ހޮންގ ކޮންގ އިން ދިވެހިރާއްޖެއަށް ޑައިރެކްޓް ފްލައިޓްތައް މިއަދު ފަށަން ތައްޔާރުވެއްޖެއެވެ.
ޗައިނާގެ ބޮޑު ސިޓީއެއް ކަމަށްވާ ހޮންގ ކޮންގއިން ރާއްޖެއަށް އަންނަ ފުރަތަަމަ ފްލައިޓް، HX791 ރާއްޖޭގެ ވެލާނާ އިންޓަނޭޝަނަލް އެއާޕޯޓަށް ޖެއްސުމަށް ހަމަޖެހިފައިވަނީ މިރޭ 19:35ގައެވެ. އަދި އެ ފްލައިޓް އެނބުރި ހޮންގ ކޮންގ އަށްދާނީ މިރޭ 21:20 ގައެވެ.
މިއަދުން ފެށިގެން މި ދަތުރުތައް ކޮންމެ ބުދަ، ހުކުރު އަދި އާދީއްތަ ދުވަހަކު އޮޕަރޭޓްކުރުމަށް ހަމަޖެހިފަައި ވެެވެ.
މި އެއާލައިނުން މީގެ ކުރިންވެސް ރާއްޖެއަށް ދަތުރުތައް ކޮށްފައިވާއިރު، އެ ދަތުރުތައް ހުއްޓާލާފައި ވަނީ ކޮވިޑް-19އާ ގުޅިގެންނެވެ.
ހޮންގ ކޮންގ ޑައިރެކްޓް ފްލައިޓްތައް ރާއްޖެއަށް މިއަދު ފަށާއިރު, ޗައިނާގެ ސިޓީ ތަކުން ރާއްޖެއަށް ޑައިރެކްޓް ފްލައިޓްތައް ފަށަައި، އެގައުމުން ރާއްޖެއަށް އަންނަ ފަތުރުވެރިން އިތުރު ކުރުމަށް ދާދިފަހުން ރައީސުލްޖުމުހޫރިއްޔާ ޑރ މުހައްމަދު މުޢިއްޒު އެގައުމަށް ކުރެއްވި ދަތުރުފުޅުގައި ވަނީ އެދިވަޑައިގެންފަ އެވެ.
އަދި ރައީސުލްޖުމްހޫރިއްޔާގެ އެ އެދިވަޑައިގެންނެވުމާއި އެއްގޮތަށް، ރާއްޖޭގެ ފަތުރުވެރިކަމުގެ އެއް ނަންބަރު މާކެޓްގެ ގޮތުގައި ޗައިނާގެ މަރކެޓް ހެދުމަށް، ފުރިހަމައަށް މަސައްކަތް ކުރައްވާނެކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވާންގް ލީ ޒިންގް ވަނީ ދާދިފަހުން ބޭއްވި ނޫސްވެރިންގެ ބައްދަލުވުމުގައި ވިދާޅުވެފައެވެ.
އަދި އެގޮތުން ޗައިނާ އާއި ރާއްޖެއާއި ދެމެދު ޗާރޓަރ ދަތުރުތަކެއްވެސް އަންނަ ފެބްރުއަރީ 14ގައި ފަށާނެ ކަމަށް ސަފީރު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
