2017 ވަނަ އަހަރުގެ ސެޕްޓެންބަރު މަހުގެ 23 ވަނަ ދުވަހު ސައިކަލެއްގައި ދަނިކޮށް ގްރޫޕަކުން ގޮސް ތޫނު އެއްޗަކުން ހަމަލާދީ ވ. ކެޔޮދޫ ދޭލިއާގޭ މޫސާ އަހުމަދުމަނިކު މަރާލި މައްސަލާގައި ދައުވާ ލިބުނު މީހާގެ މައްޗަށް ކުށްސާބިތު ނުވާކަމަށް ކްރިމިނަލް ކޯޓުން ހުކުމް ކޮށްފިއެވެ.
މޫސާ އަހުމަދުމަނިކު މަރާލިކަމަށް ދައުލަތުން ދައުވާ އުފުލާފައިވަނީ އދ. މާމިގިލި، ސޭޑީ ގްރޯވް އިބްރާހިމް ސައްމާހު އަހުމަދު ފަތުހީގެ މައްޗަށެވެ.
ކްރިމިނަލް ކޯޓުން ކުރި ހުކުމުގައި ވަނީ މޫސާ ފަތުހީ މަރާލީ ސައްމާހު ކަމަށް ބުނެ ހެކި ބަސް ދިނީ އެންމެ މީހަކު ކަމަށާއި އެއްވެސް ފަރާތަކުން ހާދިސާ ހިނގި ތަނުގައި ސައްމާހް ހުރިކަން ބަޔާންކޮށް ހެކި ބަސް ދީފައިނުވާ ކަމަށެވެ. އަދި ސައްމާހް އާއި ދެކޮޅަށް ހެކިބަސް ދިން މީހާ ގެ ހެކި ބަހަކީ އިތުބާރު ކުރެވޭ ހެކިބަހަކަށް ނުވާތީ އެ ހެކި ބަހަށް ބުރަދަން ނުދެވޭ ކަމަށް ވެސް ހުކުމްގައި ވެއެވެ.
މީގެ އިތުރުންވެސް ކްރިމިނަލް ކޯޓުން ބުނީ ފުލުހުން ހުށައަޅާފައިވާ ސީސީޓީވީ ފޫޓޭޖުގައި މޫސާ އަށް ސައްމާހު ހަމަލާދޭކަން ފާހަގަކޮށްފައިވީ ނަމަވެސް މީ ގްރޫޕެއްގެ މެދުގައި ހިނގާފައިވާ މާރާމާރީ އަކަށް ވާތީ، ފޫޓޭޖުން ފެންނަ މަންޒަރުގައި ހަމަލާ އަމާޒުވަނީ މޫސާ އަށް ކަން ކަށަވަރުކޮށްދެވިފައި ނުވާ ކަމަށެވެ. އަދި މި މައްސަލައިގެ ސީނުން ނެގުނު އެއްވެސް އިނގިލީގެ ނިޝާނެއް ވެސް އަދި ޑީއެންއޭ ސާމްޕަލެއް ވެސް ސައްމާހު އާއި ގުޅުމެއް ނެތް ކަމަށް ކޯޓުން ވަނީ ބުނެފައެވެ.
މި ކަންކަމަށް ރިއާޔަތް ކޮށް މައްސަލަ ބެއްލެވި ގާޒީ އިބްރާހިމް އިހްސާން ކުރެއްވި ހުކުމުގައިވަނީ ސައްމާހުގެ މައްޗަށް ކުރި ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާ ސާބިތުނުވާ ކަމަށެވެ.
މި ދައުވާގެ އިތުރުންވެސް ސައްމާހު އާއި ސ.ހިތަދޫ ގުލްބަކާގެ މުހައްމަދު ނާޒިޝް ނާޒިމް ގެ މައްޗަށް ދައުލަތުން ވަނީ މަގްބޫލު ސަބަބެއް ނެތި ތޫނު އެއްޗެއް ގެންގުޅުމުގެ ދައުވާ ވެސް ކޮށްފައެވެ. ހަމަލާދިން ސަރަހައްދުގައި ވަޅި ގެންގުޅުނު ކަމަށް ބުނެ ކުރި މި ދައުވާ ވެސް ސާބިތުނުވާ ކަމަށް ކްރިމިނަލް ކޯޓުން ވަނީ ހުކުމް ކޮށްފައެވެ.
Advertisement
This content is created and paid for by advertisers and does not involve Voice Journalists
