ގެއްލޭ މީހުން ހޯދުމާއި އިމަޖެންސީ ފަރުވާ ބޭނުންވާ މީހުން ވީހާ ވެސް އަވަހަށް އެއް ތަނުން އަނެއް ތަނަށް ގެންދިއުމަށް ހާއްސަކޮށްގެން ރާއްޖޭގައި ހެލިކޮޕްޓަރު ހިދުމަތް ފަށަން މިއަދު ނިންމައިފިއެވެ.

މިކަން ހާމަކުރައްވާފައިވަނީ މިއަދު ބޭއްވި ވަޒީރުންގެ މަޖިލީހުގެ ބައްދަލުވުމުގެ ތަފުސީލުތައް ހާމަކުރަން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމެވެ.

ނާޒިމް ވިދާޅުވީ ހެލިކަޕްޓަރު އަލުން ބޭނުންކުރަން ފެށުމާއި ގުޅޭ ގޮތުން ޓްރާންސްޕޯޓް މިނިސްޓްރީން ވަޒީރުންގެ މަޖިލިހަށް ކަރުދާހެއް ހުށައެޅިކަމަށާއި، އެ ހުށަހެޅި ކަރުދާހާއި ގުޅިގެން، ދެ އިންޖީނުލީ ހެލިކޮޕްޓަރު ހޯދުމަށް ފުޅާ ދާއިރާއެއްގައި މަޝްވަރާކުރެވުނު ކަމަށެވެ. އޭގެ ތެރެއިން، ސްޓްރިކްޓް ބިޑިންއެއްގެ ދަށުން އެ ހިދުމަތް ދޭނެ ބަޔަކު ހޯދައި، ބޭސްފަރުވާ އަށާއި ގެއްލޭ މީހުން ހޯދުމާއި ސަލާމަތްކުރުމުގެ މަސައްކަތްތަކަށް އިސްކަންދޭން ހަމަޖައްސާފައިވާ ކަމަށެވެ.

Advertisement

މިކަމާއި ގުޅޭގޮތުން ނާޒިމް އިތުރަށް ވިދާޅުވީ ހެލިކޮޕްޓަރު ދުއްވުމުގެ ތަޖުރިބާކާރެއް ނެގުމާއި ސިވިލް އޭވިއޭޝަންގެ ބަޖެޓު އިތުރުކުރުމަށް ވެސް ނިންމާފައިވާ ކަމަށެވެ. އަދި އެ މަސައްކަތްކުރާ ފަރާތްތަކަށް 6-7 އަހަރުގެ އެކްސްކްލުސިވިޓީއެއް ދިނުމާއި އައިކާއޯ ސްޓެންޑާޑްތަކަށް ހިދުމަތް ދިނުމުގެ މަސައްކަތް ކުރާނެ ކަމަށް ވިދާޅުވި އެވެ.

"ހެލިކޮޕްޓަރުގެ ހިދުމަތް ފަށައިގަންނަން ބޭނުންވާ އެ ދާއިރާގެ ކޮންސަލްޓަންޓަކު ހޯދުމަށާއި ރެގިއުލޭޓަރީ މަސައްކަތްތައް ބައިނަލްއަގުވާމީ މިންގަނޑަށް ކުރުމަށްޓަކައި ސިވިލް އޭވިއޭޝަން އޮތޯރިޓީއަށް އިތުރަށް ބޭނުންވާ އޮފީސް ޖާގައެއް ހަމަޖެއްސުމަށް ބޭނުންވާ ފައިސާ ހަމަޖެއްސުން ހިމެނޭ"  ނާޒިމް ވިދާޅުވި އެވެ.

 ހަމަ މިއާއިއެކު ނާޒިމް ވިދާޅުވީ އޭގެ އިތުރުން، ހެލިކޮޕްޓަރު ޖެއްސުމަށް ބޭނުންވާ ޖާގައެއް ހުޅުލޭގައި ގާއިމު ކުރާނެ ކަމަށާއި އިތުރު ހެލިޕެޑެއް އަޅަންޖެހިއްޖެ ނަމަ އެކަން ވެސް ސަރުކާރުން ކުރާނެ ކަމަށެވެ.

"ވެލާނާ އިންޓަނޭޝަނަލް އެއާޕޯޓުގައި ހެލިޕޯޓަކަށް ޖާގަ ހަމަޖެއްސުން ކުރަންޖެހެ ކަންކަން ކުރުން. އަދި އިތުރު ސަރަހައްދެއްގައި ހެލިޕޯޓެއް ހަދަންޖެހޭ ކަމަށް ފާހަގަ ކުރެވޭ ނަމަ އެކަމަށް ކުރަންޖެހޭ ކަންކަން ކުރިއަށްގެންދިޔުން،" ނާޒިމް ވިދާޅުވި އެވެ.

ވަޒީރުންގެ މަޖިލިހުން ރާއްޖޭގައި އަލުން ހެލިކޮޕްޓަރުގެ ޚިދުމަތް ދިނުން ފަށަށްނިންމާފައި މިވަނީ ގެއްލޭ މީހުން ހޯދުމާއި އިމަޖެންސީ ފަރުވާ ބޭނުންވާ މީހުން އުފުލުމުގައި ބޭނުންކުރަމުން އައި އިންޑީޔާގެ ހެލްކެޕްޓަރ ބޭނުންކުރުން މި ސަރުކާރުން ހުއްޓާލައިފައިވަނިކޮށެވެ.

އިންޑީއާގެ މި ހެލްކޮޕްޓަރު ދުއްވުމަށް އިންޑިއާ ސިފައިން ތިބިއިރު މި ސަރުކާރުގެ ފަރާތުން ތަކުރާރުކޮށް ބުނަމުންގެންދަނީ ރާއްޖޭގައި އެއްވެސް ޤައުމެއްގެ އަސްކަރީ ސިފައިން ތިބެގެން ނުވާނެކަމަށެވެ.