ފަލަސްޠީނުގެ ޣައްޒާގައި، އިސްރާއީލުން ހިންގާ ގަތުލުއާންމުގެ އަމަލުތައް ހުއްޓުވުމަށް އެމެޖެންސީ ފިޔަވަޅުތައް އަޅައި، އެ ފަދަ އަމަލުތައް ނުހިނގާކަން ކަށަވަރު ކުރުމަށް، އދ. ގެ އެންމެ މަތީ ކޯޓު، އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) އިން އިސްރާއީލުގެ މައްޗަށް އަމުރުކޮށް ނިންމި ނިންމުމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު މަރުހަބާ ދަންނަވައިފިއެވެ. 

އައިސީޖޭގެ ނިންމުމަށް މަރުހަބާ ދަންނަވައި ރައީސް މުޢިއްޒު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ، އިސްރާއީލުން ފަލަސްޠީނުގައި ހިންގަމުންދާ ގަތުލް އާއްމު ހުއްޓާލައި، ޣައްޒާއަށް ދެމުންގެންދާ ހަމަލާތައް ހުއްޓާލަންޖެހޭ ކަމަށް ދިވެހިރާއްޖެއިން ދެކޭ ކަމަށެވެ. 

މީގެ އިތުރުން ރައީސް މުޢިއްޒު ވިދާޅުވީ، ހަގީގީ މާނާގައި ސުލްހަ މަސަލަސްކަން ޤާއިމުކުރެވޭނެ ހަމައެކަނި މަގަކީ، 1967 ވަނަ އަހަރުގެ ބޯޑަރުތަކަށް ބިނާވެފައިވާ މުސްތަޤިއްލު ފަލަސްޠީނު ދައުލަތެއް ޤާއިމުކުރުންކަމަށެވެ. 

އައިސީޖޭ އިން ގަތުލް އާއްމު ހުއްޓާލަން އަމުރުކޮށްފައި މިވަނީ، އިސްރާއީލުން ހިންގަނީ ގަތުލު އާއްމުކަން ކަނޑައަޅައި އެ ޢަމަލުތައް ހުއްޓާލުމަށް އަމުރެއް ނެރުމަށް އެދި މިދިޔަ ޑިސެމްބަރު މަހުގެ 29ވަނަ ދުވަހު ދެކުނު އެފްރިކާއިން، އެ ކޯޓަށް ހުށަހެޅި މައްސަލައިގެ ހުކުމުގައެވެ. 

ދެކުނު އެފްރިކާގެ އެ މައްސަލަ އަށް މިއަދު އިއްވި ހުކުމުގައި، އިސްރާއިލުން ހިންގަމުންދަނީ ގަތުލު އާއްމުކަން ކަނޑައަޅައިދިނުމަށް އެދުނު ހުށަހެޅުން ބަލައިގަނެ، ގަތުލް އާއްމު ނުހިނގާ ކަން ކަށަވަރު ކުރުމަށް ހުކުމް ކުރި ނަމަވެސް، ޣައްޒާގައި ހަމަލާ ބަދަލުކުރުން ވަގުތުން މެދުކަނޑާލުމުގެ އަމުރެއް ނެރެދީފައެއް ނުވެއެވެ. 

އައިސީޖޭ އިން މިފަދައިން ކުރާ އަމުރައް އަމަލު ކުރުމަކީ ލާޒިމް ކަމެކެވެ. އަދި، އިސްރާއީލުން އެ އަމުރަށް ކިޔަމަންވުމަށް އަޅަމުންދާ ފިޔަވަޅުތައް އެއް މަސް ދުވަހުގެ މުއްދަތެއް ތެރޭ ކޯޓަށް އަންގަންވެސް ޖެހެއެވެ.

ނަމަވެސް ދުނިޔޭގެ އެންމެ މަތީ ކޯޓްގެ ގޮތުގައި ބަލާ އެ ކޯޓުން ނިންމާ ނިންމުންތައް ތަންފީޒުކުރާނެ ނިޒާމެއް ނެތުމުން، އިޒްރޭލަށް މި އަމުރަށް އަމަލުނުކޮށްވެސް ހުރެވޭނެއެވެ.

އޮކްޓޯބަރު މަހުގެ ހަތްވަނަ ދުވަހުން ފެށިގެން އިސްރާއީލުން ޣައްޒާއގައި ހިންގަމުންދާ ގަތުލުޢާއްމު ގައި މިހާތަނަށް ގާތްގަޑަކަށް 26,000 އަށްވުރެ ގިނަ ފަލަސްތީނުގެ ރައްޔިތުން ވަނީ ޝަހީދުވެފައެވެ. އޭގެ ތެރެއިން ގިނައީ އަންހެނުންނާއި ކުޑަކުދިންނެވެ.