ރައީސް ޞާލިހު ނޫނީ އިސްލާމީ ކަންކަން ބަލިކަށި ކޮށްލަން މަސައްކަތް ކުރެއްވި ވެރިއަކު ރާއްޖެ ނުދެކޭކަމަށް ރާއްޖޭގެ އިސްލާމީ ކަންތައްތަކާއި ބެހޭ ވަޒީރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޝަހީމް އެކްސްގައި ކުރި ޕޯސްޓެއްގައި ވިދާޅުވީ ވެރިކަމުގައި ހުންނަވައިގެންނާއި ވެރިކަމުން ދުރުވުމަށްފަހު ވެސް، ރައީސް ޞާލިހު މަސައްކަތްކުރައްވަނީ ރާއްޖޭގެ އިސްލާމީ ކަންކަން ބަލިކަށި ކޮށްލުމަށް ކަަމަށެވެ.
"ވެރިކަމުގައި ހުންނަވައިގެންނާއި ވެރިކަމުން ދުރު ވުމަށް ފަހު ވެސް، ރާއްޖޭގެ އިސްލާމީ ކަންކަން ބަލިކަށި ކޮށްލަން މަސަތްކަތް ކުރެއްވި ދެވަނަ ވެރިއެއް ރައީސް ސޯލިހު ނޫނީ ރާއްޖެ ދެކެފައި ނުވޭ."
ވަޒީރު ޑރ.ޝަހީމް ވިދާޅުވިއެވެ.
ޑރ.ޝަހީމް މިފަދައިން ވިދާޅުވެފައިވާއިރު މިއަދު ރައްޔިތުންގެ މަޖިލީހުން ވަނީ 31 މެމްބަރުންގެ ވޯޓުން އެބޭފުޅާއަށް ރުހުން ނުދިނުމަށް ނިންމާ، ފާސްކޮށްފައެވެ. ޝަހީމަށް ރުހުން ނުދޭނެ ކަމަށް އިއްޔެ ސަރުކާރާއި އިދިކޮޅު، އެމްޑީޕީ އާއި ދަ ޑިމޮކްރެޓްސް އިން ވަނީ ބުނެފައެވެ.
ޝަހީމަށް ރުހުން ދޭން ފެންނަ ކަމަށް ވޯޓު ދިނީ 30 މެންބަރުންނެވެ. ރުހުން ދޭން ނުފެންނަ ކަމަށް ވޯޓު ދެއްވީ 31 މެންބަރުންނެވެ. ވަކިގޮތަކަށް ވޯޓު ނުދެއްވާ 8 މެންބަރުން ތިއްބެވެ.
ޝަހީމްގެ އިތުރުން ދެން މަޖިލީހުން ރުހުން ނުދިނުމަށް ފާސްކުރި ވަޒީރުންނަކީ އެޓަރނީ ޖެނެރަލް އަލްއުސްތާޛު އަހްމަދު އުޝާމާއި މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ޑރ އަލީ ހައިދަރު އަހްމަދު އެވެ.
މި ތިން ވަޒީރުން ފިޔަވާ ރައީސް ޑރ.މުއިއްޒުގެ ކެބިނެޓްގައި ހިމެނޭ 19 ވަޒީރުންނަށް މަޖިލީހުން ވަނީ ރުހުން ދީފައެވެ.
Advertisement
This content is created and paid for by advertisers and does not involve Voice Journalists
