ޗައިނާ އާއި ރާއްޖެއާއި ދެމެދު ޗާރޓަރ ދަތުރުތަކެއް އަންނަ ފެބްރުއަރީ 14ގައި ފެށުމަށް ޗައިނާ ސަރުކާރުން ނިންމަވައިފިއެވެ.

މިކަން ހާމަކުރެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވާންގްލީ ޒިންގް ރާއްޖޭގެ ނޫސްވެރިންނާއި އެކު ބޭއްވެވި ބައްދަލު ކުރެއްވުމުގައެވެ.

މި ބައްދަލު ކުރެއްވުމުގައި ޗައިނާގެ ސަފީރު ވިދާޅުވީ ރާއްޖޭގެ ފަތުރުވެރިކަމުގެ އެއް ނަންބަރު މާކެޓްގެ ގޮތުގައި ޗައިނާގެ މަރކެޓް ހެދުމަށް، ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ފައްޓަވާފައިވާ މަސައްކަތްޕުޅަށް އެ ޤައުމުން ފުރިހަމައަށް މަސައްކަތް ކުރައްވާނެކަމަށެވެ.

އެގޮތުން ފުރަތަމަ ޗާރޓަރ ފްލައިޓްގެ ދަތުރުތައް ޗައިނާ ފޫޖީ ސިޓީން، ރާއްޖެއަށް ފެށުމަށް ހަމަޖެހިފައިވަނީ އަންނަ މަހުގެ 14 ވަނަ ދުވަހުކަމަށާއި، ފުރަތަމަ ފަށާއިރު ޗާރޓަރ ދަތުރުތައް ބޭއްވި ނަމަވެސް، ޑިމާންޑަށް ބަލާ ކޮމާރޝަލް ދަތުރުތައް ވެސް ފައްޓަވާނެކަމަށް ސަފީރު ވިދާޅުވިއެވެ.

މިމަހުގެ 7 ން 12 އަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅަށް ފަހު އެބުރި ވަޑައިގެން ވިދާޅުވީ، ޗައިނާއިން ރާއްޖެއަށް ފަތުރުވެރިން އިތުރު ކުރުމަށް ކާމިޔާބު މަޝްވަރާތަކެއް ކުރެވުނު ކަމަށާއި އަދި ޗައިނާއިން ރާއްޖެއަށް އިތުރު ފްލައިޓްތައް ގެނައުމަށްވެސް މަޝްވަރާ ކުރެވުނުކަމަށެވެ.

އެގޮތުން ދެ ޤައުމުގެ ދެމެދުގައި ބާއްވާ ސީދާ ދަތުރުތައް އިތުރުކުރުމަށް މުހިއްމު މަޝްވަރާތަކެއް ކުރެއްވިކަމަށާއި، މިއަހަރުގެ މާރޗް ހިސާބުގައި ޗައިނާގެ ޝިއަމެން އެއަރލައިންގެ ދަތުރުތައް ރާއްޖެއަށް ފެށުމަށް ހަމަޖެހިފައިވާ ކަމަށެވެ. އަދި ޗައިނާގައި ރާއްޖެ މާކެޓްކުރުމުގެ މަސައްކަތްތައް ވެސް ފުޅާކުރައްވާނެކަމަށް ރައީސް ވަނީ ވިދާޅުވެފައެވެ.

ޗައިނާ ސަރުކާރުން ރާއްޖެ އާއި ދެމެދު ޗާރޓަރ ފުލައިޓުގެ ދަތުރުތަކެއް ފަށާނެކަން އިޢުލާނު ކުރައްވާފައިވާއިރު ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅުގައި ވަނީ ރާއްޖޭގެ ފަތުރުވެރިކަމުގެ އެއްވަނަ މާރކެޓަކީ ޗައިނާކަމަށް ހައްދަވައި ދެއްވުމަށް އެދި ވަޑައިގަންނަވާފައެވެ.

ދިވެހިރާއްޖެއަށް މިދިޔަ އަހަރު 1.8 މިލިއަން ފަތުރުވެރިން ޒިޔާރަތް ކޮށްފައިވާއިރު މި ސަރުކާރުގެ އަމާޒަކީ މިއަހަރު ދިވެހިރާއްޖެއަށް 2 މިލިއަން ފަތުރުވެރިން ގެނައުމެވެ.