ކޮރަޕްޝަންގެ ކުށް ސާބިތުވެ، ޕާކިސްތާން ގެ ކުރީގެ ބޮޑު ވަޒީރު އިމްރާން ޚާން އާއި އެބޭފުޅާގެ އަނބިކަބަލުން ބުޝްރާ ބީބީ 14 އަހަރަށް ޖަލަށް ލުމަށް ހުކުމްކޮށްފިއެވެ.

މި ދެ ބޭފުޅުންނަށް ހުކުމް އިއްވާފައި ވަނީ ޕާކިސްތާނުގައި އިންތިހާބެއް ބާއްވަން އެންމެ ހަފްތާއެއްހާ ދުވަސް ވެފައިވަނިކޮށް، އެގައުމުގައި އޭނާ އިންތިހާބުގައި ވާދަކުރުން މަނާކޮށްފައި އޮއްވައެވެ.

2022 ވަނަ އަހަރު ބޮޑު ވަޒީރު ކަމުގެ މަގާމުން ދުރުކުރި އިމްރާން ޚާން މިހާރު ވެސް ދަނީ ކޮރަޕްޝަންގެ ކުށުގައި ތިން އަހަރުގެ ޖަލު ހުކުމެއް ތަންފީޒު ކުރަމުންނެވެ. އިމްރާން ޚާން ވަނީ އެ ބޭފުޅާގެ މައްޗަށް އުފުލާފައިވާ އެތައް ދައުވާ ތަކަކީ ސިޔާސީ ގޮތުން ޖައްސާލައިގެން އުފުލާފައިވާ ދައުވާ ތަކެއް ކަމުގައި ވިދާޅުވެފައެވެ.

Advertisement

މިއަދު ކޯޓުގައި ކުރިއަށް ދިޔައީ އިމްރާން ޚާން ބޮޑު ވަޒީރު މަގާމުގައި ހުންނަވަނިކޮށް ދެމަފިރިންނަށް ލިބުނު ދައުލަތުގެ ހަދިޔާތަކާއި ގުޅޭ ޚިޔާނާތުގެ ތުހުމަތު ތަކުގެ މައްސަލައެވެ.މި ދެމަފިރިންގެ މައްޗަށް ކޮށްފައިވަނީ ތުހުމަތުކޮށްފައި ވަނީ ވެރިކަމުގައި ހުންނަވައިގެން ދައުލަތުގެ ހަދިޔާތައް ހިފެހެއްޓުމާއި ވިއްކުމުގެ ކުށުގެ ދައުވާ އެވެ. މި ހަދިޔާ ތަކުގެ ތެރޭގައި ސައުދީ އަރަބިއާ ގެ ވަލީއުލްއަމްރު ހަދިޔާ ކުރެއްވި ރަން ގަހަނާ ސެޓެއްވެސް ހިމެނޭ ކަމަށް ބޭރުގެ ނޫސްތަކުން ރިޕޯޓް ކުރެއެވެ. ޕާކިސްތާނުގައި ސަރުކާރުގެ ވެރިންނަށް މިފަދަ ހަދިޔާތައް ގަތުމުގެ ހުއްދަ އޮތް ނަމަވެސް ވިއްކުމުގެ ހުއްދަ އެއް ނޯވެއެވެ.

މި ހުކުމް ގެ އިތުރުންވެސް އިއްޔެ ކޯޓުން ވަނީ އިމްރާން ޚާން ދައުލަތުގެ މުހިންމު ލިޔެކިޔުން ތަކެއް ލީކް ކޮށްލިކަން ސާބިތުވެ، 10 އަހަރަށް ޖަލަށް ލުމަށް ވެސް ހުކުމް ކޮށްފައެވެ.

ޖަލު ހުކުމް ތަކުގެ އިތުރުން ވެސް 5.3 މިލިއަން ޑޮލަރުގެ ޖޫރިމަނާއެއް ދެއްކުމަށް ވެސް ކޯޓުން އެ ދެމަފިރިންގެ މައްޗަށް ވަނީ ހުކުމް ކޮށްފައެވެ.

އިމްރާން ޚާނާއި އެކު 14 އަހަރުގެ ޖަލު ހުކުމެއް އިއްވި އެބޭފުޅާގެ އަނބިކަބަލުން ބުޝްރާ ބިބީ އަކީ އެކަމަނާގެ ފިރިކަލުންގެ ބޮޑު ވަޒީރު ކަމުގެ ދުވަސްވަރު ލޯ ޕްރޮފައިލެއް ގެންގުޅުއްވި ބޭކަނބަލެކެވެ. މި ދެމަފިރިން ކައިވެނި ބައްލަވައިގަތީ 2018 ވަނަ އަހަރުއެވެ.