ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް އަށް ހަމަލާދީ ޒަހަމްކޮށްލީ ސިޔާސީ ބޭނުމެއްގައި ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހު މިފަދައިން ވިދާޅުވީ ޕީޖީ ޝަމީމް އަށް ދިން ހަމަލާ ކުށްވެރި ކުރައްވައި އެކްސް ގައި ކުރެއްވި ޕޯސްޓެއްގައެވެ. މި ޕޯސްޓުގައި އެމަނިކުފާނު ވަނީ ޕީޖީ ޝަމީމަށް އަވަސް ޝިފާއަކަށް އެދިވަޑައިގެންފައެވެ.
މީގެ އިތުރުންވެސް ރައީސް ޞާލިހު ވަނީ ސިޔާސީ ގޮތުން ކުރާ އަނިޔާވެރި އަމަލުތަކަށް ޑިމޮކްރެޓިކް މުޖުތަމަޢެއްގައި ޖާގައެއް ނެތް ކަމަށް ވިދާޅުވެ، އެކަންކުރާ މީހުން އިންސާފުގެ ކުރިމައްޗަށް ގެނައުމުގައި އަވަސްވެގަތުމަށް ސަރުކާރަށް ގޮވާލާފައެވެ.
ޕީޖީ ޝަމީމަށް ހަމަލާދީފައި ވަނީ މިއަދު ގެ ވަގުތެއްގައި މާލޭ ގައެވެ.
މި މައްސަލަ އާއި ގުޅިގެން ފުލުހުން ބުނީ އެ ބޭފުޅާ އަށް ލިބިފައިވާ އަނިޔާތަކަށް އޭޑީކޭ ގައި ފަރުވާ ހޯދަމުން އަންނަ ކަމަށެވެ. އަދި މިހާތަނަށް ބެލި ބެލުމުން ހަމަލާދީފައި ވަނީ ތޫނު އެއްޗަކުން ކަން އެނގޭ ކަމަށާއި އެ މައްސަލަ އިތުރަށް ތަހުގީގު ކުރަމުން އަންނަ ކަމަށް ފުލުހުން ވަނީ ބުނެފައެވެ.
ޕީޖީ ޝަމީމަށް ދިން ހަމަލާގައި އެބޭފުޅާ ގެ އަތްޕުޅުގެ މުލައްދަނޑިއަށް އަނިޔާވި ނަމަވެސް ސީރިއަސް އަނިޔާއެއް ލިބިވަޑައިގެންފައެއް ނުވެއެވެ.
Advertisement
This content is created and paid for by advertisers and does not involve Voice Journalists
