ކުރިއަށް އޮތް ރަމަޟާން މަހަށް ބާޒާރަށް ވިއްކުމަށް ނެރުމަށް ރާއްޖޭގައި ހައްދާ ތަކެތީގެ އަގު ބޮޑު ނުވާނެ ގޮތް ހަދާނީ ހައްދާ ތަކެތީގެ އަދަދު އިތުރުކޮށްގެން ކަމަށް އެގްރިކަލްޗާ މިނިސްޓްރީން މިއަދު ބުނެފި އެވެ.
މީގެ ކުރިން އެ މިނިސްޓްރީން ވަނީ ރާއްޖޭގައި ހައްދާ ތަރުކާރީ އާއި މޭވާގެ އަގުތައް ރޯދަމަހަށް ކޮންޓްރޯލްކުރަން މަސައްކަތް ފަށާފައިވާ ބުނެފަ އެވެ. އެކަމާއި ގުޅިގެން ރާއްޖޭގެ ގިނަ ދަނޑުވެރިން ވަނީ ކަންބޮޑުވުން ފާޅުކޮށްފަ އެވެ.
އެހެންނަމަވެސް، އެ މިނިސްޓްރީގެ ސްޓޭޓް މިނިސްޓަރު ހުސައިން އިސްމާއިލް ވިދާޅުވީ އަގު ކޮންޓްރޯލެއް ނުކުރާނެ ކަމަށާއި އެކަން ކުރާނީ ހައްދާ ތަކެތީގެ އަދަދު އިތުރުކޮށް، މާކެޓަށް ނެރުމަށް އެހީވެގެން ކަމަށެވެ. އަދި ރާއްޖޭގައި ދަނޑުވެރިން ހައްދާ ކާބޯތަކެތީގެ އަގުތައް ކޮންޓްރޯލް ކުރުމުގެ ވިސްނުން އެ މިނިސްޓްރީން ނުގެންގުޅޭ ކަމަށް ވެސް އެބޭފުޅާ ވިދާޅުވިއެވެ.
""އަޅުގަނޑުމެން މި ބުނަނީ ވަކި ބާވަތެއްގެ ތަރުކާރީ ނުވަތަ މޭވާ ވިއްކަން ޖެހޭނީ ވަކި އަގަކަށޭ އެއް ނޫން. ހައްދާ ތަކެތީގެ އަގު އަޅުގަނޑުމެން ކޮންޓްރޯލެއް ނުކުރާނަން"
ހުސައިން އިސްމާއިލް ވިދާޅުވިއެވެ.
މީގެ އިތުރުންވެސް އިސްމާއިލް ވިދާޅުވީ ރާއްޖޭގައި ރޯދަ މަހަށް ހައްދާ ތަކެއްޗަށްވުރެ ބޭނުންކުރާ މިންވަރު މި އިތުރު ވާކަމަށެވެ. އަދި މި ޑިމާންޑާ އެއްވަރަށް ސަޕްލައި ނުކުރެވޭތީ އަގު ކޮންޓްރޯލް ކުރުމުގެ ބަދަލުގައި މިނިސްޓްރީން ދަނޑުވެރިން ހައްދާ ތަކެތި މާކެޓަށް ނެރުމަށް އެހީވާނެ ކަމަށް ވެސް ވިދާޅުވިއެވެ.
މާކެޓަށް ތަކެތި ނެރުމަށް މެދުވެރިޔަކަށް ވާ ފަރާތަށް މާ ބޮޑު ފައިދާ އެއް ވާކަމަށާއި، އޭގެ ބަދަލުގައި ދަނޑުވެރިޔާއަށް މާކެޓުގައި އެ ތަކެތި ވިއްކޭނެ ފަސޭހަ ގޮތެއް އޮތްތޯ އާއި އެ ގޮތަކީ ކޮބައިތޯ މިނިސްޓްރީން ބަލަމުން އަންނަ ކަމަށް އެބޭފުޅާ ވިދާޅުވިއެވެ.
މީގެ އިތުރުންވެސް ދަނޑުވެރިކަމުގެ މިނިސްޓްރީ އާއި ލޯކަލް ގަވަމެންޓް މިނިސްޓްރީއާ ގުޅިގެން ރޯދަ މަހަށް އާންމުކޮށް ދިވެހިން ބޭނުންވާ ތަކެތި ހޯދަންޖެހޭ ވަރު ދެނެގަތުމުގެ މަސައްކަތް މިހާރު ކުރަމުން އަންނަ ކަމަށާއި، އެ މަސައްކަތް ކުރިއަށްއޮތް ދެތިން ހަފްތާ ތެރޭ ނިމޭނެ ކަމަށް ވެސް އިސްމާއީލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
