ތަހުގީގެއް ހިނގާ ގޮތާއި މެދު ހިތްހަމަ ނުޖެހޭ ނަމަ އޮންލައިން ކޮށް ޝަކުވާ ހުށައެޅޭ ގޮތް ޕްރޮސެކިއުޓާ ޖެނެރަލް (ޕީޖީ) އޮފީހުން ހަދައިފިއެވެ.

ޕީޖީ އޮފީހުން ނެރުނު ބަޔާނެއްގައި ބުނީ ޕީޖީ އޮފީހުގެ އޮންލައިން ޕޯޓަލުގައި ޝަކުވާ ހުށަހަޅާ ޓެބެއް އޮންނާނެ ކަމަށާއި، ޝަކުވާއެއް ހުށަހަޅަން ފިތާލުމުން، ފޯމެއް ފެންނާނެ ކަމަށެވެ. އަދި މި ފޯމުގެ ގިނަ، ޢާންމު ބައިބައި ހުންނާނީ ފުރާފައި ކަމަށާއި ޝަކުވާ ހުށަހަޅާ މީހާ ކުރަން ޖެހޭނެ ކަމަކީ އޭނާގެ ޝަކުވާއަކީ ކޮބައިކަމާއި، އޭނާ ތަޙްޤީޤީ އިދާރާއަށް ހުށަހެޅި ލިޔުމުގެ ކޮޕީއެއް އަޕްލޯޑުކުރުން އެކަނި ކަމަށް ވެސް ޕީޖީ އޮފީހުގެ ބަޔާނުގައިވެއެވެ. ލިޔުމުގެ ކޮޕީ ހުށައަޅަން ޖެހެނީ ލިޔުން މައްސަލައެއް ހުށަހެޅުނުކަން ޔަޤީންކުރަންޖެހޭތީ ކަމަށް ޕީޖީ އޮފީހުން ވަނީ ބުނެފައެވެ.

ޝަކުވާ ފޯމު ހުށަހެޅުމުން، އެފޯމު، އޮފީހުގެ ނިޒާމުގެ ތެރެއަށް އޮޓޮމެޓިކް ކޮށް އެންޓްރީވެ، ޝަކުވާ ފޯމު ސީދާ ގޮސް އެމައްސަލައެއް ބެލުމާ ޙަވާލުވެ ހުރި ޕްރޮސިކިއުޓަރުގެ ސްކްރީނަށް ލިބުމުން، އެ ޕްރޮސެކިއުޓަރަކު އެ ފޯމް ކިޔުމަށްފަހު ޖަވާބުދޭނެ ދުވަހެއް ލިޔާނެ ކަމަށާއި ޖަވާބުދޭނެ ދުވަހެއް ނޯޓުކުރާވަގުތު، ޝަކުވާ ހުށަހެޅި މީހާއަށް މެސެޖެއް ލިބޭނެ ކަމަށް ޕީޖީ އޮފީހުން މައުލޫމާތުދެއެވެ. އަދި އެ މައްސަލަ ބަލާ ޕްރޮސެކިއުޓަރަށް އެ ސްކްރީނުން އެހެން ސްކްރީނަކަށް، ނުވަތަ އެހެން މަސައްކަތަކަށް ދެވޭނީ، ޖަވާބުދޭނެ ދުވަހެއް ލިޔުމަށްފަހުގައި ކަމަށްވެސް ޕީޖީ އޮފީހުން ބުނެއެވެ.

ޕްރޮސެކިއުޓަރަކު އެޝަކުވާ ހުށައަޅާ ފަރާތަށް ފޮނުވާ މެސެޖްގައި  އޭނާ ހުށަހެޅި ޝަކުވާ ބަލަމުންދާކަމަށާއި، މިވެނި ދުވަހެއްގައި ޖަވާބެއްދިނުމަށް މަސައްކަތް ކުރަމުންދާކަމަށް އޮންނާނެ ކަމަށާއި އެމެސެޖުގައި ބުނާ ދުވަހުގެ ކުރިއަށް، ޖަވާބު ދީ، ޖަވާބު ތައްޔާރުވުމާއެކުވެސް، ޝަކުވާ ހުށަހެޅި މީހާއަށް މެސެޖް ލިބޭނެ އިންތިޒާމް ވެސް ވަނީ ހަމަޖެހިފައެވެ. މީގެ ސަބަބުން ޝަކުވާ ހުށަހަޅާ، ޖަވާބު ހޯދަން އެއްވެސް ތަނަކަށް ދާން ނުޖެހޭނެ ކަމަށް ޕީޖީ އޮފީހުން މައުލޫމާތު ދެއެވެ. އަދި އެ ޕޯޓަލް ފަރުމާކޮށްފައި ވަނީ އޮންލައިން ޕޯޓަލްގެ ތެރެއިން، އެމީހަކު މިހާތަނަށް ޕީޖީ އޮފީހާ ކުރި ހުރިހާ މުޢާމަލާތުތަކެއް، ހުށަހެޅި ފޯމުތަކާއި އެފޯމުތަކަށް ދީފައިވާ ޖަވާބުތައްވެސް ފެންނަން ހުންނާނެގޮތަށެވެ.

މީގެ އިތުރުންވެސް ޕީޖީ އޮފީހުން ބުނީ އޮންލައިން ނޫން ގޮތަކަށް، ސީދާ ކަރުދާސް ފޯމަކުން ނުވަތަ ސިޓީއަކުން ޝަކުވާއެއް ހުށަހަޅަން ބޭނުންވާ މީހުންނަށް، އެފުރުޞަތު، ކުރިއެކޭވެސް އެއްގޮތަށް އަދިވެސް އޮންނާނެ ކަމަށެވެ.