މިއަދުގެ ވަގުތެއްގައި ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމަށް ހަމަލާދީ ޒަހަމްކޮށްލުމާއި ގުޅިގެން އެމްއެންޑީއެފުން އެބޭފުޅާގެ ސެކިއުރިޓީ ވަރުގަދަ ކޮށްފިއެވެ.
އެމްއެންޑީއެފުން ޕީޖީ ޝަމީމް ގެ ސެކިއުރިޓީ ވަރުގަދަ ކުރިކަން އިއުލާންކޮށްފައި މި ވަނީ އެ ބޭފުޅާ އަށް ދިން ހަމަލާ ހަރުކަށި އިބާރާތުން ކުށްވެރިކޮށް ޕީޖީ އޮފީހުން ނެރުނު ނޫސް ބަޔާނުގައެވެ.
މިގޮތުން އެ ބަޔާނުގައި ބުނީ ޕީޖީ ޝަމީމަށް ހަމަލާދީފައިވަނީ މިއަދުގެ ފަތިހުގެ ވަގުތެއްގައި މާލޭގެ މަގުމަތީގައި، ސައިކަލެއްގައި އައި ދެ މީހަކު، ހަތިޔާރެއް ބޭނުންކޮށްގެން ކަމަށެވެ. މި ހަމަލާ އާއި ގުޅިގެން އެބޭފުޅާ ދަނީ އޭޑީކޭ ގައި ފަރުވާ ހޯއްދަވަމުން ކަމަށާއި ހާލުކޮޅު މިހާރު ރަނގަޅު ކަމަށް ވެސް ޕީޖީ އޮފީހުން ވަނީ ބުނެފައެވެ.
ޕީޖީ ޝަމީމަށް ދިން ހަމަލާގައި އެބޭފުޅާ ގެ އަތްޕުޅުގެ މުލައްދަނޑިއަށް އަނިޔާވި ނަމަވެސް ސީރިއަސް އަނިޔާއެއް ލިބިވަޑައިގެންފައެއް ނުވެއެވެ.
ފުލުހުން ގެންދަވަނީ މި މައްސަލަ ސީރިއަސް މައްސަލައެއް ގޮތުގައި ތަޙުޤީޤުކުރައްވަމުން ކަމަށާއި މިއަދު ހެނދުނު، ކޮމިޝަނަރ އޮފް ޕޮލިސް ޢަލީ ޝުޖާޢުވަނީ ޕްރޮސިކިއުޓަރ ޖެނެރަލްގެ ޙާލު ބައްލަވައިލެއްވުމަށް އޭޑީކޭ ހޮސްޕިޓަލަށް ވަޑައިގެންފައި ކަމަށް ވެސް ޕީޖީ އޮފީހުން މައުލޫމާތު ދެއެވެ.
މި މައްސަލަ އާއި ގުޅިގެން ފުލުހުން ވަނީ މިހާތަނަށް ބެލި ބެލުމުން ހަމަލާދީފައި ވަނީ ތޫނު އެއްޗަކުން ކަން އެނގޭ ކަމަށް ބުނެފައެވެ.
ޕީޖީ ޝަމީމަށް ދިން ހަމަލާ ކުށްވެރި ކުރައްވައި ކުރީގެ ރައީސް އިބްރާހިމް މުޙައްމަދު ޞާލިހު އެކްސް ގައި ކުރެއްވި ޕޯސްޓެއްގައި އެއީ ސިޔާސީ ބޭނުމަކަށް ޓަކައި ދިން ހަމަލާއެއް ކަމަށް ވިދާޅުވުމާއި ގުޅިގެން އެމަނިކުފާނާއި ސުވާލުކުރުމަށް ވަނީ ނިންމާފައެވެ. އެގޮތުން ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާގެ ވަޒީރު ޢަލީ އިޙުސާން ވިދާޅުވީ އެ ހަމަލާއަކީ ސިޔާސީ ގޮތުން ދެވުނު ހަމަލާއެއް ކަމަށް ކުރީގެ ރައީސް ޞާލިހު ވިދާޅުވި ވިދާޅުވުމަކީ އެހަމަލާ ދިނުމުގެ ފަހަތުގައިވާ މަޤުޞަދާއި ނިޔަތާ ގުޅޭ ބުރަދަންހުރި އިތުބާރުކުރެވޭ މައުލޫމާތު އެމަނިކުފާނަށް ލިބިވަޑައިގެންފައިވާކަމަށް ބެލެވޭނެ ސަބަބެއް ކަމަށެވެ. އަދި އެމަނިކުފާނަށް ލިބިފައި ހުރި މައުލޫމާތު ފުލުހާއި ހިއްސާ ކުރެއްވުމަށް ވެސް ވަޒީރު ވަނީ އެދިވަޑައިގެންފައެވެ.
މީގެ އިތުރުންވެސް މި މައްސަލައަށް ވަރަށް ބޮޑު އިސްކަމެއް ދީގެން ފުލުހުން ތަހުގީގު ކުރަމުން އަންނަ ކަަމަށް ވިދާޅުވެ، ހަމަލާ ދިން ފަރާތްތައް އިންސާފުގެ ކުރިމައްޗަށް ނެރުއްވާނެ ކަަމުގެ ޔަގީން ކަން ވަޒީރު ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
