މާލެ އާއި ކައިރީގައި އޮންނަ ފުނަދޫގައި ހުރި ތެޔޮ ރައްކާކުރުމަށް ބޭނުންކުރާ ތެޔޮ ޓޭންކްތައް ކ. މާގިރިފަޅަށް ބަދަލުކުރަން ނިންމައިފި އެވެ.
މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ޕަބްލިކް ޕޮލިސީ ސެކްރެޓަރީ އަބްދުالله ނާޒިމް ވިދާޅުވީ ފުނަދޫގައި ގާއިމުކޮށްފައިވާ ފިއުލް ފާމް އެހެން ތަނަކަށް ބަދަލުކުރުމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ހުށަހެޅި މައްސަލަ އާއި ގުޅޭގޮތުން އިކޮނޮމިކް ކައުންސިލްގައި ގޮތްތަކެއް ނިންމާފައިވާ ކަމަށެވެ.
"ފުނަދޫގައި ގާއިމުކޮށްފައިވާ ފިއުލްފާމް ކ. މާގިފިފަޅަށް ބަދަލުކުރުމުގެ ކަންކަން އެސްޓީއޯއިން ކުރިއަށް ގެންދެވުމަށް އިކޮނޮމިކް ކައުންސިލުން ވަނީ ނިންމާފަ"
ނާޒިމް ވިދާޅުވިއެވެ.
މީގެ އިތުރުންވެސް ނާޒިމް ވިދާޅުވީ އެ ފިއުލް ފާމް ބަދަލުކުރަން ނިންމާފައިވަނީ ކ. މާގިރިފަޅަށް ކަމަށާއި ރައީސް ޑރ. މުހައްމަދު މުއިއްޒު އިއުލާނު ކުރައްވާފައިވާ ވެލާނާ އިންޓަނޭޝަނަލް އެއާޕޯޓް ތަރައްގީކުރުމުގެ މަޝްރޫއުގައި ފުނަދޫ ހިމެނޭތީ ދުރުރާސްތާ ކަމެއްގެ ގޮތުގައި ފިއުލް ފާމް އެހެން ތަނަކަށް ބަދަލުކުރަން ޖެހޭ ކަމަށެވެ.
ވެލާނާ އިންޓަނޭޝަނަލް އެއާޕޯޓުގެ ދެވަނަ ފިޔަވަހި އިފްތިތާހު ކުރުމަށް ބޭއްވި ރަސްމިއްޔާތުގައި، ރައީސް ޑރ.މުއިއްޒު ވަނީ ފުނަދޫގައި ތެޔޮ ރައްކާކުރުން ހުއްޓާލައި، އެ މަސައްކަތް އެހެން ތަނަކަށް ބަދަލު ކުރުމުގެ މަސައްކަތް މި އަހަރު ފައްޓަވައި، ކުރިއަށް އޮތް ދެ އަހަރު ނޫނީ ދޮޅު އަހަރު ތެރޭ އެ މަސައްކަތް ނިންމާލެވޭނެ ކަމަށް ވިދާޅުވެފައެވެ. އެމަނިކުފާނު ވަނީ ފުނަދޫ ހުސްކުރުމަށްފަހު އެތަން ސްޕެޝަލް އިކޮނޮމިކް ޒޯނަކަށް ހަދައި އެރަށުގައި ބައިނަލްއަގުވާމީ ފައިނޭންޝަލް ސެންޓަރެއް ހެދުމަށް ނިންމަވާފައެވެ.
Advertisement
This content is created and paid for by advertisers and does not involve Voice Journalists
