އަމިއްލަ ފަރާތްތަކެއްގަ ދީލަތި އެހީގައި ހުޅުމާލެގައި އިތުރު ދެ މިސްކިތާއި މާލެގައި ތިންބުރީގެ މިސްކިތެއް އެޅުމަށް ފުރުސަތު ލިބިފައިވާ ކަމަށް އިސްލާމިކް މިނިސްޓަރު ޑރ.މުޙައްމަދު ޝަހީމް ވިދާޅުވެއްޖެއެވެ.

މިނިސްޓަރު ޝަހީމް ރޭ އެކްސްގައި ކުރެއްވި ޕޯސްޓެއްގައި ވިދާޅުވީ އަމިއްލަ ފަރާތްތަކެއްގެ ދީލަތި އެހީގައި ހުޅުމާލެގައި އިތުރު 2 މިސްކިތް، މާލެގައި ތިންބުރީގެ 1 މިސްކިތް އެޅުމަށްވަނީ ފުރުސަތުލިބިފައި ވާ ކަމަށާއި އެ ފަރާތްތަކަށް އެ ފުރުސަތު ފަހިވެގެންދާނެ ކަމަށެވެ.

އަދި ކުރިއަށް އޮތް ދޮޅުއަހަރު ތެރޭގައި މި ތަންތަނުގެ މަސައްކަތް ނިމޭނެ ކަމަށް ވެސް މިނިސްޓަރު ވިދާޅުވިއެވެ.

ރާއްޖޭގެ އެކި ކަންކޮޅުތަކުގައި މިސްކިތް ބިނާކުރަން ބޭނުންވާ ފަރާތްތަކަށް މިދިޔަ ޑިސެމްބަރުގައި މިނިސްޓްރީން ވަނީ އެ ފުރުސަތު ހުޅުވައިލައިފައެވެ.

އިތުރު މިސްކިތްތައް އެޅުމުގެ ފުރުސަތު ހުޅުވާލެވިގެން ގޮސްފައިވާއިރު، މިސްކިތްތަކުގެ އާބާތުރަ ފިލުވައި، ރީތިކޮށް ބެލެހެއްޓުމަށް ޓަކައި ކޮންމެ އަހަރަކު ދައުލަތުގެ ބަޖެޓުން އެކަމަށް ކުރެވޭ ޚަރަދު މިހާރަށްވުރެ ތިންގުނައަށް އިތުރުކުރަން ސަރުކާރުން ވަނީ ނިންމާފައެވެ. 

އަދި މެދު ނުކެނޑި މިސްކިތްތަކުގެ ހާލަތު ދެނެގަތުމުގެ ނިޒާމު ހަރުދަނާކުރުމުގެ ގޮތުން މިސްކިތްތަކާއި ބެހޭ ޤައުމީ މަޖިލީހުގެ ކޮންސެޕްޓް ކަރުދާސް ތައްޔާރުކޮށްވެސް މިހާރު ނިމިފައިވާ ކަމަށް ސަރުކާރުން ބުނެއެވެ.