އަމީނީ މަގުގައި ތާރުއަޅާ ނިމުމުން އަމީނީ މަގުގެ މަޝްރޫއުގެ ދަށުން އެ މަގުގެ މެއިންޓެނެންސް މަސައްކަތް ކުރަމުންދާނެ ކަމަށް ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) އިން ބުނެފިއެވެ.

ތާރުއެޅިތާ މަހެއްވެސް ނުވަނީސް އަމީނީ މަގުގައި ވަޅުގަނޑެއް ހެދިފައިވާކަމަށް ސޯޝަލް މީޑިއާގައި އާއްމު ފަރާތަކުން ފާޅުކުރި ކަންބޮޑުވުމަށް ރައްދު ދެމުން އާރުޑީސީ އިން ބުނީ އެއީ އެމްޑަބްލިއުއެސްސީގެ ވޯޓަރ ގޭޓް ވޭލްއެއް ކަމަށާއި އެތަން މިހާރު ވަނީ މަރާމާތު ކުރެވިފައި ކަމަށެވެ.

އަމީނީމަގު މަޝްރޫޢުގެ ތެރޭގައި އެމަގުގެ މެއިންޓަނަސް މަސައްކަތްތައް ބެލެހެއްޓުންވެސް ހިމެނޭކަމަށާއި އެގޮތުން ޖަންކްޝަންތަކާއި މަގުގެ މެއިންޓަނަސް މަސައްކަތް ކުރަމުންދާނެ ކަމަށް އާރުޑީސީ އިން ވަނީ ބުނެފައެވެ.

ކުރީ ސަރުކާރުން ފެށި އަމީނީމަގު ހެދުމުގެ މަޝްރޫއުގެ ނުނިމި އޮތް ބައިގެ މަސައްކަތް، ރައީސް ޑރ. މުއިއްޒުގެ ސަރުކާރުން މިދިޔަ އަހަރުގެ ޑިސެންބަރު މަހުގެ 9 ގައި ވަނީ އަލުން ފަށާފައެވެ. 

މި މަސައްކަތް ބާރު ސްޕީޑްގައި ކުރިއަށް ދަނިކޮށް ރާއްޖެއަށް ދާދި ފަހުން ކުރި ވިއްސާރައިގައި މަސައްކަތް ވަނީ މެދުކެނޑިފައެވެ. ނަމަވެސް މޫސުން ރަނގަޅު ވުމާއި އެކު މަސައްކަތް އަލުން ފަށައި އަމީނީ މަގު ވަނީ އެއްކޮށް ނިންމާލާފައެވެ.

އެ މަގުގެ ފަހު ސެގްމެންޓް ފުޅާ ކޮށްހަދައި، އަމީނީމަގު ތަރައްގީ ކުރުމުގެ މަސައްކަތުގެ ތެރެއިން، ފެންބޮޑުވުމުގެ މައްސަލައަށް ހައްލު ގެނައުމަށްޓަކައި ޕަމްޕް ވެސް ވަނީ ބަހައްޓާފައެވެ.

އަމީނީ މަގުގައި ތާރު އަޅާ ނިންމާލުމަށްފަހު އެ މަގު އާންމުނަށް ހުޅުވާލީ މިމަހުގެ 13 ވަނަ ދުވަހުއެވެ.