ޖިހާދުގެ ނަމުގައި ދާޚިލީ ހަނގުރާމަތައް ހިނގާ އިސްލާމީ ގައުމުތަކަށް ގޮސް އެކަމުގައި ބައިވެރިވުމަކީ ހުއްދަ ކަމެއް ނޫންކަމަށް ރާއްޖޭގެ ފަތުވާދޭ މަޖިލީހުން ބުނެފިއެވެ.
ފަތުވާދޭ މަޖިލީހުން މިފަދައިން ބުނެފައިމިވަނީ ދާޚިލީ ހަމަނުޖެހުންތައް ހިނގަމުންދާ އިސްލާމީ ޤައުމުތަކަށް ޖިހާދުގެ ނަމުގައި ހަނގުރާމައަށް ދިޔުމާއި ބެހޭގޮތުން ނެރެފައިވާ ފަތުވާގައެވެ.
ފަހަކަށް އައިސް ދިވެހީން ގެ މަދު ބަޔަކު ނަމަވެސް ދާޚިލީ ހަމަނުޖެހުންތައް ހިނގާ އިސްލާމީ ގައުމުތަކަށް ޖިހާދުގެ ނަމުގައި ދާކަމަށާއި މި ކަންކަން ހުއްދަ ނުވާނެ ކަމަށް އެ ފަތުވާގައި ވަނީ ބުނެފައެވެ.
މިގޮތުން އެ މަޖިލީހުން ނެރުނު ފަތުވާގައި ބުނެފައިވަނީ މުސްލިމުންނާއި މުސްލިމުން ހަނގުރާމަ ކުރުމަކީ ކީރިތި ރަސޫލާ ގެ ސާފު ސަރީހަ ބަސްތަކުންވެސް ހަރާމް ކަމެއް ކަަމަށެވެ. އަދި މި ހަމަނުޖެހުންތަކަކީ އިސްލާމީ އުންމަތަށް ކުރިމަތިކުރައްވާފައިވާ ފިތުނައެއްކަމާއި، ފިތުނައެއް ކުރިމަތިވެއްޖެ ނަމަ އެކަމުން ސަލާމަތްވުމަށް އަމަލުކުރަންވީ ގޮތް ކީރިތި ރަސޫލާގެ ބަސްފުޅުތަކުގައިވާ ކަމަށްވެސް ފަތުވާގައިވެއެވެ.
މީގެ އިތުރުންވެސް އެ މަޖިލީހުން ބުނީ އިސްލާމީ ބައެއް ގައުމުތަކުގައި ހިނގަމުންދާ ދާޚިލީ ހަނގުރާމަ އަކީ އެގައުމުތަކާއި ދެކޮޅަށް ރޭވިގެން ހިންގާ ސިލްސިލާ މުއާމަރާތުތަކުގެ ބޮޅުތަކުގެ ތެރެއިން ބޮޅެއްކަމަށާއި އިސްލާމީ ގައުމަކަށް ނިސްބަތްވާ ބަޔަކު އެފަދަ އެހެން ގައުމަކަށް ޖިހާދު ކުރަން ދިޔުމަކީ މުސްލިމުގެ ދުޝްމަނުންގެ ކުރިމަތީގައި އިސްލާމީ ގައުމު ތަކާއި ބެހުމަށް ހުޅުވޭ ދޮރެއް ކަމަށެވެ.
މިވަގުތު ދާޚިލީ ހަނގުރާމަ ތައް ހިނގަމުންދާ އިސްލާމީ ގައުމުތަކުގައި ވެސް ޖިހާދު ކުރަން ބޭނުންވާ ކުޅަދާނަ ޒުވާނުން ތިބިކަމަށާއި އެހެންނަމަވެސް އެމީހުން އެދެނީ ހެޔޮ ދުޢާ ކަމަށާއި އިތުރު ބަޔަކު އަންނަން ބޭނުން ބޭނުންނުވާ ކަމަށް ވެސް އެ ފަތުވާގައި ވަނީ ބުނެފައެވެ.
ފަތުވާދޭ މަޖިލީހުން އިތުރަށް ބުނީ ސޫރިޔާ ފަދަ ބައެއް އިސްލާމީ ގައުމުތަކުގެ ހާލަތަށް ބަލާއިރު ޖިހާދު ކުރަން އެ ގައުމުތަކަށް ދިއުމަކީ އައިނިއްޔަ ފަރުޟަކަށް ނުވާ ކަމަށެވެ. ނަމަވެސް ކިފާޔަތުގެ ފަރުލެއް ކަމަށް ބަލައިފިނަމަ، ޖިހާދަށް ދިޔުމަށް ވަކި ޝަރުތުތަކެއް ހުންނަ ކަމަށް އިސްލާމީ ދުނިޔޭގެ ބޮޑެތި އިލްމުވެރިން އެއްބަސްވެވަޑައިގަންނަވާ ކަމަށެވެ.
މިފަދައިން ފަތުވާދޭ މަޖިލީހުން ބުނެފައިވާއިރު ސީރިއާގެ ދާހިލީ ހަނގުރާމައިގައި ހަރަކާތްތެރިވި 21 ދިވެއްސަކު މިދިޔަ އަންގާރަ ދުވަހު ރާއްޖެ ވަނީ ގެނެސްފައިއެވެ.
Advertisement
This content is created and paid for by advertisers and does not involve Voice Journalists
