މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ދަ ޑިމޮކްރެޓްސް ގުޅިގެން މަޖިލިސްގެ ގޮނޑިތައް ހޯދުމުގެ އެއްވެސް ވިސްނުމެއް ނެތް ކަމަށް އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.
މިއަދު އެމްޑީޕީ އަދި ދަ ޑިމޮކްރެޓްސް ގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފައްޔާޒް ވިދާޅުވީ ހުރިހާ ދާއިރާ އަކަށް ވެސް އެމްޑީޕީން ކުރިމަތިލާނެ ކަމަށާއި ދަ ޑިމޮކްރެޓްސް އިން އެ ޕާޓީން އިން ބޭނުންވާ ދާއިރާތަކަށް ކުރިމަތި ލެވޭނެ ކަމަށެވެ.
މީގެ އިތުރުންވެސް ފައްޔާޒް ވިދާޅުވީ ދެ ޕާޓީގެ މެދުގައި އޮތް ހިޔާލު ތަފާތުވުން އެގޮތަށް އަދިވެސް އެބަހުރި ކަމަށާއި ދެ ޕާޓީއިން ވެސް މަސައްކަތް ކުރަނީ މިގައުމުގައި ދެ ޕާޓީންވެސް ކަންބޮޑުވާ ކަންތައްތަކެއް ހުރުމުން އެކަންކަން މަޖިލިސް ގެ ތެރެއިން އެކީގައި މަސައްކަތް ކުރެވޭނެ ގޮތެއް ހޯދުމަށް ކަމަށެވެ. އަދި ދެޕާޓީން ވެސް ވަނީ އެއްބަސްވެވޭ ކަންތައްތަކެއްގެ މަތީގައި 19 ވަނަ މަޖިލިސް ގެ ތެރެއިން އެ މަސައްކަތް ކުރަން ނިންމާފައި ކަމަށް ވެސް ވިދާޅުވިއެވެ.
"އަޅުގަނޑުމެން މިއުޅެނީ އެއްގޮތަކަށް ވެސް ކައިވެންޏެއް ކުރާކަށް ނޫން. އިނގޭތޯ. އަޅުގަނޑުމެން މި މަސައްކަތް ކުރަނީ މިގައުމުގައި އަޅުގަނޑުމެން ދެބައިވެސް ކަންބޮޑުވާ ކަންތައްތަކެއް ހުރީމާ އެކަންކަން އަޅުގަނޑުމެން މަޖިލިސް ގެ ތެރެއިން އެއްކޮށް މަސައްކަތް ކުރެވޭނެ ގޮތެއް ހޯދައިން. އެ ގޮތް އަޅުގަނޑުމެންނަށް އެބަ ލިބޭ."
ފައްޔާޒް ވިދާޅުވިއެވެ.
މީގެ އިތުރުންވެސް ފައްޔާޒް ވިދާޅުވީ އަނެއްކާވެސް އިތުރު ސިޔާސީ މަސައްކަތް އެކުގައި ކުރަން ނިންމާނީ 20 ވަނަ ރައްޔިތުންގެ މަޖިލިސް އެކުލަވާލެވިގެން އަންނަ ގޮތަކުންނާއި އެ އިރެއްގައި ހާލަތަށް ބިނާކޮށް ކަމަށެވެ.
ފައްޔާޒް ވިދާޅުވީ މިއަދު އެމްޑީޕީ އާއި ޑިމޮކްރެޓްސް ގެ މަސައްކަތަކީ ހަމައެކަނި ސަރުކާރުގެ މިސްރާބު ހުރިގޮތުން ގައުމާއި ދޭތެރޭގައި ބޮޑެތި ކަންބޮޑުވުންތަކެއް އިހުސާސް ކުރެވި، ލޯމައްޗަށް އެކަންކަން ގޯސްވާކަން ފެންނަމުން ގޮސް އެ ޔަގީންކަން ހިތަށް ވަންނާތީވެ އެކަން އެހެން ވިޔަ ނުދިނުން ކަމަށެވެ. މިކަން ކުރަން އެ ދެޕާޓީން ނިންމީ ގައުމާއި ސަރުކާރު ހަމަ މަގަށް އަޅުވައި، ރައްޔިތުންގެ ލާބައާއި މަންފާއަށް މި މަސައްކަތްތައް ކުރަން ޖެހޭ ކަމަށް ގަބޫލުކުރެވޭތީ ކަމަށް ވެސް ފައްޔާޒް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
