ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރާއްޖޭގެ ސަރުކާރާއި ހަވާލުވިއިރު 7 ބިލިއަން ރުފިޔާގެ ބިލު ނުދައްކާ ހުރި ކަަމަށް އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ވަޒީރު ސައީދު މިފަދައިން ވިދާޅުވީ ސަރުކާރުން ދައުލަތުގެ އާމްދަނީ އިތުރުކުރުމަށް މަސައްކަތް ނުކުރާކަމަށް ބައެއް ސިޔާސީ ލީޑަރުން ވިދާޅުވުމާ ގުޅިގެން އެކަމަށް ރައްދުދެއްވައި މިއަދު އެކްސް ގައި ކުރެއްވި ޕޯސްޓެއްގައެވެ.
ވަޒީރު ސައީދު ވިދާޅުވީ މި ރުފިޔާތައް ނުދައްކާ ހުރުމުގެ ސަބަބުން ރާއްޖޭގެ ވިޔަފާރިތަކަށް އެކަމުގެ ނޭދެވޭ އަސަރު ވަރަށް ބޮޑަށް ކޮށްފައިވާ ކަމަށެވެ.
"ރައީސް ޑރ މުއިއްޒު ސަރުކާރާއި ހަވާލުވިއިރު ގާތްގަޑަކަށް 7 ބިލިއަން ރުފިޔާގެ ނުދައްކާ ހުރި ބިލުތައް ހުރި. ރާއްޖޭގެ ވިޔަފާރިތަކަށް އެކަމުގެ ނޭދެވޭ އަސަރު ކޮށްފައިވަނީ ވަރަށް ބޮޑަށް!"
ވަޒީރު ވިދާޅުވިއެވެ.
މީގެ އިތުރުންވެސް ސަރުކާރުން ދައުލަތުގެ އާމްދަނީ އިތުރު ކުރަން މަސައްކަތް ނުކުރާ ކަމަށް ބުނެ ފާޑު ކިޔުމުގެ ސަބަބުން އެވާހަކަތަކަށް ރައްދު ދެއްވައި އިއްޔެ ވަޒީރު ސައީދު އެކްސްގައި ކުރެއްވި ޕޯސްޓެއްގައި ވަނީ ދައުލަތާއިި މީގެ ކުރީން ހަވާލުވި ވެރީން އެބޭފުޅުންގެ ސަރުކާރުގެ ފުރަތަމަ 2 މަސްދުވަހު، "ސަރުކާރުގެ" އާމްދަނީ އިތުރުކުރުމަށް ކުރެއްވި މަސައްކަތަކީ ކޮބައިތޯ ސުވާލު އުފައްދަވާފައެވެ. އަދި މި ސަރުކާރަކުން ދައުލަތުގެ ހަރުމުދާ ވިއްކުމާއި ޤާނޫނު ތަޅުއަޅުވާފައި ފައިސާ ޗާޕުކުރުމާއި މާލީ ޒިންމާއިން ރެކުމަކީ ކުރާނެ ކަމެއް ނޫންކަމަށް ވެސް ވަނީ ވިދާޅުވެފައެވެ.
ވަޒީރު މިފަދައިން ވިދާޅުވެފައިވާއިރު ކުރީގެ ރައީސް އަބްދުﷲ ޔާމީން އަބްދުލްޤައްޔޫމް، އެމަނިކުފާނުގެ ޕާޓީ، ޕީއެންއެފް އޮފީހުގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ވަނީ ދައުލަތުގެ ދަރަނި އިންތިހާއަށް ބޮޑުވެފައިވާއިރު ސަރުކާރުން އިއުލާން ކުރަމުންދާ ކަންކަމުން ފެންނަމުންދަނީ ޚަރަދުތައް އިތުރުވާތަންކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
