ކޮރަޕްޝަނަށް މަގުފަހިވާ ގޮތަށް ވެމްކޯއިން 2016 ވަނަ އަހަރާއި 2017 ވަނަ އަހަރު 43.9 މިލިއަން ރުފިޔާގެ އުޅަނދު ގަނެފައިވާ ކަމަށް އޮޑިޓް އޮފީހުން ނެރުނު ރިޕޯޓުން ދައްކައިފިއެވެ.

ވެމްކޯގެ ޕްރޮކިއުމެންޓާއި ގުޅޭ އޮޑިޓް ރިޕޯޓްގައި ބުނެފައިވަނީ އާންމު ބީލަމުގެ އުސޫލުން ބޭރުން އެންމެ ފަރާތަކުން އަގު ހޯދައިން 43.9 މިލިއަން ރުފިޔާގެ ވެހިކަލް 2016 ވަނަ އަހަރާއި 2017 ވަނަ އަހަރުގެ ތެރޭ ވެމްކޯއިން ގަނެފައިވާ ކަމަށެވެ. އަދި އާންމު ބީލަމުގެ އުސޫލުން ބޭރުން ތަކެތި ގަތުމުގެ ސަބަބުން ވާދަވެރި އަގުތަކެއް ހޯދައިގެން އެންމެ އެކަށީގެންވާ ރަނގަޅު ހުށަހެޅުން ހުށަހަޅާ ފަރާތަކާ މަސައްކަތް ޙަވާލުކުރުމުގެ ފުރުސަތު ނޯންނާނެ ކަމަށާއި، މަސައްކަތް ޙަވާލު ކުރުމުގައި ވަކި ފަރާތަކަށް ނަޖާއިޒު ފައިދާ ހޯދައިދިނުމަށް މަގުފަހިވާނެކަން ފާހަގަކުރެވޭނެ ކަމަށް ވެސް އޮޑިޓް ރިޕޯޓްގައި ވެއެވެ.

މީގެ އިތުރުންވެސް އޮޑިޓް ރިޕޯޓްގައި ބުނީ އެކުންފުނިން ކުނި އުފުލުމަށް ޑަމްޕް ޓްރަކް ގަތުމުގެ މަސައްކަތް 16 ނޮވެންބަރު 2016 ގައި އަމިއްލަ ފަރާތަކަށް ހަވާލު ކުރި އިރު ކޮރަޕްޝަނަށް މަގުފަހިވާގޮތަށް އަމަލުކޮށްފައިވާ ކަމަށާއި، "އޮޕަރޭޝަން، ކަލެކްޝަން ސާވިސަސް" އިން އެދިފައިވާ ވައްތަރު ނޫން  މޮޑިފައި ކޮށްފައިވާ ވެހިކަލްތަކެއް ހޯދައި، އެ އުޅަނދުތައް އުފެއްދި ޤައުމާއި، އުޅަނދުތަކުގެ ބްރޭންޑު އޮޅުވާލާފައިވާކަން ފާހަގަ ކުރެވޭކަމަށެވެ.

މި 10 ޓްރަކް ސަޕްލައި ކުރުމުގެ މަސައްކަތާއި ހަވާލުވި  ފަރާތާއި ވެމްކޯއާ ދެމެދު ވެފައިވާ އެއްބަސްވުމުގެ އަގަކީ 6.8 މިލިއަން ރުފިޔާ ކަމުގައިވީނަމަވެސް، މަސައްކަތް ޙަވާލުވި ފަރާތަށް ވެމްކޯއިން ފައިސާ ދެއްކިއިރު އެއްބަސްވުމުގެ އަގުގެ އިތުރަށް 407،642 ރުފިޔާ ޖީއެސްޓީ ފައިސާގެ ގޮތުގައި ވަނީ ދައްކާފައެވެ. ނަމަވެސް އެފައިސާ މަސައްކަތާއި ހަވާލުވި ފަރާތުން ޖީއެސްޓީގެ ގޮތުގައި މީރާ އަށް ދައްކާފައި ނުވާ ކަން އޮޑިޓް ރިޕޯޓް ގައި ވަނީ ފާހަގަ ކޮށްފައެވެ.

އެ ކުންފުނީގެ ބޭނުމަށް އެއް މަސްދުވަހަށް ކުއްޔަށް ދޫކުރި 3 ކޮޅުވެއްޓީގެ ތެރެއިން 2 ކޮޅުވެއްޓި ކުއްޔަށް ހިފި މުއްދަތު އިތުރުކުރަމުން ގޮސް، 20 މަސްދުވަހާއި ހިސާބަށް އިތުރުކޮށްފައިވާ ކަމަށް ވެސް އޮޑިޓް ރިޕޯޓުން ދައްކައެވެ. އެ މުއްދަތުގައި ވެސް ވެމްކޯއިން އުޅަނދުތައް ހިފާފައިވަނީ ކުލި ރިވައިސް ނުކޮށް އެއް މަސްދުވަހަށް ކުއްޔަށް ނެގިއިރު ހަމަޖެއްސި އަގު ކަމުގައިވާ 1.35 މިލިއަން ރުފިޔާ އާއި 1.49 މިލިއަން ރުފިޔާ އަށް ކަމަށް ވާތީ އެކަށީގެންވާވަރަށް ވުރެ ބޮޑު ޚަރަދުތަކެއް މި ދެ އުނޅަދަށް ކުރަން ޖެހި، ކުލީގެ ގޮތުގައި ވެމްކޯއިން 57.5 މިލިއަން ރުފިޔާ ދޫކުރި ކަމަށް ވެސް އޮޑިޓް ރިޕޯޓުން ދައްކައެވެ.

މީގެ އިތުރުންވެސް އެކި ފަރާތްތަކުން ހިންގާ ހަރަކާތްތަކަށް ސްޕޮންސާގެ ގޮތުގައި ފައިސާ ދޫކުރާނެ އުސޫލެއްނެތި އެ ކުންފުނިން 4 ފަހަރެއްގެ މަތިން ތިން ޖަމިއްޔާ އަކަށް 850،000 ރުފިޔާ ސްޕޮންސާގެ ގޮތުގައި ވަނީ ދޫކޮށްފައެވެ. އަދި މި ފައިސާ ދޫކުރީ ސްޕޮންސާގެ ގޮތުގައި ފައިސާ ދޫކުރާން އުސޫލެއް ނެތި ފައިސާ ދޫނުކުރުމަށް 13 ޖުލައި 2017 ގައި އެ ކުންފުނީގެ ޑިރެކްޓަރުންގެ ބޯޑުގެ ބައްދަލުވުމުގައި ނިންމި ފަހުން ކަމަށް ވެސް އޮޑިޓް ރިޕޯޓުން ހާމަކުރެއެވެ.