މާދަމާ ފަށަން ހަމަޖެހިފައިވާ ފަނޑިޔާރުންގެ މަހާސިންތާ 2024 ފެށުމުގެ ރަސްމިއްޔާތުގައި ބައިވެރިވެވަޑައިގަތުމަށްޓަކައި ބަންގްލަދޭޝްގެ އުއްތަމަ ފަނޑިޔާރު އުބައިދުލް ހަސަން ރާއްޖެ ވަޑައިގެންނަވައިފިއެވެ.
ދެ ދުވަހުގެ މުއްދަތަށް ބަންގްލަދޭޝްގެ އުއްތަމަ ފަނޑިޔާރު އުބައިދުލް ހަސަން ކުރައްވާ މި ދަތުރުފުޅަކީ ދިވެހި ރާއްޖޭގެ އުއްތަމަ ފަނޑިޔާރު އަލްއުސްތާޒު އަހުމަދު މުއުތަސިމް އަދުނާންގެ ދައުވަތަކަށް ކުރައްވާ ދަތުރުފުޅެކެވެ.
އުބައިދުލް ހަސަން ރާއްޖެ ވަޑައިގެންނެވުމުން ރާއްޖޭގެ އުއްތަމަ ފަނޑިޔާރުގެ ފަރާތްޕުޅުން ސުޕްރީމް ކޯޓުގެ ފަނޑިޔާރު ޑރ. އިބްރާހިމް މުހައްމަދާއި، ޗީފް ޖުޑީޝަލް އެޑްމިނިސްޓްރޭޓަރު އަލްއުސްތާޒާ އައިޝަތު ރިޒްނާއާއި، ޝަރުއީ ދާއިރާގެ އިސް ބައެއް ބޭފުޅުން ވެލާނާ އިންޓަނޭޝަނަލް އެއަރޕޯޓުން އެމަނިކުފާނަށް ވަނީ މަރުހަބާ ވިދާޅުވެފައެވެ.
މި ދަތުރުފުޅުގައި އެބޭފުޅާ ވަނީ ފަނޑިޔާރުންގެ މަހާސިންތާ 2024 ގައި ވާހަކަދެއްކުމަށް ހަމަޖެހިފައިކަމަށް ސުޕްރީމް ކޯޓުން މައުލޫމާތު ދެއެވެ.
3 ދުވަހުގެ މުއްދަތަށް ކުރިއަށްދާ މި ކޮންފަރެންސްގައި ރާއްޖޭގެ އެކި ހިސާބުތަކުން 66 އަށް ވުރެ ގިނަ ފަނޑިޔާރުން ބައިވެރިވާނެއެވެ.
ފާއިތުވި އަހަރުގެ ތަޖުރިބާގެ އަލީގައި އަލަށް ފަށާ ގަޟާއީ އަހަރަކީ ކާމިޔާބު އަހަރަކަށް ހެދުމުގެ މަގުސަދުގައި ބާއްވާ މި މަހާސިންތާގައި މި އަހަރަށް ކަނޑައަޅާ ލަނޑުދަނޑިތަކާއި އެ ލަނޑުދަނޑިތައް ހާސިލް ކުރަން އެކަށީގެންވާ ގޮތެއްގައި މަސައްކަތް ކުރާނެ ގޮތްތަކާ މެދު މަޝްވަރާ ކޮށް،ޝަރުއީ ދާއިރާއަށް ކުރިމަތިވެފައިވާ ގޮންޖެހުންތައް ދެނެގަނެ އެ ކަންކަން ހައްލު ކުރުމަށް ކުރެވޭނެ ކަންކަމާ ގުޅޭގޮތުން މަޝްވަރާ ކުރުމަށް ވެސް ވަނީ ހަމަޖެހިފައެވެ.
Advertisement
This content is created and paid for by advertisers and does not involve Voice Journalists
