ރާއްޖޭގެ ހުރިހާ މިސްކިތްތަކުގެ އިމާމުން ތަމްރީން ކުރުމުގެ ގައުމީ މަޝްރޫއެއް އަންނަ ފެބްރުއަރީ މަހު ފަށަން ހަމަޖެހިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

މިކަމާއި ގުޅިގެން އެކްސްގައި ކުރެއްވި ޕޯސްޓެއްގައި ޝަހީމް ވިދާޅުވީ، މި މަޝްރޫއު އަންނަ މަހު ފެށިގެންދާ އިރު ފުރަތަމަ ޕްރޮގްރާމް އޮންނާނީ ގއ. އަތޮޅުގައި ކަމަށެވެ. އަދި އެ ޕްރޮގްރާމުގައި 77 އިމާމުން ބައިވެރިވާނެ ކަމަށް ޝަހީމް ވަނީ ވިދާޅުވެފައެވެ.

ޝަހީމް ވިދާޅުވެފައިވާ ގޮތުގައި، މި މަޝްރޫއުގެ މަގުސަދަކީ، ޒަމާނީ ދީނީ ގޮންޖެހުންތަކާއި އިލްމީ، އަހުލާގީ އަދި ފިގުހީ މައްސަލަތަކަށް އަމާޒުކޮށް ރާއްޖޭގައި ހުރިހާ އިމާމުން ތަމްރީން ކުރުވުމެވެ.

Advertisement

ރާއްޖޭގައި މިވަގުތު 800 އެއްހާ އިމާމުން އުޅޭ ކަމަށްވެސް އޭނާ ފާހަގަކުރެއްވިއެވެ.

އިމާމުން ތަމްރީނު ކުރުމުގެ ޚާއްސަ ޕްރޮގްރާމެއް ފަށަން ތައްޔާރު ވާއިރު، ސަރުކާރުން އަންނަނީ މާސްޓާސް ހަދާފައިވާ އިމާމުންނަށް ޕީއެޗްޑީ އަށް ކިޔެވޭނެ އިންތިޒާމު ހަމަޖެއްސުމަށް ވެސް މަސައްކަތް ކުރަމުންނެވެ.

އެގޮތުން ރާއްޖޭގެ މިސްކިތްތަކުގެ އިމާމުންގެ ތެރެއިން މާސްޓާސް ހާސިލްކޮށްފައިވާ ފަރާތްތަކަށް ބޭރުގެ ޔުނިވާސިޓީއަކުން ޕީއެޗްޑީ ހާސިލްކުރުމުގެ މަޝްރޫއެއް ވަރަށް އަވަހަށް ފައްޓަވާނެ ކަމަށްވެސް މިނިސްޓްރީން އިއުލާންކޮށްފައިވާއިރު، މިސްރާއި ސައުދީ އަރަބިއްޔާއާއި މެލޭޝިޔާއާއި ބުރޫނާއި އަދި އިންޑޮނޭޝިޔާއިން ތަމްރީނުގެ ފުރުސަތު އިމާމުންނަށް ހޯދައިދެއްވާނެ ކަމަށް މިނިސްޓަރު މީގެ ކުރިން ވިދާޅުވެފައި ވެއެވެ.