ހުވާނުކުރެވި އުޅެނިކޮށް އެމްޑީޕީގެ ޓިކެޓުގައި މާލޭ މެދުހެންވޭރު ދާއިރާއަށް އިންތިހާބުވި ކައުންސިލަރު އަހްމަދު ރިޝްވާން މިއަދު ޕީއެންސީއަށް ސޮއިކުރައްވައިފި އެވެ.
މި މަހު 13 ގައި ބޭއްވި ބައި އިލެކްޝަންގައި އިންތިހާބުކުރި މެންބަރުންނާއި މޭޔަރު ހުވާކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މިރެއެވެ.
އެމްޑީޕީގެ ޓިކެޓުގައި މާލޭ މެދުހެންވޭރު ދާއިރާއަށް އިންތިހާބުވި އަހްމަދު ރިޝްވާން ޕީއެންސީ އަށް ސޮއިކުރައްވައި ރައީސް ޑރ. މުހައްމަދު މުއިއްޒަށް މިއަދު ވަނީ ފޯމު ހަވާލުކުރައްވާފައެވެ.
މާލެ ސިޓީ ކައުންސިލުން ހުސްވި ހަތަރު ގޮނޑީގެ ތެރެއިން ދެ ގޮނޑި ސަރުކާރު ހިންގާ މައި ޕާޓީ ޕީއެންސީ އިން ކާމިޔާބު ކުރިއިރު ، އަނެއް ދެ ގޮނޑި ކާމިޔާބުކުރީ އިދިކޮޅު އެންމެ ބޮޑު ޕާޓީ އެމްޑީޕީންނެވެ.
އެގޮތުން ޕީޕީއެމް/ޕީއެންސީ ކޯލިޝަނުން ކާމިޔާބުކޮށްފައި ވަނީ މާފަންނު ދެކުނާއި ހެންވޭރު ދެކުނު ދާއިރާގެ ކައުންސިލް ގޮނޑިއެވެ. އަދި އެމްޑީޕީން ކާމިޔާބު ކުރީ އާދަމް އާޒިމް ކާމިޔާބު ކުރެއްވި މާލޭގެ މޭޔަރު ކަމުގެ ގޮނޑި އާއި މެދުހެންވޭރު ދާއިރާގެ ގޮނޑިއެވެ.
މެދުހެންވޭރު ދާއިރާއަށް އެމްޑީޕީގެ ޓިކެޓުގައި އިންތިހާބުވި އަހްމަދު ރިޝްވާން މިއަދު ޕީއެންސީއަށް ސޮއިކުރައްވުމާއި ގުޅިގެން އެ ކޯލިޝަނުން ވަނީ އޭނާއަށް މަރުޙަބާ ވިދާޅުވެފައެވެ .
Advertisement
This content is created and paid for by advertisers and does not involve Voice Journalists
