މީޑިއޭޝަންގެ ސަބަބުން އަޑުއެހުމަކަށް ނުގޮސް، މައްސަލަތައް ނިންމުމުގައި އަވަސްވެ، ފަސޭހައިން ނަތީޖާ ނެރެވޭ ކަމަށް އުއްތަމަ ފަނޑިޔާރު އަލްއުސްތާޛް އަޙްމަދު މުޢުތަޞިމް ޢަދުނާން ވިދާޅުވެއްޖެއެވެ.

އެބޭފުޅާ މިފަދައިން ވިދާޅުވީ ފަނޑިޔާރުންގެ މަހާސިންތާ 2024 ފެށުމަށް ސުޕްރީމް ކޯޓުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މިގޮތުން އުއްތަމަ ފަނޑިޔާރު މުޢުތަޞިމް ވިދާޅުވީ ރާއްޖޭގައި މީޑިއޭޝަންގެ ނިޒާމު ކޯޓުތަކުގައި ބޭނުންކުރަން ފަށާފައިވަނީ 2000ގެ ކުރީގެ އަހަރުތަކުގައި ކަމަށާއި ޢާއިލީ މައްސަލަތައް ހައްލުކުރުމަށް ސިވިލް ކޯޓުގައި މީޑިއޭޝަން ބޭނުންކުރައްވާފައިވާކަމަށެވެ.

މީގެ އިތުރުންވެސް އުއްތަމަ ފަނޑިޔާރު މުޢުތަޞިމް ވިދާޅުވީ މީޑިއޭޝަން ފުޅާވެ ބޭނުންކުރަން ފެށިފަހުން، 2015 އިން 2021 ވަނަ އަހަރާއި ހަމައަށް ސިވިލް ކޯޓަށް ހުށަހެޅުނު 22،987 މައްސަލާއިގެ ތެރެއިން 17،101 މައްސަލަތަކުގައި އަޑުއެހުމަކަށް ދިޔުމުގެ ކުރިން މީޑިއޭޝަން ބޭނުންކޮށްފައިވާ ކަމަށެވެ. 

މި 17،101 މައްސަލައިގެ ތެރެއިން 62 އިންސައްތަ މައްސަލަ ނިމިފައިވަނީ  އަޑުއެހުމަކަށް ނުގޮސް، ހަމައެކަނި މީޑިއޭޝަނުން ކަމަށް ވެސް ވިދާޅުވިއެވެ.

ފަނޑިޔާރުންގެ މަހާސިންތާއަކީ ފަނޑިޔާރުންނަށް ދިމާވާ އެކި ކަންކަމާއިމެދު ބަހުސްކޮށް، ކުރިއަށްއޮތް އަހަރު، މި މައްސަލަތަކަށް ހައްލު ހޯދޭނެ ގޮތްތަކާއި ގުޅޭގޮތުން މަޝްވަރާކުރުމަށް ބާއްވާ މަހާސިންތާއެކެވެ. މި މަހާސިންތާގައި މީޑިއޭޝަނާއި، މަދަނީ އިޖުރާއަތުގެ ޤާނޫނުތަކާއި، ހެއްކާބެހޭ ޤާނޫނުތަކާއި ގުޅޭގޮތުން ފަނޑިޔާރުން މަޝްވަރާ ކުރައްވާނެއެވެ.

މީގެ ތެރެއިން މީޑިއޭޝަނަކީ ކޯޓު އަޑުއެހުމަކަށް ނުގޮސް ހައްލުކުރެވެންހުރި މައްސަލަތައް، މައްސަލަ ޖެހޭ ދެމީހުންގެ މެދުގައި ވާހަކަދައްކާއިގެން، ހައްލަކާއި ހިސާބަށް ދިޔުމެވެ.