ރައްޔިތުން އިންތިޚާބު ކޮށްފައިވާ ރައީސުލްޖުމްހޫރިއްޔާއަކު ހަމައެއް ލަމައެއް ނެތި އަޒުލު ނުކުރެވޭނެ ކަމަށް އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރ ޝަހީމް މިފަދައިން ވިދާޅުވީ އެކްސް ގައި ކުރެއްވި ޕޯސްޓެއްގައެވެ.
މިގޮތުން ޝަހީމް ވިދާޅުވީ ގާނޫނީ ވެރިކަން ހިންގުމަށް ފުރުސަތު ދޭން ޖެހޭނެ ކަމަށާއި ރައީސް ޑރ.މުއިއްޒު ވެރިކަން ކުރައްވަމުން ގެންދަވަނީ ރައްޔިތުންނާއި ގައުމަށްޓަކައި ކަމަށެވެ.
"ދިމިޤުރާޠީ ހަމަތަކުގެ މަތިން ރައްޔިތުން އިންތިޚާބުކޮށްފައިވާ ރައީސުލްޖުމުހޫރިއްޔާއަކު އެއްވެސް ހަމައެއް ލަމައެއްނެތި އަޒުލެއް ނުކުރެވޭނެ. ޤާނޫނީ ވެރިކަން ހިންގަން ފުރުޞަތު ދޭންޖެހޭނެ. ރައީސް ޑރ މުއިއްޒު ވެރިކަން ކުރައްވަމުންގެންދަވަނީ ރައްޔިތުންނާއި ޤައުމަށްޓަކައި"
ޝަހީމް ވިދާޅުވިއެވެ.
މިނިސްޓަރ ޝަހީމް މިފަދައިން ވިދާޅުވެފައި މި ވަނީ އެމްޑީޕީން ރައީސް ޑރ. މުހައްމަދު މުއިއްޒު ވަކިކުރުމަށް ބޭނުންވާ ސޮއި މިހާރު ހަމަވެފައިވާ ކަމަށާއި، މަޖިލިހުގެ މިދަޢުރު ހަމަވުމުގެ ކުރިން އެމަނިކުފާނު އަޒުލު ކުރުމަށް މަޖިލިހަށް ހުށައަޅާނެ ކަމަށް ބުނެފައިވަނި ކޮށެވެ.
އިއްޔެ އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ބުނީ ރައީސް ޑރ. މުހައްމަދު މުއިއްޒު ވަކިކުރުމަށް ބޭނުންވާ އަދަދަށް ވުރެ ގިނައިންވެސް މިހާރު އެޕާޓީން ސޮއި ހޯދާފައިވާ ކަމަށާއި މިހާރު ކުރިއަށް ދަނީ ޕާރޓީގެ އިސް ސަފުގައި ތިއްބެވި ބޭފުޅުންގެ ލަފަޔާއި މަޝްވަރާ ހޯދުންކަމަށެވެ.
ރައީސް ޑރ.މުއިއްޒު އަޒުލު ކުރުމަށް ހުށައަޅާނެ ވަކި ތާރީހެއް އެމްޑީޕީން ބުނެފައެއް ނުވެއެވެ.
އެމްޑީޕީން މިފަދައިން ބުނި ނަމަވެސް ސަރުކާރަށް ތާއިދުކުރާ ޕީޕީއެމް/ޕީއެންސީ ކޯލިޝަންގެ ޕީޖީ މެމްބަރުން މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ވަނީ ރައީސް ޑރ.މުއިއްޒު އަޒުލު ކުރުމަށް ފުރުސަތު ނުދެއްވާނެ ކަމަށް ވިދާޅުވެފައެވެ.
މިގޮތުން ރައްޔިތުންގެ މަޖިލީހުގެ ޖުމްލަ މެމްބަރުންގެ އަދަދަކީ 87 ކަމަށްވީ ނަމަވެސް ރައީސް ޑރ.މުއިއްޒު ގެ ސަރުކާރުގެ އިސްމަގާމް ތަކަށް ބައެއް މެމްބަރުން އައްޔަނު ކުރުމާއި ގުޅިގެން މި އަދަދު ދަށްވެފައިވާކަން ފާހަގަކުރައްވާ، ތާރިޤު ވިދާޅުވީ އެމްޑީޕީން ރައީސް އަޒުލު ކުރުމަށް ހުށަހަޅާ ގަރާރުގައި މެމްބަރުންގެ ސޮއި ހަމަވާކަމަށް ބުނަނީ މިހާރު މަޖިލީހުގައި މެމްބަރުން ތިބި އަދަދު ކަމަށް ކަނޑައަޅާފައި ކަމަށްވާނަމަ، މީގެ ކުރިން ރައްޔިތުންގެ މަޖިލީހުން ނިންމާފައި ހުރި ނިންމުން ތަކާއި ޚިލާފު ވާނެ ކަމަށެވެ.
މީގެ އިތުރުން ވެސް ތާރިޤު ވިދާޅުވީ ރައީސް އަޒުލު ކުރުމަށް ބޭނުންވާ އަދަދު އެމްޑީޕީ އާއި ދަ ޑިމޮކްރެޓްސް އެއްވިޔަސް ހަމަނުވާނެ ކަމަށާއި އޭގެ ތެރޭގައި ރައީސުލްޖުމްހޫރިއްޔާ އަކު އަޒުލް ކުރާ ޕެޓިޝަން ގައި ސޮއި ނުކުރާނެ އެތައް މެމްބަރުން ތަކެއް އެ ދެ ޕާޓިގައި ތިބޭނެ ކަމަށެވެ.
އެމްޑީޕީން ވަނީ ރައީސް ޑރ.މުއިއްޒު އަޒުލް ކުރުން ފަސޭހަ ކުރުމަށް މީގެ ކުރިން މަޖިލީހުގެ ގަވާއިދަށް އިސްލާހެއް ގެނެސްފައެވެ. އެ އިސްލާހުގައި ބުނާ ގޮތުން، ދާއިރާއެއްގެ ގޮނޑިއެއް ހުސްވެއްޖެ ނަމަ، އެ ގޮނޑިއެއް ނުލައި މަޖިލީހުގެ ޖުމުލަ މެންބަރުންގެ އަދަދު ގުނޭނެއެވެ. އެ އިސްލާހާ އެކު މަޖިލީހުގެ 54 މެންބަރުންގެ ވޯޓުން ރައީސް އަޒުލުކުރެވޭނެއެވެ. މަޖިލީހުގައި މިހާރު އެ އަދަދަށް ސަރުކާރާ އިދިކޮޅު މެންބަރުން އެބަތިއްބެވެ.
އެހެންނަމަވެސް އެމްޑީޕީން މަޖިލީހުގެ ގަވާއިދަށް މިގެނައި އިސްލާހު، ގާނޫނު އަސާސީއާ ޚިލާފު ކަމަށް ބުނެ ބަންޑާރަނައިބުގެ އޮފީހުން ވަނީ އެ މައްސަލަ ސުޕްރީމް ކޯޓަށް ހުށަހަޅައިފައެވެ.
Advertisement
This content is created and paid for by advertisers and does not involve Voice Journalists
