ވެލައްސަރު ރިސޯޓު ކައިރީ ކަނޑުމަތިން ނިޔާވެފައި އޮތް ދިވެއްސަކު މިއަދު ފެނިއްޖެއެވެ.

ފުލުހުން ގެ މީޑިއާ އޮފިޝަލް ވިދާޅުވީ ވެލައްސަރު ރިސޯޓު ކައިރިން ކަނޑުމަތިން ނިޔާވެފައި އޮތް މީހަކު ފެނުނު ކަމުގެ ރިޕޯޓު ލިބިފައިވަނީ މިއަދު ހެނދުނު 9:11 ހާއިރު ކަމަށެވެ.

އަދި ނިޔާވެފައި އޮއްވައި ފެނިފައި ވަނީ ކ. އަތޮޅު ރިސޯޓެއްގައި މަސައްކަތް ކުރާ އުމުރުން 35 އަހަރުގެ ދިވެހި ފިރިހެނެއް ކަމަށް މިހާތަނަށް ބެލި ބެލުމުން އެނގިފައިވާ ކަމަށްވެސް އޮފިޝަލް ވިދާޅުވިއެވެ.

މީގެ އިތުރުން އޮފިޝަލް ވިދާޅުވީ ފުލުހުން މިހާރު ގެންދަނީ އެ މައްސަލަ ތަހުގީގު ކުރަމުން ކަމަށެވެ.