ގެވެށި އަނިޔާއިން ރައްކާތެރިވުމުގެ އަމުރަކަށް އެދޭއިރު ފެމިލީ ކޯޓަށް ދައްކަންޖެހޭ 25 ރުފިޔާގެ ފީ ދައްކަން ނުޖެހޭ ގޮތަށް ހަމަޖައްސައިފިއެވެ.

މިކަން އިއުލާންކޮށްފައިމ ވަނީ ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް، "ޤަޟާއީ އައު އަހަރަށާއި 25 ރުފިޔާގެ ޑިސްކައުންޓަށްޓަކައި މަރްޙަބާއާއި ޝުކުރު" ގެ ނަމުގައި ލިޔުއްވި ބްލޮގް ގައެވެ.

މި ބްލޮގްގައި ޕީޖީ ވިދާޅުވީ އަނިޔާލިބޭ މީހުންނަށް ޚިދުމަތްތައް ހޯދުމުގައި ހުރި ދަތިތައް ފިލުވައިދީ، ހުރިހާ އިދާރާތައް ގުޅިގެން، ދުނިޔޭގެ ފެންވަރުގެ ވިކްޓިމް ސަޕޯޓް ނިޒާމެއް ކުރެވޭނެ ގޮތަކާބެހޭ ގޮތުން ދައުލަތުގެ އިދާރާތަކާއި އަމިއްލަ ޖަމާޢަތްތަކާއެކު ނިމިދިޔަ އަހަރުގެ ތެރޭގައި މަޝްވަރާ ބައްދަލުވުމެއް ބާއްވައި، ޢަމަލީ ގޮތުން ކަންތައްތަކެއް ކުރުމަށް އެއްބަސްވެފައިވާކަމަށެވެ.

Advertisement

ދިމާވި އިދާރީ ސަބަބަކާހުރެ ފެމިލީ ކޯޓަށް މިބައްދަލުވުމުގައި ބައިވެރިނުވެވުނަސް، އެކޯޓުންވެސް މިމަސައްކަތަށް ފުރިހަމައަށް އެއްބާރުލުން ދޭކަމަށް ވެސް ޕީޖީ ފާހަގަކުރެއްވިއެވެ.

މި ބައްދަލުވުމުގައި މި މައްސަލަ ހުށައަޅާފައި ވަނީ ފެމިލީ ޕްރޮޓެކްޝަން އޮތޯރިޓީއިންނެވެ.

ގެވެށި އަނިޔާއިން ރައްކާތެރިވުމުގެ އަމުރަކަށް އެދޭއިރު ފެމިލީ ކޯޓަށް ދައްކަންޖެހޭ 25 ރުފިޔާގެ ފީ ދައްކަންޖެހެނީ ބަނޑޭރި ޕޯޓަލް މެދުވެރިކޮށް ކަމަށްވާތީ އެކަމަށް އިންޓަނެޓާއި އެނޫންވެސް ވަޞީލަތްތައް ބޭނުންވެއެވެ. އެހެންކަމުން ގެވެށި އަނިޔާއިން ރައްކާތެރިވުމުގެ އަމުރެއް ހޯދުމަށް އެދި ހުށަހަޅާ މީހާ، ޢާންމުކޮށް ހުންނާނެ ނިކަމެތި ޙާލަތަށް ވިސްނައި، މި ފީ ނުދައްކާގޮތަށް ބަދަލުކުރުމަކީ  މުހިންމުކަމެއްކަމަށް ހުރިހާ އިދާރާތަކުންވެސް އެއްބަސްވެފައިވާ ކަަމަށް ޕީޖީ ޝަމީމް ގެ ބްލޮގްގައިވެއެވެ.

މި މައްސަލައާއި ބެހޭގޮތުން މަޝްވަރާކުރުމަށް ޕީޖީ ޝަމީމް ވަނީ ފެމިލީ ކޯޓާއި އެކު ބައްދަލުވުމެއް ބާއްވާފައެވެ. މި ބައްދަލުވުން ބޭއްވުމުގެ ކުރިންވެސް މިކަން ވަނީ ކޯޓުގެ ސަމާލުކަމަށް އައިސް، ފަނޑިޔާރުންގެ މަޖިލީހުން އެ 25 ރުފިޔާ ކަނޑާލަން ނިންމަވާފައި ކަމަށާއި، ދެން އޮތީ އެކަން ތަންފީޒުުކުރުންކަމަށް ވެސް ކޯޓުން ބުނެފައިވާ ކަމަށް ވިދާޅުވިއެވެ.

ފެމިލީ ކޯޓުގެ ފަނޑިޔާރުންގެ މަޖިލީހުން ވަނީ މިމަހުގެ 18 ވަނަ ދުވަހުން ފެށިގެން އާންމުކުރި ގެވެށިއަނިޔާއިން ރައްކާތެރިވުމުގެ އަމުރަށް އެދޭ ފޯމުގައި ފީ ނެގުން ނުހިމަނައި، އަމުރަށް އެދި ހުށަހަޅާ ފޯމު 14 ޞަފުހާއިން 6 ސަފްޙާއަށް ވަނީ މަދުކޮށްފައެވެ.

މީގެ ކުރީގައި، ފޯމާއެކު ހުށަހަޅަންޖެހޭ ލިޔުމެއް ނެތްނަމަ، ފޯމު ބަލައެއް ނުގަންނަ ގޮތަށް އުސޫލު އޮތް ނަމަވެސް، ގެވެށި އަނިޔާގެ ރައްކާތެރިކަމަށް އެދޭ މީހާ ހުންނާނެ ޙާލަތަށް ރިޢާޔަތްކުރާއިރު، ބައެއްފަހަރު ހުރިހާ ލިޔުންތައް އޭނާގެ އަތުގައި ނެތިދާނެތީ ފެމިލީ ކޯޓުން ވަނީ އެފޯމާއެކު ހުށަހަޅަންޖެހޭ ލިޔުމެއް ހުށަހެޅެން ނެތް ޙާލަތެއް އޮތްނަމަ، އެކަމެއް ކޯޓުގެ ސަމާލުކަމަށް ގެނައުމަށް އެދިފައެވެ. 

މިކަން އިތުރަށް ފަސޭހަކޮށްދިނުމަށްޓަކައި، ގެވެށި އަނިޔާއިން ރައްކާތެރިކުރުމުގެ އަމުރަށް އެދޭ ފޯމު، ޕީޖީ އޮފީހުގެ ޕޯޓަލްގެ ތެރެއިން ފުރޭނޭ ގޮތް ދާދި އަވަހަށް ހަމަޖައްސާނެ ކަމަށް ޕީޖީ ވިދާޅުވިއެވެ. މި ޚިދުމަތަށް ވަދެވޭނީ އީފާސް މެދުވެރިކޮށް ކަމަށްވާތީ، ފޯމުގައި ފުރަންޖެހޭ ގިނަ ބައިތައް އޮޓޮމެޓިކުން ހުންނާނީ ފުރާފައި ކަަމަށާއި ދެން ހުންނާނީ ލިޔަންޖެހޭ މަދު ބައިތައް ކަމަށް ވެސް ޕީޖީ ޝަމީމް ގެ ބްލޮގް ގައި ވަނީ ވިދާޅުވެފައެވެ.

އެހެންކަމުން،  އަނިޔާލިބޭ މީހާ، ރައްކާތެރި ތަނަކަށް ދެވުމުން، އޮންލައިން ފޯމު ފުރާލުމަށްފަހު، ޕީޖީ އޮފީހުގެ އޮންލައިން ޕޯޓަލްގެ ތެރެއިން ފޮނުވާލުމުން، އޭނާ އެދޭ ކޯޓެއްގެ އީމެއިލަކަށް ޕީޖީ އޮފީހުން އެ ފޯމު ފޮނުވައި ދިނުމުގެ ޚިދުމަތް ފޯރުކޮށްދީ އަނިޔާ ލިބޭ މީހާ އެ ފޯމު ހިފައިގެން ކޯޓު ދޮށަށް ހިނގަންޖެހުން އެއްކޮށް ނިމުމަކަށް އައިސް، އަމުރު ހޯދުމަށް އެދުމުގެ ކަންކަން އިންތިހާއަށް ފަސޭހަކޮށްދެވޭނެކަމުގެ ޔަގީން ކަން ޕީޖީ ވަނީ އަރުވާފައެވެ.