އައްޑޫ ސިޓީން ގޯތި ދޫކުރުމަށް އިއުލާން ކުރިތާ އެއް އަހަރުފަހުން އައްޑޫސިޓީގެ 4 އަވަށަކުން ދިރިއުޅުމަށް ދޫކުރާ ބަންޑާރަ ގޯތީގެ ގުރުނެގުން މިހަފްތާގައި ބޭއްވުމަށް ހަމަޖެހިފައިވާ ކަމަށް އައްޑޫ ސިޓީ ކައުންސިލުން ބުނެފިއެވެ.

އައްޑޫ ސިޓީން ގޯތި ދޫކުރުމަށް ހަމަޖެހިފައިވަނީ ދެ ފިޔަވައްސަކަށް ބަހާލައިގެންނެވެ. މިގޮތުން ފުރަތަމަ ފިޔަވަހީގައި  ހިތަދޫ އިން 500 ގޯތި، ފޭދޫ އިން 300 ގޯތި އަދި ހުޅުދޫ އާއި މީދޫ އިން ކޮންމެ ރަށަކުން 100 ގޯތި ދިނުމަށް ވަނީ ހަމަޖެހިފައެވެ. 

ފުރަތަމަ ބުރުގައި ގޯތި ލިބޭ މީހުންގެ ލިސްޓް އައްޑޫ ސިޓީ ކައުންސިލުން މިދިޔަ ޑިސެންބަރު މަހު އާންމުކޮށްފައިވާއިރު އެ ކައުންސިލުން ބުނީ  ގޯތީގެ ގުރުނެގުމާ ގުޅޭ ހުރިހާ މަސައްކަތްތަކެއް މިހާރު ނިމިފައިވާ ކަމަށެވެ.

Advertisement

ލިސްޓުގައި ހިމެނޭ ދެން ތިބި ފަރާތްތަކަށް އައްޑޫ ސިޓީން ދެވަނަ ފިޔަވަހީގައި ދޫކުރުމަށް ހަމަޖެހިފައިވާ ގޯތި ދޫކުރަން ފެށޭނީ  އަވަށްތަކަށް އިތުރު ކުރެވުނު ބިންތަކުގެ ލޭންޑްޔޫޒް ޕްލޭން ހަދައި ސާވޭގެ މަސައްކަތް ފުރިހަމަ ކުރުމަށް ފަހުގައި ކަމަށާއި އައްޑޫ ސިޓީ ކައުންސިލްގެ އަމާޒަކީ 2024 ވަނަ އަހަރުގެ ޖޫންމަހުގެ ނިޔަލަށް މިހާރު އާންމުކުރެވިފައި ލިސްޓުގައި ހިމެނޭ ހުރިހާ ފަރާތްތަކަށް ގޯތިދޫކޮށް ނިންމުން ކަމަށް އެ ކައުންސިލުން ބުނެއެވެ.

އައްޑޫ ސިޓީން ގޯތި ދޫނުކޮށް 26 އަހަރު ވެފައި އޮއްވާ، ގޯއްޗަށް އެދި ފޯމު ހުށައެޅުމަށް ހުޅުވާލީ 2023 ވަނަ އަހަރުގެ ޖެނުއަރީ މަހުއެވެ. ގޯއްޗަށް އެދި ގިނަބަޔަކު ފޯމު ހުށައެޅި ނަމަވެސް ގޯތި ދޫކުރުމަށް އިއުލާން ކުރިތާ 1 އަހަރު ވެގެން ދިޔައިރުވެސް އެމަސައްކަތް ފެށިފައި ނުވާތީ އައްޑޫ ސިޓީގެ ގިނަ ރައްޔިތުންތަކެއް އަންނަނީ ކަންބޮޑުވުން ފާޅުކުރަމުންނެވެ.