ރައީސް ޑރ.މުއިއްޒު އަޒުލް ކުރުމަށް ފަށާފައިވާ މަސައްކަތްތައް ހުއްޓާލުމަށް ޖުމްހޫރީ ޕާޓީ (ޖޭޕީ)ގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހީމް ގޮވާލައްވައިފިއެވެ.
އެކްސް ގައި ޤާސިމް ކުރެއްވި ޕޯސްޓެއްގައި ވިދާޅުވީ ރައީސް ޑރ.މުއިއްޒު ޤާނޫނު އަސާސީ އާއި ޤާނޫނާއި ޚިލާފުނުވެ، މަޤާމުގެ ޝަރުތުތަކުގެ ތެރެއިން ޝަރުތެއް އުނިނުވާހާ ހިނދަކު، ސިޔާސީ ގޮތުން ބަދަލުހިފުމުގެ ނިޔަތުގައި، ވެރިކަމާ ހަވާލުވެގަތުމަށްޓަކައި، އެއްވެސް ހަމައެއް ލަމައެއްނެތި ރައީސުލް ޖުމްހޫރިއްޔާ އަޒުލު ކުރުމަކީ، ނުވަތަ ޢަޒުލުކުރަން ހުށަހެޅުމަކީވެސް، ދިވެހިރައްޔިތުންގެ ނިންމުމުގައި ކޮޅުފައިން ޖެހުމެއް ކަމުގައި ނޫނީ ނުވާނެ ކަމަށެވެ. އަދި ދައުރެއް ނިމެމުންދާ މަޖިލިސްއެއްގެ ތެރެއިން މިފަދަ ޢަމަލެއް ހިންގުމަކީ އެއްގޮތަކަށްވެސް ބަލައިގަނެވޭނޭ ކަމެއް ނޫން ކަމަށް ވެސް ޤާސިމް ވިދާޅުވިއެވެ.
މީގެ އިތުރުންވެސް ޤާސިމް ވިދާޅުވީ ރައީސުލް ޖުމްހޫރިއްޔާ ގެ އިތުބާރު ނެތްކަމަށް ނެގޭނީ އެކަމުގައި އެކަށީގެންވާ ސަބަބުތަކެއް ހުރެގެން ކަމަށެވެ. އަދި މިއީ މަޖިލީހުގައި މެޖޯރިޓީ އޮތަތީވެ، ހަމަ ތިބެފަ ޖެއްސުމަށް ކޮށްލާ ކަމަކަށް ވެގެން ނުވާނެ ކަަމަށާއި، މިފަދަ ކަންކަން ކުރުމަކީ ޤައުމުގެ ދުސްތޫރީ ހަމަތަކާއި، ޑިމޮކްރަސީގެ އުޞޫލުތަކާއިވެސް މުޅީން ޚިލާފު ޢަމަލެއް ކަން ވެސް ޤާސިމް ވަނީ ފާހަގަކުރައްވާފައެވެ.
ޤާސިމް އިތުރަށް ވިދާޅުވީ ރައްޔިތުންގެ ފުރިހަމަ ބޮޑު އަޚުލަބިއްޔަތުން، ޑިމޮކްރަސީގެ ހަމަތަކުގެ ތެރެއިން ރައީސުލް ޖުމްހޫރިއްޔާގެ މަޤާމަށް ރައްޔިތުން އިންތިޚާބުކޮށްފައިވާ ރައީސް ޑރ. މުޢިއްޒު މަޤާމާއި ހަވާލުވިތާ މިވީ އެންމެ ދެ މަސްދުވަސް ކަމަށެވެ. އަދި އެމަނިކުފާނު މިހާތަނަށް ވެރިކަން ކުރައްވަމުން އެގެންދަވަނީ ރައްޔިތުންނާއި ޤައުމަށްޓަކައި، ޤައުމަށް ކުރިއެރުން ހާޞިލް ކޮށް ދިނުމަށް ކަމަށްވާތީ، އެމަނިކުފާނަށް ޤާނޫނީ ވެރިކަން ހިންގުމަށް ރައްޔިތުންގެ މަޖިލީހުން ފުރިހަމަ ފުރުޞަތު ދޭންޖެހޭ ކަމަށް ދެކިލައްވާ ކަމަށް ވެސް އެ ޕޯސްޓުގައި ގާސިމް ވަނީ ވިދާޅުވެފައެވެ.
މިފަދަ އަމަލުތައް ހިންގުމުން ޤައުމަށް ލިބެގެންދާނީ އިތުރު ހިތާމައި ނިކަމެތި ކަމެއް ކަން ފާހަގަކުރައްވާ ޤާސިމް ވަނީ ރައީސް ޑރ.މުއިއްޒު ޢަޒުލު ކުރުމަށް ފަށާފައިވާ މަސައްކަތް އެއްވެސް ޝަރުތެއް ނެތި ހުއްޓާލުމަށް ނަސޭހަތްތެރިވެފައެވެ.
ޤާސިމް ގެ އިތުރުން އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވެސް ވަނީ ދިމިގުރާތީ ހަމަތަކުގެ މަތިން ރައްޔިތުން އިންތިޚާބުކޮށްފައިވާ ރައީސުލްޖުމުހޫރިއްޔާއަކު އެއްވެސް ހަމައެއް ލަމައެއްނެތި އަޒުލެއް ނުކުރެވޭނެ ކަމަށާއި ޤާނޫނީ ވެރިކަން ހިންގަން ފުރުޞަތު ދޭންޖެހޭނެ ކަމަށް ވިދާޅުވެފައެވެ.
މިބޭފުޅުން މިފަދައިން ވިދާޅުވެފައިވާއިރު އިއްޔެ އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވަނީ ރައީސް ޑރ. މުއިއްޒު ވަކިކުރުމަށް ބޭނުންވާ ސޮއި މިހާރު ހަމަވެފައިވާ ކަމަށާއި، މަޖިލިހުގެ މިދަޢުރު ހަމަވުމުގެ ކުރިން އެމައްސަލަ މަޖިލީހަށް ހުށައަޅާނެ ކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
