މީލާދުން 1558 ވަނަ އަހަރު ރާއްޖޭގައި ރަސްކަންކުރެއްވި އައްސުލްޠާނު ޢަލީ ހަވަނަ (އަލިރަސްގެފާނު) ޝަހީދުކޮށްލުމަށް ފަހު، ޕޯޗުގީޒުން ރާއްޖެ އަޅުވެތިކުރުމުން އެމީހުންގެ އަތުން ރާއްޖެ މިނިވަންކުރެއްވުމަށް ޓަކައި އުތީމު މަހާރަދުން ބެންނެވި އޮޑިކޮޅު ކަމުގައިވާ ކަޅުއޮށްފުންމި މާލެ ގެނައުމުގެ މަސައްކަތް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ފަށައިފިއެވެ.

މިކަމާއި ގުޅޭގޮތުން ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ބުނީ މާލެ ގެނައުމަށް ހަމަޖެހިފައިވަނީ އުތީމު މަހާރަދުން ބެންނެވި އޮޅިކޮޅުގެ ނަކަލުކަމަށާއި އެ އޮޑިކޮޅު ގެނައުމަށް ހަމަޖެހިފައިވަނީ މިހާރު ކަޅުވަކަރު މިސްކިތް ހުރި މައިދާނަށް ކަމަށެވެ.

ކަޅުވަކަރު މިސްކިތް ހުރި މައިދާނުގައި ކަޅުއޮށްފުންމި ބެހެއްޓުމަށް ކަނޑައެޅުނީ  އޮޑިކޮޅު ގެނައުމަށް ފަހު ބެހެއްޓުމަށް އެކަށީގެންވާ ތިން ސަރަޙައްދެއްގެ ސަރވޭ ކުރުމަށް ފަހު ކަމަށް ވެސް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ވަނީ ބުނެފައެވެ. އެކި މަރުޙަލާތަކަށް ބަހާލައިގެން ކަޅުއޮށްފުންމި އާއި ގުޅޭ މަސައްކަތްތައް ކުރިއަށް ގެންދިއުމަށް އެވުޒާރާއިން ވަނީ ރާވާފައެވެ. މިގޮތުން މިހާރު ކުރިއަށް ދާ މުހިންމު މަސައްކަތް ތަކަކީ އުޅަނދުގެ މަރާމާތަށް ބޭނުންވާ ވަސީލަތްތައް ހޯދުމާއި، މާލެ ގެނައުމަށް ޢަމަލު ކުރާނެ ގޮތެއް ހަމަޖެއްސުން ކަމަށް އެ ވުޒާރާއިން މައުލޫމާތު ދެއެވެ.

Advertisement

ކަޅު އޮށްފުންމި މާލެ ގެނެސް ބެހެއްޓުމުގެ މަސައްކަތް ކުރިއަށް ގެންދަނީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާ އާއި ސަރުކާރުގެ ގިނަ މުއައްސަސާތަކެއް ގުޅިގެންނެވެ.

 ކަޅުއޮށްފުންމި މަޝްރޫއުގެ މަސައްކަތްތައް ކުރިއަށް އޮތް 3 ހަފްތާއެއްހައި ދުވަސް ތެރޭ ނިންމުމަށް އެވުޒާރާއިން ދަނީ މަސައްކަތް ކުރަމުންނެވެ. މިގޮތުން މި މަޝްރޫއާއި ގުޅިގެން  ކުރަން ރޭވިފައިވާ ބައެއް ކަންކަމުގެ ތެރޭގައި މަރާމާތުގެ މަސައްކަތް ކޮންސަލްޓުންޓާ ހަވާލުކުރުމާއި، ކަޅުއޮށްފުންމީގެ ނަކަލު މާލޭގައި ބަހައްޓާތަން ތައްޔާރުކުރުމާއި، އޮޑިހަރުގެ އެޅުމުގެ އިތުރުން ކަޅުއޮށްފުންމި ބަލާލަން ތިބެވޭނެ ޕްލެޓްފޯމް ތައްޔާރުކުރުން ހިމެނެއެވެ.

ކަޅުއޮށްފުންމި މާލެ ގެނެސް މަރާމާތުގެ މަސައްކަތްތަކަށް ފަހު ޢާއްމުންނަށް ޒިޔާރަތް ކުރެވޭގޮތަށް ހުޅުވާލުމަށް ހަމަޖެހިފައިވާއިރު އޮޑިކޮޅު ގެނެސް އެކަމަށް ޚާއްޞަ ރަސްމިއްޔާތެއް ބޭއްވުމަށް ވަނީ ހަމަޖެހިފައި ކަމަށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ބުނެއެވެ.

މާލެ ގެނައުމަށް ހަމަޖެހިފައިވާ ކަޅުއޮށްފުންމީގެ ނަކަލު ބަދެވުނީ ދިވެހިރާއްޖޭގެ މިނިވަންކަމަށް 50 އަހަރު ފުރުމުގެ މުނާސަބަތާއި ގުޅިގެންނެވެ. މި އޮނޑިކޮޅު ބަދެފައިވަނީ އުތީމު މަހާރަދުންގެ ޤައުމީ ޖިހާދާއި ކަޅުއޮއްފުންމިއާ ބެހޭ ގޮތުން ލިބެން ހުރި ތާރީޚީ މަޢުލޫމާތު، ކަމާ ބެހޭ ފަންނީ ޓީމަކުން ދިރާސާކުރުމަށް ފަހު ލިބުނު ނަތީޖާތަކުގެ މައްޗަށެވެ. ކަޅުއޮށްފުންމީގެ ދިގުމިނުގައި 51 ފޫޓު ހުންނައިރު، އަލަށް ބަނދެވުނު ނަކަލު  މޫދަށް ބާލާފައި ވަނީ 2 ޑިސެންބަރު 2015 ގައެވެ. މިނިވަން 50 ގެ ރަސްމިއްޔާތު ނިމުމުން އެ އޮޑި އޮތީ އާރަށަށް އެހެލާފައެވެ.

މި އޮޑިކޮޅު މާލެ ގެނައުމުގެ ބޭނުމަކީ އުތީމު މަހާރަދުން ނުވަތަ އައްސުލްޠާނުލްޣާޒީ މުޙައްމަދު ތަކުރުފާނުލްއަޢުޡަމް ކުރެއްވި މިނިވަންކަމުގެ ޖިހާދާ ބެހޭ މަޢުލޫމާތު ލިބޭނެ އިންތިޒާމުތަކާއެކު ގިނަބަޔަކަށް ފެންނާނެ ގޮތަށް ބެހެއްޓުން ކަމަށް ވެސް އެ ވުޒާރާއިން މައުލޫމާތުދެއެވެ.