ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ގެ ގއ. އަތޮޅު، އަތޮޅު ބުރުގެ ގުރޫޕް އެކެއްގައި އަންގާރަދުވަހުގެ ރޭ 6-1 ގެ ނަތީޖާއަކުން ދާންދޫ ބަލިކޮށް ކޮނޑޭ އިން އެޓީމުގެ ފެންވަރު ދައްކާލައިފި އެވެ.

މުބާރާތުގައި ދާންދޫ އިން ކުޅުނު ފުރަތަަމަ މެޗުގައި 3-2 ގެ ނަތީޖާއަކުން ގެމަނަފުށި އަތުން އެޓީމު ބަލިވެފައިވާއިރު، ދެވަނަ މެޗުގައި އެޓީމުން ވަނީ 1-0 ގެ ނަތީޖާއަކުން މާމެންދޫ އަތުން މޮޅުވެފައެވެ. އަދި ކޮނޑޭގެ ފުރަތަަމަ މެޗުގައި ގެމަނަފުއްޓާއި ދެކޮޅަށް އެޓީމުން ކުޅުނު މެޗު ވަނީ 2-2 ގެ ނަތީޖާއަކުން ދެޓީމް އެއްވަރުވެފައެވެ.

ހުޅުމާލޭ ރެހެންދި އެއް ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފު 2-1 ގެ ނަތީޖާއަކުން ކޮނޑޭ ކުރީގައި އޮވެގެން ނިމުނުއިރު، ދެވަނަ ހާފުގައި އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ. އެގޮތުން މިމެޗުގައި އެޓީމުގެ އަމީ ފާރިހު މުހައްމަދު ހަތަރު ލަނޑު ކާމިޔާބުކުރިއިރު، އަހުމަދު އަނަސް ވަނީ ދެލަނޑު ކާމިޔާބުކޮށްފައެވެ.

Advertisement

މިމެޗުގައި ދާންދޫ ޓީމުން ކާމިޔާބުކުރި ހަމައެކަނި ލަނޑު އެޓީމަށް ކާމިޔާބުކޮށްދިނީ އަހުމަދު ހަސަން އެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ކޮނޑޭގެ އަލީ ފާރިހު މުހައްމަދު އެވެ. 

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ކޮނޑޭއަށް ހަތަރު ޕޮއިންޓް ލިބިފައިވާއިރު، މިމެޗުން ބަލިވި ދާންދޫ އަށް ތިން މެޗު ކުޅެގެން ކިބިފައިވަނީ ތިން ޕޮއިންޓެވެ.

މިއަހަރުގެ މުބާރާތުގައި ޖުމްލަ 129 ޓީމު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި ގއ. އަތޮޅުން 9 ޓީމު ބައިވެރިވެފައިވާއިރު، މިއަތޮޅުގެ އަތޮޅުބުރު ކުރިއަށް ގެންދިއުމަށް ހަމަޖެހިފައިވަނީ ދެ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން އެންމެ ރަގަޅު ނަތީޖާއެއް ހޯދާ ދެޓީމު ސެމީ ފައިނަލަށް ހޮވޭއިރު، ފައިނަލުގައި ވާދަކުރާ ދެޓީމަށް މުބާރާތުގެ ޒޯނު ބުރުން ފުރުސަތު ލިބިގެންދާނެ އެވެ