ރައީސުލްޖުމުހޫރިއްޔާ ޑރ. މުހައްމަދު މުއިއްޒުގެ ހާއްސަ މެސެޖަކާއި އެކު، މާލޭ ބިންވެރިންގެ ސައްލާ މިރޭ ބާއްވަން ނިންމައިފި އެވެ.
މި ސައްލާ މިބާއްވަނީ، ގިރާވަރު މާލެ ސިޓިޒަންސް އެސޯސިއޭޝަން، ގުޅީފަޅު ރައްޔިތުންގެ އެސޯސިއޭޝަން، މާލެ ރަށްވެހިންގެ ޖަމިއްޔާ، އަދި ހުޅުމާލެ ރައްޔިތުންގެ ޖަމިއްޔާ ތަމްސިލްކުރައްވާ ސުނާދު ލަތީފް ރައީސް ޑރ. މުއިއްޒާއި ބައްދަލު ކުރައްވާ ލިބުނު މަޢުލޫމާތުތައް ހިއްސާ ކުރެއްވުމަށް ކަމަށް އޭނާ ވިދާޅުވެއެވެ.
އެގޮތުން ގިރާވަރު މާލެ ސިޓިޒަން އެސޯސިއޭޝަންގެ ނައިބު ރައީސްކަން ވެސް ކުރައްވާ ސުނާދު، ރައީސް ޑރ. މުއިއްޒާ ބައްދަލުކުރެއްވުމަށް ފަހު، އެކްސްގައި ކުރެއްވި ޕޯސްޓެއްގައި ވިދާޅުވީ، މާލޭގެ މީހުންނަށް ދޫކޮށްފައިވާ ބިންތަކާ ގުޅޭގޮތުން ވަރަށް އަގުހުރި ވާހަކަތަކެއް ދެކެވުނު ކަމަށާއި، އަދި އޮޅުން އަރާ ގިނަ ކަންކަމުގެ މައުލޫމާތުތަކުގެ ހަގީގަތް ރައީސްގެ ފަރާތްޕުޅުން އެނގިވަޑައިގެންނެވި ކަމަށެވެ.
ސުނާދު ވިދާޅުވީ، މާލެ ރައްޔިތުންގެ ގޯތިތަކާއި ގުޅޭގޮތުން ރައީސް ޑރ. މުއިއްޒު ދެއްވި މެސެޖު މިރޭ އޮންނަ ބައްދަލުވުމުގައި ހާމަކުރައްވާނެ ކަމަށެވެ.
މި ބައްދަލުވުން ބޭއްވުމަށް ހަމަޖެހިފައިވަނީ މިރޭގެ 8.00 ގައި ސަލްޓަން ޕާރކުގައެވެ.
މިރޭ މި ފަދަ ސައްލާއެއް ބޭއްވުމަށް ހަމަޖެހިފައިވާ އިރު ނިމިދިޔަ ސަރުކާރު ނިމެމުން ދަނިކޮށް މާލޭގެ ރައްޔިތުންނަށް ދޫކުރި ގޯތިތަކުގެ ރަޖިސްޓްރީ، އެ ގޯތިތަކުގެ ހައްޤުވެރި ފަރާތްތަކާއި ހަވާލުކުރުމުގެ މަސައްކަތް މި ސަރުކާރުގެ ފަރާތުން މިހާރު ވަނީ ފައްޓަވާފައެވެ.
Advertisement
This content is created and paid for by advertisers and does not involve Voice Journalists
