ކުރީގެ ރައީސް އަބްދުالله ޔާމީންގެ ވެރިކަމުގައި އިސްލާމިކް މިނިސްޓަރ ކަން ކުރެއްވި ޑރ.އަހުމަދު ޒިޔާދު އާއި ދެކޮޅަށް ޕްރޮސެކިއުޓާ ޖެނެރަލް (ޕީޖީ) އޮފީހުން ދައުވާ ކުރި ކޮރަޕްޝަންގެ މައްސަލައިގެ ކުށް ސާބިތުނުވާ ކަމަށް ކްރިމިނަލް ކޯޓުން ކުރި ހުކުމުގެ އިސްތިއުނާފް ޕީޖީ އޮފީހުން އަނބުރާ ގެންގޮސްފި އެވެ.
އިސްތިއުނާފީ މައްސަލަ އަނބުރާ ގެންދިޔުމަށް ޕީޖީ އޮފީހުން ނިންމާފައިވަނީ ހައި ކޯޓުގައި މި މައްސަލަ ކުރިއަށް ދަނިކޮށެވެ. އެކަން އެ އޮފީހުން ހައި ކޯޓަށް އެންގުމުން އެ މައްސަލަ ފައިލްކޮށް ހައިކޯޓުން ނެރުނު ދަޢުވާ ފޯމް ބާޠިލުކުރި ރިޕޯޓު ގައި ބުނެފައިވަނީ މައްސަލަ ބެލި ފަނޑިޔާރުންގެ މަޖިލީހުގެ އިއްތިފާގުން ބާތިލްކޮށްފައިވާކަމަށެވެ.
ޑރ.ޒިޔާދުގެ މައްޗަށް ޕީޖީން ދައުވާ އުފުލީ ޒިކުރާ މިސްކިތް ހުރި ބިމުގައި އިމާރާތެއް އެޅުމަށް އެސްޖޭ ކޮންސްޓްރަކްޝަން ކުންފުންޏާ ހަވާލުކުރި މައްސަލައިގައި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ އެވެ.
އެ މައްސަލާގައި 2021 ވަނަ އަހަރު ކްރިމިނަލް ކްރިމިނަލް ކޯޓުން ޑރ.އަހުމަދު ޒިޔާދު ގެ މައްޗަށް ކުށް ސާބިތު ނުވާކަމަށް ނިންމައި ކުރި ހުކުމުގައި ވަނީ ޑރ. ޒިޔާދު ރަސްމީ ހައިސިއްޔަތު ނަހަމަ ގޮތުގައި ބޭނުން ކުރި ކަމަށް ދައުލަތަށް ސާބިތުކޮށްދެވިފައި ނުވާ ކަމަށާއި އެހެން މީހަކަށް ނާޖާއިޒް މަންފާއެއް ހޯދައިދޭން މަސައްކަތް ކުރި ކަމަށް ބެލެވޭނެ އެއްވެސް އުންސުރެއް ނެތް ކަމަށެވެ.
އެ ހުކުމް ޕްރޮސިކިއުޓާ ޖެނަރަލްގެ އޮފީހުން ހައި ކޯޓުގައި އިސްތިއުނާފު ކުރިއެވެ.
Advertisement
This content is created and paid for by advertisers and does not involve Voice Journalists
