ސިނަމާލެ ބްރިޖުގެ މެއިންޓެނަންސްގެ މަސައްކަތް އިތުރު ތިން އަހަރަށް ހިލޭ އެހީގެ ދަށުން ކޮށްދޭން ޗައިނާ ސަރުކާރުން ނިންމައިފިއެވެ.

މިކަން ހާމަކޮށްފައިވަނީ ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން ކޮންސްޓްރަކްޝަން އެންޑް އިންފްރާސްޓްރަކްޗާރ މިނިސްޓަރ ޑރ. އަބްދުالله މުއްތަލިބެވެ.

އެޕްރޮގްރާމުގައި ވާހަކަދައްވަމުން މިނިސްޓަރ ރޭ ވިދާޅުވީ ސިނަމާލެ ބްރިޖުގެ މަސައްކަތް 2018 ވަނަ އަހަރު ނިންމުމަށް ފަހު، ބްރިޖު ހެދި ކުންފުނިން ދެ އަހަރު ވަންދެން އެ ތަނުގެ މެއިންޓެނަންސްގެ ކަންކަން ވަރަށް ރަނގަޅަށް ބެލަހައްޓަވާފައިވާކަމަށެވެ. ނަމަވެސް، އޭގެ ފަހުން ކޮންޓްރެކްޓް އާ ނުކުރެވި މެއިންޓެނަންސްގެ ކަންކަން ރަނގަޅަށް ކޮށްފައި ނުވާ ކަމަށް މިނިސްޓަރ ވިދާޅުވިއެވެ.

"އޭގެ ފަހުން ކުނި ކަހައި ސާފުކުރުން ފިޔަވައި މެއިންޓެނަންސްގެ މާ ބޮޑު ކަމެއް ނުހިނގާ،" ތަފުސީލް ދެއްވަމުން މިނިސްޓަރ ވިދާޅުވިއެވެ.

ރާއްޖެ އާއި ޗައިނާގެ އެކުވެރި ގުޅުން ރަމްޒު ކޮށްދޭ ބިނާ، ސިނަމާލެ ބްރިޖުގެ މެއިންޓެނެންސް މަސައްކަތްތަކާއި ގުޅޭގޮތުން މިނިސްޓަރ އިތުރަށް ވިދާޅުވީ ބްރިޖުގެ މެއިންޓެނަންސް އަކީ ވަރަށް މުހިންމު ކަމެއްކަމަށާއި، ބްރިޖުގެ އެކްސްޕޭންޝަން ޖޮއިންޓުތައް ވެސް ބަރާބަރަށް ސާފުކުރަން ޖެހޭނެ ކަމަށާއި އެހެންނަމަވެސް އެކަން ވެސް މިދިޔަ އަހަރުތަކުގެ ތެރޭގައި ކޮށްފައި ނުވާކަމަށެވެ.

"ޗައިނާ ސަރުކާރުން އަނެއްކާ ވެސް އެއްބަސްވެފައި އެބައޮތް އިތުރު ތިން އަހަރަށް ހިލޭ އެހީގެ ދަށުން އެކަން ކޮށްދެއްވަން. ކޮންޓްރެކްޓާ ވެސް އައިޑެންޓިފައި ކޮށްފައި، ކޮންޓްރެކްޓާ ވެސް ހޮވައިފައި އޮތީ އަދި ސޮއިނުކޮށް،" ރޭގެ ޕްރޮގްރާމުގައި މިނިސްޓަރ ވިދާޅުވެފައި ވެއެވެ.

ރާއްޖެ އާއި ޗައިނާގެ އެކުވެރި ގުޅުން ރަމްޒު ކޮށްދޭ ސިނަމާލެ ބްރިޖަކީ މިހާތަނަށް ރާއްޖޭގައި ހިންގުނު  އުމްރާނީ ތަރައްޤީގެ އެންމެ ބޮޑު މަޝްރޫއު ކަމަށްވާއިރު އެތަނަށް ގާތްގަނޑަކަށް 200 މިލިއަން ޑޮލަރު ހަރަދުކޮށްފައިވެއެވެ. އޭގެ ތެރެއިން 116 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީ އެވެ. އަދި 72 މިލިއަން ޑޮލަރު ލޯނެއްގެ ގޮތުގައި ޗައިނާ އިން ދިން އިރު، ދިވެހި ސަރުކާރުން ވަނީ 12 މިލިއަން ޑޮލަރު ހަރަދުކޮށްފައެވެ.

މި ސަރުކާރުން ބުނެފައި ވަނީ ސިނަމާލެ ބުރިޖުގެ މެއިންޓެނެންސް މަސައްކަތްތައް ފުރިހަމަކޮށް ބުރިޖު ރަނގަޅަށް ބެލެހެއްޓުމުގެ މަސައްކަތްތައް ފުރިހަމައަށް ކުރުމަށް ވަރަށް ބޮޑު އިސްކަމެއް ދެއްވާނެކަމަށެވެ.