ރާއްޖޭގައި ތިބި އިންޑިއާ ސިފައިން ބޭލުމަކީ ފަސޭހަކަމެއް ނޫން ކަމަށް ރައީސް ޑރ.މުހައްމަދު މުއިއްޒުގެ  ސަރުކާރުން ބުނާތީ ނާއުންމީދު ވެފައިވާ ކަމަށް ކުރީގެ ރައީސް އަބްދުالله ޔާމީން ޢަބުދުލް ޤައްޔޫމް ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވެފައިވަނީ ޕީޕީއެމްއާ ދުރަށް ވަޑައިގެން އެ މަނިކުފާނު އުފައްދަވަން މަސައްކަތް ކުރައްވަމުން ގެންދަވާ ޕީޕަލްސް ނެޝަނަލް ފްރަންޓު (ޕީއެންއެފް) އިން ރޭ ބޭއްވި ޖަލްސާގައި ބައިވެރިވެ ވަޑައިގެންނެވެ.

ރައީސް ޔާމީން މިވަގުތު ހުންނެވީ 11 އަހަރުގެ ޖަލު ހުކުމް ތަންފީޒުކުރެއްވުމުން އެމަނިކުފާނަށް ޕޯޑިއަމަށް އަރާ ވާހަކަ ނުދެއްކެވޭނެތީވެ ، އެ މަނިކުފާނުގެ ގާނޫނީ ވަކީލު ޑރ. މުހައްމަދު ޖަމީލު އަހްމަދު އެ ޖަލްސާގައި ވާހަކަދެއްކެވުމަށް ފަހު، އެ ތަނުގައި ތިބި މީހުންނަށް ސުވާލުކުރަން ދިން ފުރުސަތުގައި ޔާމީން ދެ ކަމަކާ ގުޅޭ ގޮތުން ޖަމީލުގެ ހިޔާލު ހޯދުމަށް ސުވާލުކުރެއްވި އެވެ.

އެގޮތުން ރައީސް ޔާމީން ފާހަގަކުރެއްވި ދެކަމަކީ  ކުރިއަށް އޮތް މަޖިލިސް އިންތިހާބު ރޯދަމަސް ތެރޭ ބޭއްވުމާ ގުޅޭ ގޮތުންނާއި އަދި އިންޑިއާ ސިފައިންގެ މައްސަލާގައި މި ސަރުކާރުން ކުރާ މަސައްކަތްތަކާ ގުޅޭ ގޮތުންނެވެ.

އޭގެތެރެއިން އިންޑިޔާ މައްސަލާގައި ޔާމީން ފާހަގަ ކުރެއްވި ގޮތުގައި މި ސަރުކާރު ވެރިކަމަށް އައީ އިންޑިއާ ސިފައިން ބޭލުމުގެ ވައުދާ އެކުގައި ކަމަށާއި، ވެރިކަމާ ހަވާލުވުމަށް ފަހު، ފުރަތަމަ ދުވަހު ވެސް އިންޑިއާ ސިފައިން ބޭލުމުގެ މަޝްވަރާތައް ކޮށް، އިންޑިއާ ސިފައިން ބޭލުމަށް އިންޑިއާގައި އެދިފައިވާ ކަމަށް ސަރުކާރުން ބުނެފައިވާ ކަމަށެވެ.

އެކަމުގެ ތަފުސީލް ދެއްވަމުން ރައީސް ޔާމީން އިތުރަށް ވިދާޅުވީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ މިނިސްޓަރު އަބްދުالله ނާޒިމް އިންޑިއާ ސިފައިން ބޭލުމަކީ އެހާ ފަސޭހަކަމެއް ނޫންކަމަށް ވިދާޅުވެފައިވާ ކަމަށާއި، އަދި ހަމަ އެއާއިއެކު އަންނަ މާރޗުމަހުގެ 15 ނިޔަލަށް އިންޑިއާ ސިފައިން ބޭލުމަށް ދިވެހި ސަރުކާރުން މުއްދަތެއް ދީފައިވާ ކަމަށް ވިދާޅުވި ނަމަވެސް އެފަދަ އެއްވެސް މަޝްވަރާއެއް އަދި އެއްގުމެއްވެސް އިންޑިއާއަށް އަންގާފައި ނުވާކަމަށް އެ ޤައުމުން ބުނާކަމަށެވެ.  

"އަޅުގަނޑު ދަންނަވާލަން ބޭނުންވަނީ މިގޮތަށް އިންޑިއާ ސިފައިން ބާލަން އަޅުގަނޑުމެން ވަރަށް ހިތްވަރާ އެކީގައި އައި ސަރުކާރެއް. ސަރުކާރުގެ ރައީސް އޮފީހުގެ ވަޒީރަކު މިހެން ވިދާޅުވީމާ އަޅުގަނޑު ވަރަށް ނާއުންމީދުވިޔޭ. ފަސޭހަ ކަމެއް ނޫނޭ. އެއްވެސް ކަމެއް ފަސޭހައެއް ނުވެދާނެ," ރޭގެ ބައްދަލުވުމުގައި ޔާމީން ވިދާޅުވި އެވެ.

ރައީސް ޔާމީން މިފަދައިން ވިދާޅުވެފައިވާ އިރު ދިވެހި ސަރުކާރާއި އިންޑިއާ ސަރުކާރުގެ މަތީފަންތީގެ ކޮމެޓީއަކުން މިހާރު ގެންދަނީ ރާއްޖޭގައި ތިބި އިންޑިއާ ސިފައިން ބޭލުމާއި ގުޅޭގޮތުން މަޝްވަރާތައް ބާއްވަމުންނެވެ.

.