އިންސާނާގެ ޖިސްމުގައި ހުރި ގުނަވަންތަކުގެ ތެރެއިން، އިންސާނާގެ ފުރާނައަށް ގެއްލުން ނުލިބޭ މަގުން، އިސްލާމީ ޝަރީއަތުގައި ހުއްދަ ދެއްވާފައިވާ މިންވަރަށް ޖިސްމުގެ ގުނަވަންތަކަށް ތަސައްރަފް ކުރުން ހުއްދަ ވެގެން ވާކަމަށް ރާއްޖޭގެ ފަތުވާ ދޭ މަޖިލީހުން ބުނެފިއެވެ.

އެ މަޖިލީހުން މިފަދައިން ބުނީ އިންސާނީ ގުނަވަން ހަދިޔާ ކުރުމާއި އިންދުމުގެ ޝަރުއީ ހުކުމް އޮޅުންފިލުވައިދީ ނެރެފައިވާ ފަތުވާ ގައެވެ.

ފަތުވާދޭ މަޖިލީހުން ބުނީ އިންސާނީ ޖިސްމުގެ ގުނަވަނެއް ހަދިޔާ ކުރުމުގެ މައްސަލައިގައި ޝަރީއަތުގައި ވާރިދުވެފައިވާ ބައެއް ނައްސުތަކާއި، ހާލަތުތައް ދިރާސާ ކުރުމަށް ފަހު ދީނުގެ އިލްމުވެރިން މިކަން ވަކި ހައްދަކަށް ހުއްދަ ކުރައްވާކަމަށާއި އާންމުގޮތެއްގައި ގުނަވަން ބަދަލުކުރެވެނީ ދެ ޙާލަތެއްގައި ކަމަށެވެ.

މިގޮތުން ފުރަތަމަ ހާލަތަކީ ފުރާނަ ސަލާމަތްކުރުން ފަދަ ޟަރޫރީ ހާލަތްތައް ކަމަށް ފަތުވާދޭ މަޖިލީހުން ވަނީ ބުނެފައެވެ. އޭގެ ތެރޭގައި ފުރާނަ ސަލާމަތް ކުރުމުގެ ގަސްތުގައި ހިތުގެ ނާރު ބެދިގެން، ހަށިގަނޑުގެ އެހެންތަނަކުން ލޭނާރު ނަގައިން ހިތުގެ ތެރެއަށް ލުން ހިމެނެއެވެ.

ދެވަނަ ހާލަތަކީ އިންސާނާގެ ޖިސްމުގެ ތަނަކުން ހަން ހަލާކުވެފައިވާއިރު، ޖިސްމުގެ އެހެން ތަނަކުން ހަން ނަގައި، ހަލާކުވެފައިވާ ތަނުގައި އިންދުން ފަދަ ގުނަވަނެއް ބަދަލު ކުރުމުގެ ބޭނުންތެރިކަން އޮތުމެވެ.

އިންސާނާގެ ޖިސްމުގެ ގުނަވަނެއް ބަދަލު ކުރެވޭނެ ދެގޮތެއް ފަތުވާ ދޭ މަޖިލީހުން ނެރުނު ފަތުވާގައި ވަނީ ބަޔާންކޮށްފައެވެ. މި ހާލަތުގައި އިންސާނެއްގެ ފުރާނައަށް ގެއްލުން ނުލިބޭނަމަ ހުއްދަ ކަމަށާއި މި ހާލަތުގައި އެއްވައްތަރެއްގެ ގިނަ ގުނަވަން ހުންނަ ޒާތުގެ ގުނަވަނެއް މިސާލަކަށް ކިޑްނީ ފަދަ ތަކެތި ނެގުމުން އިންސާނާގެ ފުރާނައަށް ގެއްލުން ނުލިބޭނަމަ ހުއްދަ ކަަމަށް ފަތުވާގައި ވެއެވެ.

އިންސާނާގެ ޖިސްމުގެ ގުނަވަނެއް ބަދަލު ކުރާއިރު މަރުވެފައިވާ މީހެއްގެ ގުނަވަނެއް ބަދަލުކުރުން ހުއްދަ ވާނީ އެމީހެއްގެ ސިނކުޑިއާއި، ހިތާއި ނޭވާލުން ފުރިހަމަ އަށް ހުއްޓުމުގެ ސަބަބުން އަލުން ދިރުމެއް ނުލިބޭނެ ކަމަށް އިތުބާރު ހުރި މުސްލިމް ޑޮކްޓަރުންގެ ޓީމަކުން ނިންމައިފިނަމަ ކަމަށް ފަތުވާ ދޭ މަޖިލީހުން ވަނީ ބުނެފައެވެ. މިހާލަތުގައި މަރުވެފައިވާ ކާފަރެއްގެ އުރަވަޅި ފިޔަވާ އެހެން ގުނަވަންތައް ނަގާ ދިރިހުރި މީހެއްގެ ޖިސްމުގައި އިންދުންވެސް ހުއްދަ ކަމަށް ފަތުވާގައި ބުނެއެވެ.

އެހެންނަމަވެސް އިންސާނާގެ ޖިސްމުގެ ގުނަވަނެއް ބަދަލު ކުރެވޭނެ ދެގޮތްވެސް ހުއްދަ ހާލަތުގައި ފައިސާއެއް ނުވަތަ ހަދިޔާ އެއް ނުވަތަ އެނޫންވެސް އެއްވެސް އެއްޗެއް ދީގެން އިންސާނެއްގެ ގުނަވަނެއް އެހެން އިންސާނެއްގެ ގުނަވަނަކަށް ނަގުލު ކުރުމަކީ ހަރާމް ކަމެއް ކަމަށް ވެސް ފަތުވާގައި ބަޔާން ކުރެއެވެ.

އިންސާނެއްގެ ހަށިގަނޑަށް ގުނަވަން ލުމުގެ ތެރެއިން ޖަނަވާރެއްގެ ހަށިގަނޑުން ގުނަވަނެއް ނަގައި ލެވޭނީ އެ ޖަނަވާރަކީ ތާހިރު ޖަނަވާރަކަށް ވާނަމަ ކަމަށާއި، މަޖުބޫރީ ހާލަތެއް މެދުވެރިވެގެން ނޫނީ ނަޖިސް ޖަނަވާރެއްގެ ގުނަވަން އިންސާނެއްގެ ހަށިގަނޑަށް ނަގުލު ކުރުން ހުއްދަ ވެގެން ނުވާކަމަށްވެސް ފަތުވާ ދޭ މަޖިލީހުން ވަނީ ބުނެފައެވެ.

މި ހުކުމްތައް ބިނާކޮށްފައިވަނީ ކީރިތި ގުރްއާނާއި ރަސޫލާގެ ސުންނަތުން ސާބިތުވާ އިސްލާމްދީނުގައި ކަނޑައެޅި ބަޔާންވެފައިވާ އުސޫލުތަކުގެ މައްޗަށް ކަމަށް ވެސް އެ ފަތުވާގައި ވަނީ ބުނެފައެވެ.