ތެޔޮ ރައްކާކުރުމަށް ބޭނުން ކުރަމުން އަންނަ ކ. ފުނަދޫ ގައި އެ މަސައްކަތް ހުއްޓާލައި، ތެޔޮ ރައްކާ ކުރުމަށް ތަރައްގީ ކުރުމަށް ހަމަޖެހިފައިވަނީ ކ. ތިލަފުށި ކައިރީގައި އޮންނަ މާގިރި ކަމަށް މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. އަބްދުالله މުއްތަލިބް ވިދާޅުވެއްޖެ އެވެ.
މިނިސްޓަރ މުއްތަލިބް މިފަދައިން ވިދާޅުވީ މާގިރިފަޅު ތަރައްގީ ކޮށް ތެޔޮ ރައްކާތެރިކުރުން އެތަނަށް ބަދަލު ކުރުމަށް ސަރުކާރުން ނިންމި ނިންމުމާއި އެކު މާލެ ސަރަހައްދުގައި ޑައިވިންގެ މަސައްކަތްކުރާ ފަރާތްތަކުން ކަންބޮޑުވުން ފާޅުކޮށްފައިވާތީއެވެ.
މިގޮތުން ތިމާވެށީގެ މަައްސަލަތަކުގައި ވަކާލާތުކުރާ ޖަމިއްޔާއެއްކަމަށްވާ އިކޯކެއަރ މޯލްޑިވިސްއިން ވަނީ މާލޭގެ އުތުރުގައި އޮންނަ މާގިރި ފަޅަކީ ދިރުން ހުރި ރީތި މުރަކަތަކާއި ތަފާތު ކަނޑު އަޑީގެ ދިރުންތަކުގެ ސަބަބުން މަޝްހޫރު 7 ޑައިވް ސައިޓެއް ހުރި ތަނެއް ކަމަށްވާތީ ސަރުކާރުގެ މި ނިންމުމާއި މެދު ކަންބޮޑުވުން ފާޅުކޮށްފައެވެ.
އިކޯކެއަރ މޯލްޑިވިސް ގެ އިތުރުންވެސް ޑައިވިންގެ މަސައްކަތް ކުރާ ބައެއް ފަރާތްތަކުން ބުނީ ކ. ފުނަދޫ ކައިރި އޮންނަ މާގިރިފަޅަކީ ގުދުރަތީ މުއްސަނދިކަމާއި، ދިރުންތައް ގިނަ ފަޅެއްކަމަށާއި، އަދި މާލެ ސަރަހައްދުގައި އޮތް އެފަދަ މަދު ފަޅުތަކުގެ ތެރެއިން ފަޅެއްކަމަށެވެ. އަދި މިފަޅު ހިއްކައި ތަރައްގީ ކޮށްފިނަމަ މިއީ އެސަރަހައްދުގައި ހުރި ޑައިވިން ސެންޓަރުތަކަށް ވެސް ލިބޭނެ ވަރަށް ބޮޑު ގެއްލުމެއް ކަމަށް ވެސް އެފަރާތްތަކުންގެ ކަންބޮޑު ވުމުގައި ވަނީ ފާހަގަކޮށްފައެވެ.
މިކަމަށް ރައްދު ދެއްވާ މިނިސްޓަރ މުއްތަލިބް އެކްސްގައި ކުރެއްވި ޕޯސްޓެއްގައި ވިދާޅުވީ ކ.ފުނަދޫގައި ހުރި ފިއުލް ސްޓޯރޭޖް ބަދަލުކުރުމަށް ހުށަހަޅާފައިވާ ތަނަކީ ކ.ތިލަފުށި ކައިރީގައި އޮންނަ މާގިރި ކަމަށާއި، ޝެރެޓަން މޯލްޑިވްސް ފުލް މޫން ކައިރީގައި އޮންނަ މާގިރި ނޫން ކަމަށެވެ.
ކ. ފޮނަދޫގައި ހުރި ހުރި ތެޔޮ ރައްކާކުރުމަށް ބޭނުންކުރާ ތެޔޮ ޓޭންކްތައް ކ. މާގިރިފަޅަށް ބަދަލުކުރަން ނިންމާފައިވާކަން އިއްޔެ ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ޕަބްލިކް ޕޮލިސީ ސެކްރެޓަރީ އަބްދުالله ނާޒިމް ވަނީ ވިދާޅުވެފައެވެ. މިގޮތުން ނާޒިމް ވިދާޅުވީ ފުނަދޫގައި ގާއިމުކޮށްފައިވާ ފިއުލް ފާމް އެހެން ތަނަކަށް ބަދަލުކުރުމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ހުށަހެޅި މައްސަލަ އާއި ގުޅޭގޮތުން އިކޮނޮމިކް ކައުންސިލްގައި ގޮތްތަކެއް ނިންމާފައިވާ ކަމަށެވެ.
ކ.ފުނަދޫ އިން ތެޔޮ ރައްކާކުރާ ޓޭންކްތައް ކ.މާގިރިފަޅަށް ބަދަލު ކުރުމަށް ނިންމާފައިވަނީ ރައީސް ޑރ. މުހައްމަދު މުއިއްޒު އިއުލާނު ކުރައްވާފައިވާ ވެލާނާ އިންޓަނޭޝަނަލް އެއާޕޯޓް ތަރައްގީކުރުމުގެ މަޝްރޫއުގައި ފުނަދޫ ހިމެނޭތީ ދުރުރާސްތާ ކަމެއްގެ ގޮތުގައި ކަމަށް ވެސް ނާޒިމް ވަނީ އިއްޔެގެ ނޫސްވެރިންގެ ބައްދަލުވުމުގައި ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
