ރާއްޖޭގެ އަތޮޅުތަކާއި، ރަށްތަކުގައި ޤާއިމުވެފައިވާ ކައުންސިލްތަކުންކުރާ މަސައްކަތްތަކުގައި ރައްޔިތުންގެ ބައިވެރިވުމާއި ހިއްސާ އިތުރުކުރުމަށް މަސައްކަތް ކޮށްދެއްވުމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު އެދިވަޑައިގެންފިއެވެ.

ވަޒީރު މިފަދައިން އެދިވަޑައިގެންފައި ވަނީ  ދިރިއުޅުމަށްޓަކައި ގޯތި ގެދޮރު ކުއްޔަށް ދިނުމާބެހޭ ޤާނޫން ތަންފީޒުކުރުމަށް ކައުންސިލަރުން ތަމްރީން ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

އެލްޖީއޭގައި ބޭއްވި މިރަސްމިއްޔާތުގައި ވާހަކަދައްކަވަމުން ވަޒީރު އާދަމް ޝަރީފް ވިދާޅުވީ ރައްޔިތުން ބޭނުންވާ ގޮތަށް ކަންކަން ނިންމުމަކީ ކައުންސިލްތައް ބާރުވެރިކުރުމުގައި ލިބެންޖެހޭ ޤާނޫނުން ދީފައިވާ ހައްޤުމަގާމު ހޯދުމުގެ ވަރަށް މުހިންމު އަސާސެއް ކަމަށެވެ. އަދި މިކަންކަން ކުރިއަށް ގެންދިއުމަށްޓަކައި ކައުންސިލްތަކުން ރާވާ ޕްރޮގްރާމްތަކުގައި ރައްޔިތުންގެ ބާރުވެރިކަން އިތުރުކުރެވޭނެ ގޮތްތައް ދެނެގަތުމަކީވެސް ވަރަށް މުހިންމު ކަމެއް ކަމަށެވެ.

"ރައްޔިތުންނަށް ޚިދުމަތް ދިނުމުގައި އެންމެ މުހިންމު ޒިންމާއެއް އޮތީ ކައުންސިލްތަކުގެ އަތްމަތީގައި ކައުންސިލްތަކުގެ ޒިންމާ ވަރަށް ބޮޑު އެޒިންމާތަކަށް ބަލާއިރު  ބައެއް ކޮމިޝަންތަކަށް ވުރެ ކައުންސިލްތަކުން ކުރައްވަން ޖެހޭ މަސައްކަތްތައް ގިނަ، މިޤާނޫނު ވުޖޫދުވެގެން އައުމުން ރައްޔިތުންނަށާއި، ކައުންސިލްތަކުގެ ޒިންމާ މިހާރަށްވުރެ ބޮޑުވާނެ" އާދަމް ޝަރީފް ވިދާޅުވިއެވެ

މިއަދުގެ ރަސްމިއްޔާތުގައި ވަޒީރު އިތުރަށް ވިދާޅުވީ  އެލްޖީއޭގެ ޓެރިޓަރީއަށް ވަދެ މަސައްކަތްކުރަން އެހެންބަޔަކަށް ފުރުސަތު ނުދޭނެކަމަށާއި، އަދި އެލްޖީއޭގެ ޤާނޫނުން ލާޒިމްކުރާ ކަންތައްތައް ފުރިހަމަ ކުރެވިގެންދާކަން އެވުޒާރާއިން ކަށަވަރުކުރައްވާނެކަމަށެވެ.

އާދަމް ޝަރީފް އިތުރަށް ވިދާޅުވީ މުޅިރާއްޖެއަށް ވެސް ދިމާވެފައިވާ އެންމެ ބޮޑު މައްސަލައަކީ ގޯތިގެދޮރުގެ މައްސަލަކަމަށާއި ، ރައްޔިތުންނަށް އެކަންތައްތައް ހައްލުކޮށްދިނުމުގައި އެންމެ ބޮޑު އެހީތެރިކަމެއް ފޯރުކޮށްދެވޭނީ ސިޓީތަކާއި ރަށްތަކާއި އަތޮޅުތަކުގެ ކައުންސިލްތަކަށް ކަމަށެވެ.

ރާއްޖޭގައި ގޯތި ގެދޮރު ކުއްޔަށް ދިނުމުގެ މައްސަލައަކީ ރިޔާސީ އިންތިޚާބުގެތެރޭގައި މިހާރުގެ ރައީސުލްޖުމްހޫރިއްޔާއަށް ރައްޔިތުން ހުށައެޅި ކަންބޮޑުވުމެކެވެ. ގޯތިގެދޮރުގެ ކުލީގެ މައްސަލަ އަވަސްކޮށް ރައްޔިތުން އަތްފޯރާފަށަށް ބޯހިޔާވަހިކަން ފޯރުކޮށްދިނުމުގެ މަސައްކަތް ރައީސުލްޖުމްހޫރިއްޔާގެ ހަފްތާ 14 މަގު ޗާޓުގައިވެސް ވަނީ ހިމަނުއްވާފައެވެ. އަދި މިސަރުކާރު ވެރިކަމަށް އައިސް މިވީ ކުރު މުއްދަތުގެ ތެރޭގައި ވަނީ ކުރިން ކުއްޔަށް ދޫކޮށްފައިވާ ބައެއް ތަންތަނުގެ ކުލިތައް ކުޑަވެސް ކޮށްދެއްވާފައެވެ.