އެމެރިކާގެ އިންޑޯ ޕެސިފިކް ކޮމާންޑްގެ ކޮމާންޑަރު އެޑްމިރަލް ޖޯން އެކުއިލީނޯއާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްދަލުކުރައްވައިފިއެވެ.

ކޮމާންޑަރ އެޑްމިރަލް ޖޯން އެކުއިލީނޯ ވަނީ ރާއްޖެ ވަޑައިގެން، މިއަދު ހެނދުނުގެ ވަގުތެއްގައި ރައީސް ޑރ. މުހައްމަދު މުއިއްޒާ ބައްދަލުކުރައްވައި, ރައީސް ޑރ.މުއިއްޒު ރައީސުލްޖުމްހޫރިއްޔާ މަގާމާ ހަވާލުވެވަޑައިގެންނެވުމާ ގުޅިގެން އެކަމަށްޓަކައި މަރުޙަބާ ވިދާޅުވެފައެވެ. އަދި ދިވެހިރާއްޖެއާއި އެމެރިކާއާ ދެމެދު އޮންނަ ޒަމާންވީ ގާތްގުޅުމަށް ވެސް އެބޭފުޅާ ދެއްކެވި ވާހަކަފުޅުގައި ވަނީ އަލިއަޅުވާލައްވާފައެވެ.

މީގެ އިތުރުންވެސް ކޮމާންޑަރ އެޑްމިރަލް ޖޯން އެކުއިލީނޯ ވަނީ ރާއްޖޭގެ ޤައުމީ ދިފާޢީ ބާރުގެ ފެންވަރުމަތިކޮށް ވަސީލަތްތައް ބިނާކުރުމަށް ކުރަމުންދާ މަސައްކަތަށް އެމެރިކާގެ ފުރިހަމަ އެއްބާރުލުން ލިބޭނެ ކަމުގެ ޔަގީން ކަން ރައީސް ޑރ.މުއިއްޒަށް އަރުވާފައެވެ. 

Advertisement

މީގެ އިތުރުންވެސް، ސުލްހަ މަސަލަސްކަން ގާއިމުކުރުމަށާއި، ރާއްޖޭގެ އިސްތިގުލާލު ރައްކާތެރިކުރުމުގައި އެއްބާރުލުން ދިނުމަށާއި، އަދި އިތުރު ދާއިރާތަކުން ރާއްޖެއާއި އެމެރިކާއާއި ދެމެދު ގުޅުން ބަދަހިކުރުމާއި ގުޅޭގޮތުންވެސް ވަނީ މަޝްވަރާ ކުރައްވާފައެވެ.

މި ބައްދަލުވުމުގައި ރައީސް ޑރ.މުއިއްޒު ވަނީ ވަސީލަތްތައް ބިނާކުރުމާއި އަދި ރާއްޖޭގެ ގައުމީ ދިފާއީ ބާރުގެ ބޭފުޅުން ތަމްރީނުކުރުމަށް އެމެރިކާ ސަރުކާރުން ވެދެއްވާ އެހީތެރިކަން ޝުކުރުވެރިކަމާއެކު ފާގަކުރައްވާފައެވެ.