ރ.އަތޮޅު ކިނޮޅަސްގައި މިހާރު ކުރިއަށްދާ "23 ވަނަ ޖަމިއްޔަތުލް އިއްތިހާދު ވޮލީބޯޅަ ޓޯނަމަންޓް 2024" ގެ ތިންވަނަ މެޗުގައި މިރޭ ކޯކޯ އާއި ހޭވައްލާ ވާދަކުރި މެޗު ތިން ސެޓުން ދެ ސެޓުން ކާމިޔާބުކޮށް ކޯކޯ އިން މުބާރާތުގެ ފައިނަލުގެ އުންމީދު ދަމަހައްޓައިފި އެވެ.

މުބާރާތުގައި ހޭވައްލާ އިން ކުޅުނު ފުރަތަމަ މެޗުގައި ތިން ސެޓު އެއް ސެޓުން އެޓީމު މޮޅުވެފައި ވާއިރު، ކޯކޯގެ ފުރަތަަމަ މެޗުގައި ތިން ސެޓު ދެ ސެޓުން އެޓީމު ވަނީ އެންމެ ފަހުގެ ޗެމްޕިއަން ރަށްގުޑުވާ އަތުން ބަލިވެފައެވެ.

މިރޭގެ މެޗުގެ ފުރަތަަމަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ސެޓް 23-25 އިން ކާމިޔާބުކުރީ ހޭވައްލާ އެވެ. ނަމަވެސް ޖެހިގެންއައި ސެޓްގައި ކޯކޯ އިން ވަނީ އެޓީމުގެ ކުޅުން ރަނގަޅުކޮށް 20-25 އިން ސެޓު ކާމިޔާބުކޮށްފައެވެ. އަދި މެޗުގެ ތިންވަނަ ސެޓްގައި ދެޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ އިރު 25-27 އިން މިސެޓް ވެސް ކާމިޔާބުކުރީ ކޯކޯ އިންނެވެ.

ނަމަވެސް މެޗުގެ ހަތަރުވަނަ ސެޓުގައި ހޭވައްލާ އިން ވަނީ އެޓީމުގެ ކުޅުން ރަނގަޅުކޮށް ޑިފެންސާއި އެޓޭކުތައް ވެސް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިސެޓް އެޓީމުން ކާމިޔާބުކުރީ 19-25 އިންނެވެ. މިއާއެކު 2 ސެޓް 2 ސެޓުން ދެޓީމު އެއްވަރު ނަތީޖާނެރުމަށް ކުޅެވުނު ފަސްވަނަ ސެޓް 15-13 އިން ކާމިޔާބުކޮށް ކޯކޯ އިން ވަނީ ތިން ސެޓް ދެ ސެޓުން މެޗު ކާމިޔާބުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ މުޅި މެޗުގައި ވެސް މޮޅު ކުޅުމެއް ދެއްކި ހޭވައްލާ ޓީމުގެ މުހައްމަދު ރިމާޒު އެވެ.

26 ޖެނުއަރީ 2024 އިން 03 ފެބުރުއަރީ 2024 ގެ ނިޔަލަށް ކުރިޔަށް ގެންދިއުމަށް ހަމަޖެހިފައިވާ މިއަހަރުގެ މުބާރާތުގައި ހަތަރު ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭގޮތަށެވެ. އަދި ފައިނަލްގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ސެމީ ފައިނަލް މެޗެއް ކުޅެ އެމެޗުން މޮޅުވާ ޓީމަކަށެވެ.