ގާނޫނުތައް އޮޅުވާލައިގެން ނުލިޔެ، އެ ގާނޫނުގައި ބުނާ އެއްޗެއް ސާފުކޮށް އެނގޭނެހެން ގާނޫނު ހެދުމަށް ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާގެ ވަޒީރު ޢަލީ އިހްސާން އެދިވަޑައިގެންފިއެވެ.
އިހްސާން މިހެން އެދިވަޑައިގެންފައިވަނީ ޖުވެނައިލް ޖަސްޓިސް ސިމްޕޯސިއަމް ހުޅުވުމަށް މިއަދު ބޭއްވި ޚާއްސަ ރަސްމިއްޔާތުގައި ވާހަކަ ދައްކަވަމުންނެވެ.
“ޖުވެނައިލް ޖަސްޓިސް” ސިމްޕޯސިއަމް" އަކީ ކުޑަކުދިންގެ އަޛުލުގެ ޤާނުނު ތަންފީޒު ކުރުމުގައި ގުޅިފައިވާ މުޢައްސަސާތަކަށް ދިމާވެފައިވާ ގޮންޖެހުންތައް ދެނެގަތުމަށާއި ގޮންޖެހުންތައް ޙައްލުކުރުމަށް، ޑިޕާޓްމަންޓް އޮފް ޖުވެނައިލް ޖަސްޓިސް އާއި ޔުނިސެފް މޯލްޑިވްސް އިން ގުޅިގެން 3 ދުވަހުގެ މުއްދަތަށް ކުރިއަށް ގެންދާ ސިމްޕޯސިއަމް އެކެވެ.
އެ ރަސްމިއްޔާތު ގައި ސިމްޕޯސިއަމް ގެ ބައިވެރިންނާއި މުޚާތަބުކުރައްވާ ވާހަކަދައްކަވަމުން އިހްސާން ވިދާޅުވީ ދިވެހިރާއްޖެ އަކީ، ތަކުރާރުކޮށް، ކުޑަ ކުދިން ކުށަށް ހުށަހެޅި، ކުށުގެ ވެށީގައި އެމީހުންގެ ބޭނުން، ނަހަމަގޮތުގައި ހިފަމުން އަންނަ މާހައުލެއް އޮންނަ ގައުމެއް ކަމަށެވެ.
އެހެންކަމުން ކުޑަކުދިންގެ ޢަދުލުގެ ގާނޫނަކީ ރާއްޖޭގެ ދުސްތޫރީ ޙަޔާތުގައި، ޝަރުޢީ ދާއިރާއިން ނެގުނު އެންމެ ބޮޑު ފިޔަވަޅުކަމަށް އިހްސާން ފާހަގަކުރެއްވި އެވެ.
ކަންމިހެން ހުރި ނަމަވެސް، އެ ގާނޫނުގައި ކުޑަކުދިންނަށް ވަކި ބާވަތެއްގެ ހައްގު ތަކެއް ކަށަވަރު ކުރެވިފައިވާތީ، އޭގެ ބޭނުން ހިފައިން، ކުށްތަކަށް އަރައިގަންނަ މީހުންނާއި، ގޭންގުތަކުން، ކުށްތައް ކުރުމުގައި ކުޑަކުދިންގެ ބޭނުން ކުރަމުންދާކަމަށް އިހްސާން ވިދާޅުވިއެވެ.
މިއާއެކު، އިހްސާން ވިދާޅުވީ، ރާއްޖޭގައި ހެދިފައި ހުރި ގާނޫނު ތަކުގެ ތެރެއިން ޚައްސާސް ކަންކަން ހިމެނޭ ގާނޫނުތައް އިސްލާހު ކުރުމުގެ މަރުހަލާ ދަނީ ވަރަށްވެސް ލަހުން ކަމަށެވެ. އެގޮތުން، ކުޑަކުދިންގެ ޢަދުލުގެ ގާނޫނު އިސްލާހު ކުރަންޖެހޭ ކަމަށް ހުރިހާ މުއައްސަސާއަކުން ވެސް ބުނަމުންދާއިރު, އެކަން ކުރެވޭތަން ނުފެންނަ ކަމަށް ވިދާޅުވި އެވެ.
އޭގެ ނަތީޖާއެއްގެ ގޮތުން، ހެދިފައި ހުންނަ ގާނޫނާއި ގަވާއިދަށް އާއްމުން ހޭލުންތެރިވެ، އޭގެ ހުރި ކުށްތައް އިސްލާހު ކުރުމުގެ ކުރިން، ކުށުވެ ވެށީގައި ތިބޭ މީހުން އެއަށް އަހުލުވެރިވެ، އޭގައި ހުރި "ލޫޕްހޯލްތައް" ދެނެގަނެ، އެކަމުގެ ނާޖައިޒް ފައިދާ ނަގަމުންދާކަން ފާހަގަކުރައްވައި އެކަމާއި މެދު ފުންކޮށް ވިސްނުމަށް އިހްސާން ވަނީ އެދިވަޑައިގެންފަ އެވެ.
އަދި ކުޑަކުދިންގެ ހައްގު ތަކަކީ އެންމެ މުހިންމު ކަން ކަމަށްދަނެ، އެކަމަށްޓަކައި ކުރެވޭ އަމަލީ މަސައްކަތް އަވަސް ކުރުމަށް އިހްސާން ވަނީ އެދިވަޑައިގެންފަ އެވެ.
މީގެ އިތުރުން އިހްސާން ވިދާޅުވީ އެއްބާވަތެއްގެ މައްސަލައިގައި، އެކި ގޮތްތަކަށް ކުށްކުރާ ކުދިންނާއިމެދު ޢަމަލުކުރެވެމުންދާ ކަމަށެވެ.
"މީހަކު މެރުމުގައި ބައިވެރިވާ ދެކުދިން، އެއްކުއްޖަކު ޖަލުގައި ރިހެބްވަނީ، އަނެއް ކުއްޖަކު ގޭގައި ރިހެބް ވަނީ، އަނެއް ކުއްޖަކު މަގުމަތީގައި ރިހެބްވަނީ، އަނެއް ކުއްޖާގެ އޭނާގެ ޒާތުގައި އަމިއްލައަށް ރިހެބްވަނީ. މިއީ އެއް ލިޔުމަކުން ލިޔެވިފައިއޮތް، އެއް ގާނޫނެއް ބަލައިގެން އަޅުގަނޑުމެން ޢަމަލުކުރަމުންދާގޮތް. މިވެސް އެބަޖެހޭ ބަދަލުވާން. ސާފު ދިވެހި ބަހުން ހުންނަ އެއްޗެހި، އަޅުގަނޑުމެން އެކި މީހުން، އެ ކިޔާއިރު، އެކި ގޮތްގޮތަށް މި މާނަ ކުރެވޭ ކަމަށް ވަންޏާ މިއަށްވުރެ ފަސޭހަކޮށް ލިޔަންވެއްޖެ އެއްނޫންތޯ؟ ގާނޫނުތައް ލިޔާއިރުވެސް އެހާ އޮޅުވާލައިގެން، އަޅުގަނޑުމެން އަމިއްލަ ނަފްސަށް އޮޅުވާލުމުގެ ބޭނުމެއް ނެތްތާ. ސާފުކޮށް ލިޔަންވީ ނޫންތޯ.؟"
ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާގެ ވަޒީރު ޢަލީ އިހްސާން
އެހެންކަމުން، އިހްސާން ވަނީ، ކުޑަކުދިންގެ ހައްގުތައް ރައްކާތެރިވާނެ ގޮތަށް، ގާނޫނުގައި ބުނާ އެއްޗެއް ސާފުވާނެ ގޮތަށް، ކުޑަކުދިންގެ ޢަދުލުގެ ނިޒާމް ބަދަލުކުރުމަށް އެދިވަޑައިގެންފައެވެ. އަދި އެމަސައްކަތް އަވަސް ކުރެއްވުމަށްވެސް އިހްސާން ވަނީ އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
