ރ.އަތޮޅު ކިނޮޅަސްގައި މިހާރު ކުރިއަށްދާ "23 ވަނަ ޖަމިއްޔަތުލް އިއްތިހާދު ވޮލީބޯޅަ ޓޯނަމަންޓް 2024" ގެ  ހަތަރުވަނަ މެޗުގައި ހޯމަދުވަހުގެ ރޭ އެންމެ ފަހުގެ ޗެމްޕިއަން ރަށްގުޑުވާ އާއި ބޭރިއަންސް ވާދަކުރި މެޗު ފަސޭހަކަމާއި އެކު ސީދާ ތިން ސެޓުން ބޭރިއަންސް އިން ކާމިޔާބުކޮށްފި އެވެ.

މުބާރާތުގައި ރަށްގުޑުވާ އިން ކުޅުނު ފުރަތަމަ މެޗުގައި ތިން ސެޓު ދެ ސެޓުން ކޯކޯ އަތުން އެޓީމު މޮޅުވެފައި ވާއިރު، ބޭރިއަންސްގެ ފުރަތަަމަ މެޗުގައި ހޭވައްލާ އަތުން ތިން ސެޓު އެއް ސެޓުން ޓީމު ވަނީ ބަލިވެފައެވެ.

ރަށްގުޑުވާ އާއި ބޭރިއަންސް ވާދަކުރި މެޗުގެ ތެރެއިިން

މިރޭގެ މެޗުގެ ފުރަތަަމަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިސެޓް ބޭރިއަންސް އިން ކާމިޔާބުކުރީ ވާދަވެރި ކުޅުމަކަށްފަހު 22-25 އިންނެވެ. އަދި މެޗުގެ ދެވަަނަ ސެޓް ފަސޭހަކަމާއި އެކު 14-25 އިން ބޭރިއަންސް އިން ކާމިޔާބުކުރި އިރު، ތިންވަނަ ސެޓް އެޓީމުން ކާމިޔާބުކުރީ 16-25 އިންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ބޭރިއަންސްގެ އާދަމް ނަސީމް އެވެ.

ރަށްގުޑުވާ އާއި ބޭރިއަންސް ވާދަކުރި މެޗުގެ ތެރެއިިން

މުބާރާތުގައި ކޮންމެ ޓީމަކުން ވެސް ދެ މެޗު ކުޅެފައިވާއިރު ކޮންމެ ޓީމެއް ވެސް ވަނީ އެއް މެޗުން މޮޅުވެ، އަދި އަނެއް މެޗުން ބަލިވެފައެވެ. އަދި ބޭރިއަންސްގެ ފަހު މެޗުގައި މޯކޯ އާއި ދެކޮޅަށް އެޓީމުން ނިކުންނައިރު، ރަށްގުޑުވާގެ ފަހު މެޗުގައި އެޓީމުން ނުކުންނާނީ ހޭވައްލާ އާއި ދެކޮޅަށެވެ.

26 ޖެނުއަރީ 2024 އިން 03 ފެބުރުއަރީ 2024 ގެ ނިޔަލަށް ކުރިޔަށް ގެންދިއުމަށް ހަމަޖެހިފައިވާ މިއަހަރުގެ މުބާރާތުގައި ހަތަރު ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭގޮތަށެވެ. އަދި ފައިނަލްގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ސެމީ ފައިނަލް މެޗެއް ކުޅެ އެމެޗުން މޮޅުވާ ޓީމަކަށެވެ.