އިއްޔެ މަޖިލީހުގައި ހިނގައިދިޔަ ހަމަނުޖެހުންތަކުގައި، މަޖިލީހުގެ މެޖޯރިޓީ އެމްޑީޕީއަށް ނިސްބަތްވެވަޑައިގަންނަވާ މެންބަރުން ބައިވެރިވެވަޑައިގެން ކުރެއްވި ކަމެއް ކުރެއްވީ އަމިއްލަ ދިފާއުގައި މަޖުބޫރު ވެގެން ކަމަށް ތުޅާދޫ ދާއިރާގެ މެންބަރު ހިސާން ހުސައިން ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ސަރުކާރުގެ ކެބިނެޓްގައި ހިމެނިވަޑައިގަންނަވާ ވަޒީރުންނަށް ރުހުން ދިނުމަށް އިއްޔެ ދައުރުން ބޭރުން، ބޭއްވި ޖަލްސާގައި، އެމްޑީޕީ އާއި ޑިމޮކްރެޓްސް އިން ބައެއް ވަޒީރުންނަށް ރުހުން ނުދޭން ވިޕް ނެރުމާއި ގުޅިގެން ސަރުކާރަށް ތާއީދު ކުރާ މެންބަރުން ވަނީ ނުރުހުން ފާޅުކުރައްވައި އަޑު ގަދަ ކުރައްވާފައެވެ. 

އެއާއެކު ހިނގައިދިޔަ ހަމަ ނުޖެހުންތަކުގެ ތެރެއިން، މަޖިލީހުގެ ކެނދިކުޅުދޫ ދާއިރާގެ މެންބަރު އަޙްމަދު ޢީސާ ވަނީ، މާރާމާރީ ހިންގައި ކަނޑިތީމު ދާއިރާގެ މެންބަރު އަބްދުالله ޝަހީމް އަބްދުލް ހަކީމަށް ވަރަށް ބޮޑަށް އަނިޔާ ކޮށްފައެވެ. އެ އަނިޔާތަކަށް ފަރުވާ ކުރުމަށް ޝަހީމްވަނީ އިއްޔެގެ ވަގުތެއްގައި ހޮސްޕިޓަލަށް ވެސް ގެންދެވިފައެވެ. 

އެކަމާއި ގުޅިގެން، އެމްޑީޕީ ޕީޖީގެ ފަރާތުން ރައްޔިތުންގެ މަޖިލީހުގެ އިދާރާގައި ރޭ ބޭއްވި ނޫސްވެރިންގެ ބައްދަލުވުމެއްގައި ހިސާން ވިދާޅުވީ އެ ޕާޓީގެ މެންބަރުން ކުރެއްވި ކަމެއް ކުރެއްވީ އަމިއްލަ ދިފާއުގައި ކަމަށެވެ. 

މިއާއެކު ހިސާން ވިދާޅުވީ މަޖިލީހުގައި ރައްކާތެރި މާހައުލެއް އޮތްކަން އިއްޔެ އިހްސާސް ނުކުރެވުނު ކަމަށެވެ. އަދި، އެމްޑީޕީ މެންބަރުން އިސްވެ ހަމަނުޖެހުން ނުހިންގާ ކަމަށާ އެޕާޓީ މެންބަރުން ކަން ކުރެއްވީ އެ ހާލަތުގައި ކޮންމެ އިންސާނެއްވެސް އަމަލުކުރާނެ ގޮތަށް ކަމަށެވެ. 

ހިސާން އިތުރަށް ވިދާޅުވީ އެމްޑީޕީން ނިންމީ ސަރުކާރު ހުއްޓުވާލަން ނޫން ކަމަށާއި ރުހުން ނުދިނުމަށް ނިންމީ ހަތަރު ވަޒީރަކަށް ކަމަށެވެ. ބާކީ 18 ވަޒީރުންނަށް ރުހުން ދިނުމާއިމެދު ފެންނަ ގޮތަކަށް ވޯޓު ދިނުމަށް އެމްޑީޕީން ވަނީ ފްރީ ވިޕެއް ނެރެފައި ކަމަށް ހިސާން ވިދާޅުވިއެވެ. އެހެންކަމުން ސަރުކާރު ހުއްޓުމަކަށް އަންނާނެ މަންޒަރު ފެނިވަޑައިނުގަންނަވާ ކަމަށް އޭނާ ވިދާޅުވިއެވެ.