ގޮތަށް ކަމަށް ވެސް އެ ބަޔާނުގައި ވަނީ ފާހަގަކޮށްފައެވެ.
އެހެންކަމުން ސަރުކާރުން އެހެން ގައުމު ތަކަށް އާސަންދައިގެ ޚިދުމަތް ފުޅާ ކުރަން ހަމަޖައްސާފައިވަނިކޮށް، މާކުރިން ދެކެވިފައިވާ ވާހަކައެއް ހަގީގަތް އޮޅޭނެ ފަދައިން ފެތުރުމަކީ އާންމުންގެ ހިތް ތަކުގައި ނުތަނަވަސްކަން ފެތުރޭނެ ކަމެއް ކަަމަށް ވާތީ މިފަދަ ހަބަރުތައް ގެންނަ އިރު ކުންފުނީގެ ބަހެއް ހޯދައި، ހަގީގަތްތައް ސާފު ވާނެހެން ހަބަރުތައް ގެނައުމަށް ވެސް އެކުންފުނިން ވަނީ އިލްތިމާސް ކޮށްފައެވެ.
އާސަންދައިގެ ޚިދުމަތް ފުޅާ ކުރެއްވުމަށް ރައީސް ޑރ.މުއިއްޒު ނިންމެވީ އާސަންދައަކީ ހަމައެކަނި ވަކި ދިމާލަކުން ހުންނަ، ވަކި ގައުމެއްގައި ހުންނަ މެޑިކަލް ފެސިލިޓީތަކުން އެކަނި ގޮސްގެން ބޭނުންކުރެވޭ އެއްޗަކަށް ނުހަދައި އެއަށް ވުރެ ފެންވަރު ރަނގަޅު ގައުމުތަކުން ލިބޭ އެއްޗެއް ގޮތުގައި ހެއްދެވުމަށް ކަމަށް އެމަނިކުފާނު ވަނީ ވިދާޅުވެފައެވެ.
ރާއްޖޭގެ ސިއްހީ ދާއިރާ ތަރައްގީ ވަންދެން ދާނީ މިހާރު އެ ދާ ތަންތަނަށް ވުރެ މާ ފެންވަރު ރަނގަޅު، ދުބާއީ ކަހަލަ ބެންކޮކްގައި ހުންނަ ކަހަލަ ފެންވަރު ރަނގަޅު ހޮސްޕިޓަލްތަކަށް ކަމަށާއި، މި ތަންތަނަށް ދަތުރުކުރުމަށް ދާ ޚަރަދު ވެސް އާސަންދައިގެ ދަށުން ކަވަރު ވާނެ ގޮތް ހައްދަވައި ދެއްވާނެ ކަމަށް ވެސް އެމަނިކުފާނު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
