މާލެ ސަރަހައްދުން ގޯތި ލިބިފައިވާ އެއްވެސް މީހެއްގެ އަތުން ގޯތި އަތުނުލާނެ ކަމަށާ ގޯތި ލިބުނު ތަން ބަދަލު ނުކޮށް އެ ތަންތަނުގައި ދިރިއުޅެވޭނެ ގޮތް ހައްދަވައިދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފި އެވެ.

ރައީސް މުޢިއްޒު މި ޔަގީންކަން ދެއްވިކަން ހާމަކުރެއްވީ މާލެ ސަރަހައްދުން ބިން ލިބުނު މީހުންނަށް ހާއްސަކޮށްގެން ރޭ ބޭއްވި މާލޭ ބިންވެރީންގެ ސައްލާ ގައެވެ. މި ސައްލާ ބާއްވާފައި ވަނީ ގިރާވަރު މާލެ ސިޓިޒަންސް އެސޯސިއޭޝަން އާއި ގުޅީފަޅު ރައްޔިތުންގެ އެސޯސިއޭޝަނާއި މަލެ ރަށްވެހީންގެ ޖަމިއްޔާ އަދި ހުޅުމާލެ ރައްޔިތުންގެ ކޮމެޓީ ގުޅިގެންނެވެ.

ބިންވެރިންގެ ސައްލާގައި ވާހަކަ ދައްކަވަމުން އެ ސައްލާގައި ބިންވެރިން ތަމްސީލް ކުރެއްވި ޖަމިއްޔާތަކުގެ މަންދޫބެއްގެ ގޮތުގައި ބައިވެރިވީ ސުނާދު ލަތީފް ވަނީ އެ ޖަމިއްޔާ ތަކުން ރައީސް މުޢިއްޒު އާއިއެކު ބޭއްވި ބައްދަލުވުމުގެ އެމަނިކުފާނު ބިންވެރިންނަށް ދެއްވި މެސެޖު ހިއްސާ ކުރައްވާފައެވެ. 

އެގޮތުން، ގޯތީގެ ރަޖިސްޓްރީ ދޫކުރުމުގެ މަސައްކަތް މިހާރު ގޮސްފައިވާ ހިސާބެއް ބައްލަވާނެ ކަމަށާ ވީހާވެސް އަވަހަށް ރަޖިސްޓްރީ ދޫކޮށް ނިމޭނެ ގޮތްތަކެއް ހޯއްދަވާނެ ކަމަށް ރައީސް ވިދާޅުވެފައިވާ ކަމަށާ، ގޯތި ލިބުނު ކަމަށް ގެޒެޓް ކުރި މީހުންނަށް ރަޖިސްޓްރީ ދިނުމުގެ ކުރީން އެކަމުގެ ލިޔުމެއް ދިނުމަކީ މުހިންމު ކަމެއް ކަމަށް ދެކެވަޑައިގަންނާވާ ކަމަށް ރައީސް ވިދާޅުވި ކަމަށް ވެސް ބުނެފައިވެ އެވެ.

އަދި ގޯތި ލިބުނު ތަންތަން ބަދަލު ނުކުރާނެ ކަމަށާ އެއްވެސް މީހެއްގެ އަތުން ގޯތި އަތުނުލާނެ ކަމުގެ ޔަގީންކަން ރައީސް މުއިއްޒު ތަކުރާރުކޮށް ދެއްވާފައިވާ ކަމަށް ވެސް ބުނެފައިވެ އެވެ. 

މި ބައްދަލުވުމުގައި ރައީސްގެ މަންދޫބެއްގެ ގޮތުގައި ވާހަކަ ދައްކަވަމުން ރައީސް އޮފީހުގެ އަންޑާ ސެކެޓްރީ ފޯ ޕަބްލިކް ޕޮލިސީ މުޙައްމަދު ފިރުޒުލް އަބްދުالله ހަލީލު ވެސް ވަނީ ސުނާދުގެ، އެ ވާހަކަ ތަކަށއ ބާރު ދެއްވައި ބިން ލިބުނު ތަންތަނުން ބިން ދެއްވާނެ ކަމުގެ ޔަގީންކަން ދެއްވައި، ރަޖިސްޓަރީ ހަވާލުކޮށް، އެތަން ތަނުގައި އަސާސީ އެހެނިގެން ޚިދުމަތްތައް ގާއިމް ކޮށްދެއްވާނެ ކަމުގެ ޔަގީންކަންވެސް ދެއްވާފައެވެ.

ކުރީ ސަރުކާރުން ވަނީ މާލެ ރައްޔިތުންނަށް ގޯތި ދޭން ވީ ވަޢުދު ފުއްދާފައި ވަނީ ދައުރު ނިމެން ކުޑަތަން ވެފައި ވަނިކޮށެވެ. އެހެންކަމުން، ދިން ގިނަ ގޯތިތައް ދީފައިވަނީ ނުހިއްކާ ހުރި ފަޅުތަކުން ކަމަށްވެސް ފާހަގަކޮށްލަންޖެހެއެވެ.

ނަމަވެސް މިސަރުކާރުން އަންނަނީ ހަލުއި ދުވެލީގައި އެ ގޯތި ދީފައިވާ ހުރިހާ ތަނެއްވެސް ހިއްކައި ރެޖިއްޓްރީ ހަވާލު ކުރުމުގެ މަސައްކަތް ކުރަމުންނެވެ. އަދި އެ ހުރިހާ ތަނެއް ހިއްކުމުގެ މަސައްކަތް އަންނަ އޮކްޓޫބަރު މަހުގެ ނިޔަލަށް ނިންމުމަށްވެސް ސަރުކާރުން މަސައްކަތް ކުރަމުންދާ ކަމަށް ފިރުޒުލް ވިދާޅުވި އެވެ.

އަދި ކުރީ ސަރުކާރުން ގުޅިފަޅާއި ގިރާވަޅުފަޅުން ހިއްކަން ހަމަޖެހިފައި އޮތް ސަރަހައްދަށް ވުރެ ބޮޑު ސަރަހައްދެއް ހިއްކަން މިސަރުކާރުން ނިންމާފައިވާކަންވެސް ރައީސުލްޖުމުހޫރިއްޔާ ދާދިފަހުން އިއުލާން ކުރައްވާފައި ވެއެވެ.