ދެ ގައިދީއަކު ކައިވެނި ކުރުމަކީ އިޖުތިމާއީ އިތުރު މައްސަލަތަކެއް އުފެދިދާނެ ކަމެއް ކަމަށް ރާއްޖޭގެ ފަތުވާދޭ މަޖިލީހުން ބުނެފިއެވެ.

އެ މަޖިލީހުން މިފަދައިން ބުނެފައިވަނީ ޖަލުގައި ބަންދު ކުރެވިފައި ތިބޭ ގައިދީން ކައިވެނި ކުރުމާއި ބެހޭގޮތުން ނެރުނު ފަތުވާ ގައެވެ.

މިގޮތުން އެ މަޖިލީހުން ނެރުނު ފަތުވާގައި ބުނީ ޖަލުތައް ހެދިފައިވަނީ އަދި ޖަލުތަކުގެ ނިޒާމް ހަމަޖެހި ހިނގަމުންދަނީ، ކައިވެނިކޮށްގެން އުޅޭ ދެ ގައިދީއަކަށް ލިބޭ ދަރިން ބެލެހެއްޓޭނެ ނިޒާމެއްގެ ދަށުން ނޫންކަމުގައިވާތީ ދެ ގައިދީން ކައިވެނި ކުރުމަކީ އިޖުތިމާއީ އިތުރު މައްސަލަތަކެއް އުފެދިދާނެ ކަމެއް ކަމަށެވެ. ނަތީޖާއެއްގެ ގޮތުން މިހާލަތުގައި ތިބޭ ދެމީހުނަށް ލިބޭ ދަރިން ބެލުމުގެ އިތުރު ތަކުލީފު ދައުލަތުން އުފުލަން ޖެހޭ ކަމަށް ވެސް އެ މަޖިލީހުން ވަނީ ބުނެފައެވެ.

އެހެންކަމުން ދަރިންނަށް ލިބެންޖެހޭ ތަރުބިއްޔަތާއި، މައިންބަފައިންގެ ލޯބިން އެކުދިން މަހުރޫމް ވެގެން ހިގައިދާނެ ކަމުގެ ބިރު އޮތް ނަމަ، މުޖުތަމައު އަށް ކުރިމަތިވެދާނެ ގެއްލުންތަކުން ރައްކާތެރިވުމުގެ ގޮތުން ދެ ގައިދީން ކައިވެނި ކުރުން މަނާކުރުމަށްޓަކައި އިސްލާމީ ހަމަތަކާއި އުސޫލުތަކާއި އެއްގޮތްވާ ގޮތުގެ މަތިން ގަވާއިދެއް ހެދުމަކީ އިސްލާމީ ޝަރީއަތާއި ފުށު އަރާ ކަމެއް ނޫންކަމަވެސް އެ ފަތުވާގައި ވަނީ ބުނެފައެވެ.

މީގެ އިތުރުން ވެސް ފަތުވާ ދޭ މަޖިލީހުން ބުނީ ގައިދީން ކައިވެނި ކުރުން މުތުލަގު ގޮތެއްގައި މަނާކުރާ ދަލީލެއް ނެތުމާއި އެކު، ޝަރުއީ އިމުގެ ތެރޭގައި ޖަލުގައި ހުކުމް ތަންފީޒު ކުރަމުން ގެންދާ ގައިދީންގެ ޖިންސީ ޣަރީޒާ ފުއްދުމުގެ ގޮތުން، ކުރިން މީހުންނާއި އިނދެގެން ތިބޭ ގައިދީންނަށް ޝަރުއީ ޚަލްވަތުކުރުމާއި، އަލަށް ކައިވެނި ކުރުމަށް ބޭނުންވާ ގައިދީންނާއި ކައިވެނިކުރުމާއި ގުޅޭ ގަވާއިދެއް އޮތުމަކީ ބޭނުންތެރި ކަމެއް ކަމަށެވެ.