ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކްރިމިނަލް ޖަސްޓިސް އެޑްވައިޒަރަކަށް، ކުރީގެ ޕްރޮސެކިއުޓާ ޖެނެރަލް މުހުތާޒު މުހުސިން މިއަދު އައްޔަންކޮށްފި އެވެ.

ކްރިމިނަލް ޖަސްޓިސް އެޑްވައިޒަރެއްގެ ހައިސިއްޔަތުން މުހުތާޒް ރައީސް އޮފީހުގައި މަސައްކަތް ކުރައްވާނީ ޖިނާއީ އަދުލުގެ ނިޒާމާ ގުޅޭ ކަންކަމުގައި ރައީސް މުއިއްޒަށް ލަފާ އެރުވުމަށެވެ.

މުހުތާޒަށް ކްރިމިނަލް ޖަސްޓިސް އެޑްވައިޒަރުގެ މަގާމު ދެއްވާފައިވާއިރު، ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ޕީޕީއެމް/ޕީއެންސީ ނުކުންނާނެ ކެންޑިޑޭޓް ކަނޑައަޅަން މިދިޔަ ހޮނިހިރު ދުވަހު ބޭއްވި ޕްރައިމަރީގައި އޭނާ ވަނީ އަނބިކަނބަލުން ނިސްބަތްވާ ދަނގެތި ދާއިރާގެ ޕްރައިމަރީގައި ވާދަކުރައްފާއެވެ.

ނަމަވެސް އިންތިޚާބުން އޭނާއަށް ކާމިޔާބީ ލިބިފައެއް ނުވެއެވެ. 

ޕްރޮސެކިއުޓާ ޖެނެރަލްގެ އިތުރުން މުހުތާޒް ވަނީ, ކްރިމިނަލް ކޯޓުގެ ގާޒީކަމާއި, ޑީޖޭއޭގައި އެސިސްޓަންޓް ލީގަލް އޮފިސަރުގެ މަގާމު ވެސް ފުރުއްވާފަ އެވެ.

އޭނާ ގެންދަވަނީ ރާއްޖޭގެ ފުޓްބޯޅަ އެސޯސިއޭޝަނާއި, ސެންޓްރަލް އޭޝިއަން ވޮލީބޯލް އެސޯސިއޭޝަންގެ ޑިސިޕްލިނަރީ ކޮމިޓީގެ ޗެއާމަންކަންގެ އިތުރުން ސައުތް އޭޝިއަން ފުޓްބޯލް ފެޑެރޭޝަން (ސާފް) ގެ ޑިސިޕްލިނަރީ ކޮމިޓީގެ މެންބަރުކަން ވެސް ކުރައްވަމުންނެވެ.

މުހުތާޒާ އެކު، ރައީސް އޮފީހުގައި މި ވަގުތު ހަތަރު އެޑްވައިޒަރުން އެބަތިއްބެވެ. އެއީ، ރައީސް މުއިއްޒުގެ ސްޕެޝަލް އެޑްވައިޒަރު އަބްދުއްރަހީމް އަބްދުالله އާއި ޓްރޭޑް އެންޑް އިންވެސްޓްމަންޓުގެ ޕްރިންސިޕަލް އެޑްވައިޒަރު ޓު ދަ ޕްރެޒިޑެންޓު މުހައްމަދު އަލީ ޖަނާހު އަދި ޓޫރިޒަމް ޑިވެލޮޕްމަންޓް އެޑްވައިޒަރު މުހައްމަދު ހަލީލެވެ.
އެތަނުން އަބްދުއްރަހީމް މުސާރަ ނެންގެވި ނަމަވެސް ޖަނާހު އާއި ހަލީލު އެ މަގާމަށް މުސާރައެއް ނުނަންގަވައެވެ.