ނުކުޅެދުންތެރިކަން ހުންނަ މީހުންނަށް ވަޒީފާގެ ފުރުޞަތު ހޯދައި ދިނުމާއި ވަޒީފާ ދިނުމުގައި އަމަލު ކުރާނެ ގޮތުގެ ޤަވާއިދު އެކުލަވާލައިފިއެވެ.

މިނިސްޓްރީ އޮފް ފެމިލީ އެންޑް ސޯޝަލް އެންޑް ޑިވެލޮޕްމަންޓުން މިމަހު 18 ވަނަ ދުވަހު ގެޒެޓްކުރި https://gazette.gov.mv/gazette/6944 ޤަވައިދުގައި ބުނާގޮތުން މިޤަވާއިދުގެ މަޤުޞަދަކީ، ނުކުޅެދުންތެރިކަން ހުންނަ މީހުންނަށް، އެހެން މީހުންނެކޭ އެއްފަދައިން އެމީހަކު އިޚްތިޔާރުކުރާ ވަޒީފާއެއް އަދާކުރުމުގައިއާއި މަސައްކަތް ކުރުމުގަައި، ވަޒީފާގެ މައިދާނުގައި ހަމަހަމަ ފުރުޞަތު ހޯދައި ދިނުމެވެ.

އަދި ހަމައެއާއެކު ވަޒީފާދިނުމުގައި މަސައްކަތުގެ މާހައުލުގައި ނުކުޅެދުންތެރިކަން ހުންނަ މީހުންނަށް އެމީހުންގެ ކިބައިގައި ހުރި ނުކުޅެދުންތެރިކަމެއްގެ ސަބަބުން އެއްވެސް ފަރާތަކުން އެމީހުންނާއި މެދު ތަފާތުކުރުން ގެންގުޅުން މަނާކުރުމާއި، ނުކުޅެދުންތެރިކަން ހުންނަ މީހަކަށް ވަޒީފާދޭ ފަރާތަކުން، އެފަރާތަށް މަސައްކަތްކުރާނެ އެކަށީގެންވާ މާހައުލެއް ޤާއިމްކޮށްދިނުމާއި، މަސައްކަތުގެ މާހައުލުގައި އެފަރާތްތައް ޝާމިލްކުރާނެ އުސޫލުތައް ކަނޑައެޅުމެވެ.

މި ގަވާއިދުގައި ބުނާގޮތުން ނުކުޅެދުންތެރިކަން ހުންނަ މީހާއަށް ވަޒީފާދޭ ތަނަކީ އެ ފަރާތަށް ބޭނުންވާ ސަބަބުވެރި ބަދަލުތައް ހަމަޖައްސައިދެވޭ، އެތަނުގެ މުވައްޒަފުންނަކީ ނުކުޅެދުންތެރިކަން ހުންނަ މީހުންނާއެކު މަސައްކަތް ކުރުމަށް ބޭނުންވާ ތަމްރީން ފުރިހަމަ ކޮށްފައިވާ އިދާރާއަކަށް ވާންޖެހެއެވެ. 

މީގެ އިތުރުން ގަވާއިދުގައި ވާ ގޮތުން،  ނުކުޅެދުންތެރިކަން ހުންނަ ފަރާތަކުން ވަޒީފާއަށް އެދުމުން ނުކުޅެދުންތެރިކަން ހުންނަ މީހުންނާ ގުޅޭ ކަންކަން ވިލަރެސް ކުރުމަށް، މަދުވެގެން 2 (ދޭއް) ޑިސްއެބިލިޓީ ލިޔޭޒަން އޮފިސަރުން ބައިތިއްބަންވާނެއެވެ.

އަދި ނުކުޅެދުންތެރިކަން ހުންނަ މީހުންނަށް ވަޒީފާ ދިނުމުގައި ބޭނުންވާ ފަންނީ ލަފާދޭ ކޮމިޓީއެއްވެސް އެކުލަވާލަން ޖެހެއެެވެ. މި ކޮމިޓީ އެކުލަވާލުމުގެ ބާރު ދީފައި ވަނީ، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ވަޒީރަށެވެ. އެހެންކަމުން އެ ކޮމިޓީގެ އިދާރީ މަސައްކަތް ވެސް ކުރާނީ އެ ކޮމިޓީންނެވެ. 

މި ގަވާއިދަށް ޢަމަލުކުރަން ފަށާނީ އަންނަ މަހުގެ 18 ވަނަ ދުވަހުން ކަމަށް ގަވާއިދުގައި ވެއެވެ. 

ނުކުޅެދުންތެރިކަން ހުންނަ މީހުންނަށް ވަޒީފާ ދިނުމުގައި އަމަލުކުރާނެގޮތުގެ ޤަވައިދު އެކުލަވާލާފައި ވާއިރު އެފަދަ ފަރާތްތަކަށް ފަހިވާނެ ގޮތަށް، ޕްލޭނިންގ އަދި ކޮންސްޓަރަކްޝަންއާ ގުޅޭ ގަވާއިދަށް ގެންނަންޖެހޭ ބައެއް ބަދަލުތައް ވޭހާވެސް އަވަހަށް ގެނައުމަށް ސަރުކާރުން ވަނީ ނިންމާފައެވެ.