ހޯއްގޮވާ ކެއްސުމުގެ އިތުރު ކޭސް އެއް ގއ. ވިލިގިލިން ފެނިފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން ބުނީ 27 ޖަނަވަރީ 2024 ގައި ފެނުނު މި ކޭސްއަކީ ކުރިން ފެނުނު ކޭސްތަކާއި ގުޅުން ހުރި ކޭސް އެއް ކަމަކަށް ބެލި ބެލިމުން އަދި އެނގިފައިނުވާ ކަމަށެވެ.

ހޯއްގޮވާ ކެއްސުން ގއ. ވިލިނގިލީގައި ފެތުރުން، މަދު ކުރުމަށް ގއ. އަތޮޅު ހޮސްޕިޓަލްގައި ޓާސްކްފޯރހެއް ވަނީ އެކުލަވާލާފައެވެ. އަދި ކޮންޓެކްޓް ޓްރޭސިންނާއި ކޮންޓެކްޓުންގެ ތެރެއިން އަލާމާތްތައް ހުރި ފަރާތްތަކަށް ބޭސް ދިނުމާއި 7 އަހަރުން ދަށުގެ ކުދިންގެ ތެރެއިން ވެކްސިން ފުރިހަމަ ނުކުރާ ކުދިން ދެނެގަނެ ވެކްސިން ދިނުމުގެ މަސައްކަތް ކުރަމުންދާ ކަމަށް އެޗްޕީއޭއިން މައުލޫމާތު ދެއެވެ.

މިހާތަނަށް ޖުމްލަ 4 މީހަކު މި ބައްޔަށް ޕޮސިޓިވް ވެފައިވާއިރު 161 ކޮންޓެކްޓެއް ވަނީ ހޯދާފައެވެ. މީގެ ތެރޭގައި ބަލީގެ އަލާމާތްތައް 23 ކޮންޓެކްޓެއްގެ ކިބައިން ފެނިފައިވާއިރު، ކޮންޓެކްޓުން ގެ އިތުރުން 17 ފަރާތެއް ކިބައިން ބަލީގެ އަލާމާތް ފެނިފައިފައިވާތީ ވަނީ ޓެސްޓް ކޮށްފައެވެ. އަދި 27 ފަރާތަކަށް ޕްރޮފައިލެކްސިސް ދެވިފައިވާކަމަށް ވެސް އެޗްޕީއޭއިން މައުލޫމާތު ދެއެވެ.

ގަވާއިދުން ވެކްސިން ދޭންފެށުމާއި ގުޅިގެން ކޮންޓްރޯލް ކުރެވިފައިވާ ބައްޔެއް ނަމަވެސް މަދު މަދުން ރާއްޖެއިން ފެންނަ ބައްޔެއް ކަމުގައިވާ ހޯއްގޮވާ ކެއްސުމުގެ ވޭދަނަ ތަކެއް އެރަށުން ފުރަތަމަ ފެނުނީ މިމަހުގެ 23 ވަނަ ދުވަހުއެވެ. އެ ބައްޔަށް އޭރު ފައްސިވެފައިވަނީ 3 ކުޑަކުދިންނެވެ. 

މި ބަލި ޖެހުމުގެ ނުރައްކާ އެންމެ ބޮޑީ ކުޑަކުދިންނަށް ކަމަށްވާތީ 7 އަހަރު ނުވާ ކުޑަކުދިންގެ ތެރެއިން މި ވެކްސިން ފުރިހަމަ ނުކޮށް ތިބި ކުދިންނަށް ވީހާވެސް އަވަހަށް ވެކްސިން ދިނުމަށް އެޗްޕީއޭއިން އިލްތިމާސްކުރެއެވެ. މި ބައްޔަށް ޖަހާ ވެކްސިން އެ ރަށެއްގެ ސިއްހީ ހިދުމަތްދޭ މަރުކަޒުން ލިބެން ހުންނާނެ ކަމަށް ވެސް އެއިދާރާއިން މައުލޫމާތުދެއެވެ.

ޕަރޓޫޓިސް ނުވަތަ ހޯއްގޮވާ ކެއްސުމަކީ ބޯޑެޓެލާ ޕަރޓޫސިސް ކިޔާ ވައްތަރެއްގެ ބެކްޓީރިއާއެއްގެ ސަބަބުން ނޭވާލާ ނިޒާމަށް ޖެހޭ ބައްޔެކެވެ. ގައިން ގައިން ވަރަށް ފަސޭހައިން އަރާ މި ބަލި ފުރަތަމަ ޖެހުމުން ފެންނާނީ އާންމު ރޯގާތަކުގައި ވެސް ފެންނަ އަލާމާތްތަކެވެ. އެހެންނަމަވެސް ހަފްތާއެއް ފަހުން ކެއްސުން ދިގުލައިގެން ގޮސް ވަރަށް ގިނަ ދުވަހަށް ދެމިގެންދާނެއެވެ.